ബിസിസിഐ തെരഞ്ഞെടുപ്പ് മാർച്ച് 10 ന്
മനാമ : ബഹ്‌റൈൻ ചേംബർ ഓഫ് കൊമേഴ്സ് ആന്റ് ഇൻഡസ്‌ട്രി (ബി.സി.സി.ഐ) ഡയറക്ടേഴ്സ് ബോർഡ് തെരഞ്ഞെടുപ്പ് മാർച്ച് 10 ന് ജുഫൈറിലെ ഇസ കൾച്ചറൽ സെന്ററിൽ നടക്കും. ബിസിസിഐ ബോർഡിന്റെ 29 ാമത് സെഷനിലേക്കാണ് തെരഞ്ഞെടുപ്പ് നടക്കുന്നത്. രാവിലെ 8 മണി മുതൽ രാത്രി 10 മണിവരെയാണ് വോട്ടെടുപ്പ്. ബി.സി.സി.ഐയുടെ ചരിത്രത്തിലെ ഏറ്റവും വലിയ തെരഞ്ഞെടുപ്പാകും ഇതവണത്തേതെന്ന് ചെയർമാൻ ഖാലിദ് അൽ മൊയ്‌ദ് പറഞ്ഞു.
ബി.സി.സി.ഐയിൽ രജിസ്റ്റർ ചെയ്തിട്ടുള്ള സ്ഥാപനങ്ങളുടെ എണ്ണം വർദ്ധിച്ചതിനാൽ, വോട്ടർമാരുടെ എണ്ണംഗണ്യമായി ഉയരുമെന്നാണ് പ്രതീക്ഷിക്കുന്നത്. ഈ വർഷം വോട്ടർമാരുടെ എണ്ണം 60,000 ആയിരിക്കുമെന്നാണ് സർവേ ഫലങ്ങൾ. മുൻ വർഷത്തേക്കാൾ വളരെ കൂടുതലാണിത്. 2013-ൽ ചേംബർ പുറപ്പെടുവിച്ച നിയമാവലിയിലെ ഓർഡർ നന്പർ (156) ആർട്ടിക്കിൾ നന്പർ (59) അനുസരിച്ചാകും തിരഞ്ഞെടുപ്പ് നടക്കുന്നതെന്നും ഖാലിദ് അൽ മൊയ്‌ദ് പറഞ്ഞു. വിജയകരവും സുഗമവുമായ തെരഞ്ഞെടുപ്പ് നടക്കുമെന്ന് പ്രതീക്ഷിക്കുന്നതായി പറഞ്ഞ അൽ മൊയ്‌ദ്, സുതാര്യവും നീതിയുക്തവുമായ തെരഞ്ഞെടുപ്പ് പ്രക്രിയയാകും നടക്കുന്നതെന്നും ഉറപ്പുനൽകി.
