ഗോവ രാജ്യാന്തര ചലച്ചിത്രമേളയിൽ മലയാള സിനിമയ്ക്ക് അപൂർവ്വ നേട്ടം
ഗോവ രാജ്യാന്തര ചലച്ചിത്രമേളയിൽ മലയാള സിനിമയ്ക്ക് അപൂർവ്വ നേട്ടം. ടേക്ക് ഓഫ് എന്ന മലയാള ചിത്രത്തിന് രണ്ട് അവാർഡുകളാണ് മേളയിൽ ലഭിച്ചത്. ചിത്രത്തിലെ സമീറ എന്ന കഥാപാത്രത്തെ അനശ്വരമാക്കിയ പാർവ്വതി മികച്ച നടിക്കുള്ള പുരസ്കാരത്തിന് അർഹയായി. മികച്ച നടിക്ക് പുറമെ സ്പെഷൽ ജൂറി പുരസ്കാരവും ടേക്ക് ഓഫിന് ലഭിച്ചു. ഇതാദ്യമായാണ് ഒരു മലയാളി താരത്തിന് രാജ്യാന്തര ചലച്ചിത്രമേളയിൽ പുരസ്കാരം ലഭിക്കുന്നത്.
എയ്ഡ്സിനെതിരായ പ്രതിരോധ പ്രവർത്തനം വിഷയമാക്കിയ ഫ്രഞ്ച് ചിത്രം 120 ബീറ്റ്സ് പെർ മിനിറ്റ് എന്ന ചിത്രത്തിനാണ് മികച്ച ചിത്രത്തിനുള്ള സുവർണ്ണ മയൂരം. ഈ ചിത്രത്തിൽ ഷോൺ ഡാൽമാസോ എന്ന കഥാപാത്രത്തെ അവതരിപ്പിച്ച നാഹ്യുൽ പെരസ് ബിസായാർട്ടാണ് മികച്ച നടൻ. എയ്ഞ്ചൽസ് വേർ വൈറ്റ് ചിത്രം ഒരുക്കിയ വിവിയൻ ക്യുവാണ് മികച്ച സംവിധായിക. കിരോ റുസ്സോയുടെ ഡാർക്ക് സ്കള്ളിനാണ് മികച്ച നവാഗത സംവിധായകന്റെ ചിത്രത്തിനുള്ള പുരസ്കാരം. യുണെസ്ക്കോ ഗാന്ധി മെഡൽ ഷിറ്റിജ് എ ഹൊറൈസൺ കരസ്ഥമാക്കി.
മലയാളികൾക്ക് അഭിമാനിക്കാവുന്ന നിമിഷങ്ങളാണ് 48ാമത് രാജ്യാന്തര ചലച്ചിത്രമേളയിൽ അരങ്ങേറിയത്. തനിക്ക് ലഭിച്ച ഈ അംഗീകാരം അന്തരിച്ച സംവിധായകൻ രാജേഷ് പിള്ളയ്ക്കും ലോകമെന്പാടുമുള്ള നഴ്‌സ്മാർ‍ക്കും സമർപ്പിക്കുന്നതായി പാർവ്വതി പുരസ്കാരം ഏറ്റുവാങ്ങിയ ശേഷം പറഞ്ഞു. പത്ത് ലക്ഷം രൂപയും പ്രശസ്തിപത്രവുമാണ് പുരസ്കാരമായി പാർവ്വതിക്ക് ലഭിക്കുക. ‘മനുഷ്യബന്ധങ്ങളും വികാരങ്ങളും പ്രമേയമാക്കി മനോഹരമായ സിനിമകൾ ചെയ്ത ആളാണ് രാജേഷ് പിള്ള. അദ്ദേഹം ഞങ്ങളെ വിട്ടുപിരിഞ്ഞ അന്ന് തീരുമാനിച്ചതാണ് ഈ പ്രോജക്ട്. ഈ സിനിമയിലൂടെ അദ്ദേഹം ജീവിക്കണം.’ പാർവ്വതി പറഞ്ഞു.
മേളയിൽ ഇന്ത്യൻ പനോരമ വിഭാഗത്തിലേയ്ക്കും മത്സരവിഭാഗത്തിലേയ്ക്കുമാണ് ടേക്ക് ഓഫ് തിരഞ്ഞെടുക്കപ്പെട്ടത്. പാർവ്വതിക്കും മഹേഷിനുമൊപ്പം നിർമ്മാതാക്കളായ ആന്റോ ജോസഫും ഷെബിൻ ബെക്കറും ഗോവയിൽ എത്തിയിരുന്നു.
മത്സരവിഭാഗത്തിൽ തിരഞ്ഞെടുക്കപ്പെട്ട രണ്ട് ഇന്ത്യൻ സിനിമകളിൽ ഒന്നാണ് ടേക്ക് ഓഫ്. ചലച്ചിത്ര മേളയിൽ നിറഞ്ഞ സദസ്സിലായിരുന്നു ടേക്ക് ഓഫിന്റെ പ്രദർശനം. തിരക്കഥാകൃത്ത് പി.വി ഷാജികുമാർ, കലാസംവിധാനം നിർ‍വ്വഹിച്ച സന്തോഷ് രാമൻ എന്നിവർ ചിത്രത്തിന്റെ പ്രദർ‍ശനത്തോടനുബന്ധിച്ച് മേളയിലെത്തിയിരുന്നു.
