ഇറാനിൽ കൊല്ലപ്പെട്ടവരുടെ എണ്ണം 201 എന്ന് റിപ്പോർട്ട്
പ്രദീപ് പുറവങ്കര
ടെഹ്റാൻ: ഇറാനിലെ വിവിധ ഭാഗങ്ങളിലായി ഇന്ന് നടന്ന ആസൂത്രിത ആക്രമണങ്ങളിൽ കൊല്ലപ്പെട്ടവരുടെ എണ്ണം 201 കവിഞ്ഞതായി ഇറാനിയൻ റെഡ് ക്രസന്റ് വക്താവ് മുജ്തബ ഖാലിദി അറിയിച്ചു. രാജ്യത്തെ ഔദ്യോഗിക മാധ്യമങ്ങളാണ് ഈ വിവരം റിപ്പോർട്ട് ചെയ്തത്. ആക്രമണങ്ങളിൽ ഇതുവരെ 747 പേർക്ക് പരിക്കേറ്റതായും വക്താവ് വ്യക്തമാക്കി.
ഇറാന്റെ ആകെ 31 പ്രവിശ്യകളിൽ 24 ഇടത്തും ആക്രമണങ്ങൾ ഉണ്ടായതായാണ് കണക്കുകൾ സൂചിപ്പിക്കുന്നത്. രാജ്യത്തിന്റെ ഭൂരിഭാഗം പ്രദേശങ്ങളെയും ബാധിച്ച ഈ ആക്രമണം സമീപകാലത്തെ ഏറ്റവും വലിയ സുരക്ഷാ വെല്ലുവിളികളിലൊന്നായി മാറിയിരിക്കുകയാണ്. പരിക്കേറ്റ പലരുടെയും നില ഗുരുതരമായതിനാൽ മരണസംഖ്യ ഇനിയും ഉയരാൻ സാധ്യതയുണ്ടെന്നാണ് ലഭിക്കുന്ന സൂചനകൾ.
രക്ഷാപ്രവർത്തനങ്ങൾ വിവിധ പ്രവിശ്യകളിൽ യുദ്ധകാലാടിസ്ഥാനത്തിൽ പുരോഗമിക്കുകയാണ്. പരിക്കേറ്റവർക്ക് അടിയന്തര ചികിത്സ ലഭ്യമാക്കാൻ റെഡ് ക്രസന്റ് സംഘങ്ങൾ സജ്ജമാണെന്നും ദുരിതബാധിത പ്രദേശങ്ങളിൽ സഹായമെത്തിക്കാനുള്ള നടപടികൾ തുടരുകയാണെന്നും അധികൃതർ അറിയിച്ചു.
aa
