ബഹ്റൈനിലെ ഖലീഫ ബിൻ സൽമാൻ തുറമുഖത്തിന് സമീപം വൻകരഭൂമി വീണ്ടെടുക്കൽ പദ്ധതി

പ്രദീപ് പുറവങ്കര

മനാമ: ബഹ്‌റൈനിലെ പ്രമുഖ സമുദ്ര കവാടങ്ങളിലൊന്നായ ഖലീഫ ബിൻ സൽമാൻ തുറമുഖത്തിന് സമീപമുള്ള വ്യവസായ, ലൊജിസ്റ്റിക്‌സ് മേഖല വൻതോതിൽ വികസിപ്പിക്കുന്നതിന്റെ ഭാഗമായി 1.129 ദശലക്ഷം ചതുരശ്ര മീറ്റർ കടൽഭൂമി വീണ്ടെടുക്കുന്നു. അവന്യൂ 13-ന് സമീപമുള്ള 1,129,100 ചതുരശ്ര മീറ്റർ പ്രദേശം നികത്തിയെടുക്കാൻ ഏകദേശം 9.665 ദശലക്ഷം ക്യുബിക് മീറ്റർ മണൽ ആവശ്യമായി വരുമെന്ന് തിങ്കളാഴ്ച വർക്സ് മന്ത്രാലയം തുറന്ന ടെൻഡറിൽ വ്യക്തമാക്കി.

സൽമാൻ ഇൻഡസ്ട്രിയൽ സിറ്റി, ബഹ്‌റൈൻ ലൊജിസ്റ്റിക്‌സ് സോൺ എന്നിവയുടെ വികസനത്തിന്റെ ഭാഗമായി വീണ്ടെടുക്കുന്ന ഭൂമിക്ക് ചുറ്റും കൽക്കെട്ടുകളും നിർമ്മിക്കും. പദ്ധതി പൂർത്തിയാകുന്നതോടെ സർവേ സർട്ടിഫിക്കറ്റിന്റെ അടിസ്ഥാനത്തിൽ പുതിയ ഭൂമിയുടെ ഒരു ഭാഗം വ്യവസായ വാണിജ്യ മന്ത്രാലയത്തിനും ബാക്കി ഭാഗം ഗതാഗത വാർത്താവിനിമയ മന്ത്രാലയത്തിനും കൈമാറും.

നിലവിലുള്ള ബഹ്‌റൈൻ ലൊജിസ്റ്റിക്‌സ് സോണിനേക്കാൾ വലിപ്പമുള്ളതാണ് ഈ പുതിയ പദ്ധതി പ്രദേശം. രണ്ട് മന്ത്രാലയങ്ങൾക്കായി ഭൂമി വിഭജിച്ചു നൽകുന്നതിലൂടെ തുറമുഖത്തിന് സമീപം വ്യവസായ, ലൊജിസ്റ്റിക്‌സ് ആവശ്യങ്ങൾക്ക് കൂടുതൽ സ്ഥലം ലഭ്യമാകും.

പദ്ധതിയുടെ എഞ്ചിനീയറിംഗ്, ക്വാണ്ടിറ്റി സർവേയിംഗ് കൺസൾട്ടൻസി കരാറിനായി അഞ്ച് പ്രമുഖ കമ്പനികളാണ് മത്സരരംഗത്തുള്ളത്. 778,580 ബഹ്‌റൈനി ദീനാർ ബിഡ് തുക സമർപ്പിച്ച ദാർ എസ്.എസ്.എച്ച് ഇന്റർനാഷണൽ എഞ്ചിനീയറിംഗ് കൺസൾട്ടന്റ്സാണ് ഏറ്റവും കുറഞ്ഞ തുക വാഗ്ദാനം ചെയ്തിരിക്കുന്നത്.

മറ്റു കമ്പനികളായ ഇകോം മിഡിൽ ഈസ്റ്റ് ലിമിറ്റഡ് 841,182 ദീനാറും, അൻസാരി എഞ്ചിനീയറിംഗ് സർവീസസ് 883,605 ദീനാറും, മില്ലറ്റ് എഞ്ചിനീയറിംഗ് ബ്യൂറോ 912,890 ദീനാറും ബിഡ് ചെയ്തു. ഏറ്റവും ഉയർന്ന തുകയായ 1,082,840 ദീനാർ വാഗ്ദാനം ചെയ്തത് അയേസ ബി.എൽ അയർലൻഡ് ഇന്റർനാഷണൽ ലിമിറ്റഡാണ്.

ലഭിച്ച അഞ്ച് അപേക്ഷകളും ബിഡ് ഓപ്പണിംഗ് ഘട്ടത്തിൽ സ്വീകരിച്ചിട്ടുണ്ട്. ഇനി സാങ്കേതിക, സാമ്പത്തിക മൂല്യനിർണ്ണയങ്ങൾക്ക് ശേഷമേ കരാർ ഉറപ്പിക്കൂ. ഏറ്റവും കുറഞ്ഞ തുക വാഗ്ദാനം ചെയ്യുന്ന കമ്പനിക്ക് കരാർ തനിയെ ലഭിക്കില്ലെന്ന് ടെൻഡർ ബോർഡ് വ്യക്തമാക്കി. 44 മാസത്തെ കാലാവധിയാണ് കൺസൾട്ടൻസി കരാറിനായി വർക്സ് മന്ത്രാലയം നിശ്ചയിച്ചിരിക്കുന്നത്.

വ്യവസായ ശാലകളും വെയർഹൗസുകളും തുറമുഖ അനുബന്ധ സ്ഥാപനങ്ങളും നിറഞ്ഞ പ്രദേശത്തേക്ക് വൻതോതിലുള്ള പുതിയ ഭൂമി കൂടി ലഭ്യമാക്കുന്നത് മേഖലയുടെ വളർച്ച വേഗത്തിലാക്കും. ഹിദ്ദ് ഇൻഡസ്ട്രിയൽ ഏരിയ, ബഹ്‌റൈൻ ഇന്റർനാഷണൽ ഇൻവെസ്റ്റ്‌മെന്റ് പാർക്ക് എന്നിവ ഉൾപ്പെടുന്നതാണ് സൽമാൻ ഇൻഡസ്ട്രിയൽ സിറ്റി.

വ്യവസായ നിക്ഷേപം വർദ്ധിപ്പിക്കുക, സപ്ലൈ ചെയിൻ ശക്തമാക്കുക, പ്രാദേശികമായി നിർമ്മിക്കുന്ന ഉൽപ്പന്നങ്ങളുടെ കയറ്റുമതി ഉയർത്തുക എന്നിവ ലക്ഷ്യമിടുന്ന 'ഇൻഡസ്ട്രിയൽ സെക്ടർ സ്ട്രാറ്റജി 2022-2026' പദ്ധതിയുമായി ഇത് പൂർണ്ണമായും ഒത്തുപോകുന്നു. അടുത്തിടെ 70 ദശലക്ഷം ദീനാർ ചെലവഴിക്കുന്ന ബഹ്‌റൈൻ ഷുഗർ റിഫൈനറിക്ക് ബഹ്‌റൈൻ ഇന്റർനാഷണൽ ഇൻവെസ്റ്റ്‌മെന്റ് പാർക്കിൽ 107,000 ചതുരശ്ര മീറ്റർ ഭൂമി അനുവദിച്ചിരുന്നു. പദ്ധതി പൂർത്തിയാകുന്നതോടെ ഫാക്ടറികൾക്കും വിതരണ കേന്ദ്രങ്ങൾക്കും കൂടുതൽ തൊഴിലവസരങ്ങൾക്കും വഴിയൊരുങ്ങും.