വീണ്ടും റെക്കോഡ് നേട്ടവുമായി ഗിന്നസ് പക്രു
കൊച്ചി: ഏറ്റവും ഉയരം കുറഞ്ഞ നായകൻ, സംവിധായകൻ എന്നീ റെക്കോഡുകൾക്ക് പിന്നാലെ ഏറ്റവും ഉയരം കുറഞ്ഞ സിനിമാ നിർമ്മാതാവ് എന്ന നേട്ടം കൂടി കൈവരിച്ച് മലയാളത്തിന്റെ പ്രിയതാരം ഗിന്നസ് പക്രു. പുതിയ ചിത്രം ഫാൻസി ഡ്രസ് ആണ് പക്രുവിനെ നേട്ടത്തിന് അർഹനാക്കിയത്. ബെസ്റ്റ് ഓഫ് ഇന്ത്യ റെക്കോഡ്സ് അധികൃതർ റെക്കോഡ് കൊച്ചിയിൽ വെച്ച് പക്രുവിന് കൈമാറി.
വിനയൻ ഒരുക്കിയ അദ്ഭുതദ്വീപ് എന്ന സിനിമയിലൂടെയാണ് ഏറ്റവും ഉയരം കുറഞ്ഞ നായകനുള്ള ഗിന്നസ് റെക്കോഡ് പക്രു നേടിയത്. 2013 ൽ കുട്ടീം കോലുമെന്ന ചിത്രം പക്രു സംവിധാനം ചെയ്തു. ഗിന്നസ് പക്രു നിർമ്മിച്ച ഫാൻസി ഡ്രസ് തിയേറ്ററിൽ പ്രദർശനം തുടരുകയാണ്. രഞ്ജിത്ത് സ്കറിയ സംവിധാനം ചെയ്ത ചിത്രത്തിൽ കലാഭവൻ ഷാജോൺ, ഹരീഷ് കണാരൻ, ശ്വേതാ മേനോൻ, സൗമ്യ മേനോൻ എന്നിവരാണ് പ്രധാന കഥാപാത്രങ്ങൾ.
