മേഖലയിലെ നയതന്ത്ര നീക്കങ്ങൾ ചർച്ച ചെയ്ത് ബഹ്റൈൻ മന്ത്രിസഭ

പ്രദീപ് പുറവങ്കര

മനാമ, ബഹ്‌റൈൻ — ബഹ്‌റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ അധ്യക്ഷതയിൽ ഗുദൈബിയ കൊട്ടാരത്തിൽ വാരാന്ത മന്ത്രിസഭ യോഗം ചേർന്നു. മേഖലയിലെ നയതന്ത്ര നീക്കങ്ങളും ആഭ്യന്തര വികസന റിപ്പോർട്ടുകളും യോഗം വിശദമായി വിലയിരുത്തി.

ഹമദ് ബിൻ ഈസ അൽ ഖലീഫ രാജാവും ഈജിപ്ഷ്യൻ പ്രസിഡന്റ് അബ്ദെൽ ഫത്താഹ് അൽ സിസിയും തമ്മിൽ അടുത്തിടെ നടന്ന കൂടിക്കാഴ്ചയെ മന്ത്രിസഭ പ്രശംസിച്ചു. ഇരു രാജ്യങ്ങളും തമ്മിലുള്ള ദൃഢമായ ഉഭയകക്ഷി ബന്ധത്തിന്റെ തെളിവാണിത്. പ്രാദേശികമായ സംഭവവികാസങ്ങളുടെ പശ്ചാത്തലത്തിൽ ഇരു രാജ്യങ്ങളും തമ്മിലുള്ള ആശയവിനിമയവും സഹകരണവും തുടരേണ്ടതിന്റെ ആവശ്യകത മന്ത്രിമാർ ഊന്നിപ്പറഞ്ഞു.

ഒക്ടോബർ 2 മുതൽ 4 വരെ മലേഷ്യയിലെ സെപാംഗ് സർക്യൂട്ടിൽ 'ഗുൾഫ് എയർ ബഹ്‌റൈൻ ഗ്രാൻഡ് പ്രി' സംഘടിപ്പിക്കുന്നതിൽ മലേഷ്യ നൽകുന്ന പിന്തുണയെ മന്ത്രിസഭ സ്വാഗതം ചെയ്തു. ഇതിനായി സഹകരിച്ച ഫോർമുല വൺ, എഫ്.ഐ.എ (FIA), ബഹ്‌റൈൻ ഇന്റർനാഷണൽ സർക്യൂട്ട്, സെപാംഗ് ഇന്റർനാഷണൽ സർക്യൂട്ട്, റേസിംഗ് ടീമുകൾ എന്നിവർക്ക് യോഗം നന്ദി അറിയിച്ചു.

ലോക മനുഷ്യക്കടത്ത് വിരുദ്ധ ദിനത്തോടനുബന്ധിച്ച്, മനുഷ്യക്കട തടയുന്നതിൽ ബഹ്‌റൈൻ നൽകുന്ന പ്രതിബദ്ധത മന്ത്രിസഭ ആവർത്തിച്ചു. ഈ രംഗത്ത് ആഭ്യന്തര മന്ത്രാലയം നടത്തുന്ന മികച്ച പ്രവർത്തനങ്ങളെ യോഗം പ്രത്യേകം അഭിനന്ദിച്ചു.

2025–2026 അധ്യയന വർഷത്തെ വിദ്യാഭ്യാസ പ്രകടന റിപ്പോർട്ട്, ബഹ്‌റൈന്റെ ഒന്നാം പാദ സാമ്പത്തിക അവലോകനം, അന്താരാഷ്ട്ര സംഘടനകൾക്കുള്ള സംഭാവനകൾ, ഫ്യൂച്ചർ ജനറേഷൻസ് റിസർവ് ഫണ്ടിന്റെ ഓഡിറ്റ് ചെയ്ത കണക്കുകൾ എന്നിവയുൾപ്പെടെ നിരവധി സുപ്രധാന റിപ്പോർട്ടുകൾക്ക് മന്ത്രിസഭ അംഗീകാരം നൽകി. പാർലമെന്ററി നിർദ്ദേശങ്ങളിന്മേലുള്ള മറുപടികളും യോഗം വിലയിരുത്തി.

ആഭ്യന്തര മന്ത്രിയുടെ സിറിയൻ സന്ദർശനം, യു.എൻ അർബൻ അജണ്ട റിവ്യൂവിലെ ബഹ്‌റൈന്റെ പങ്കാളിത്തം, ഓഗസ്റ്റിൽ നടക്കാനിരിക്കുന്ന വിദേശ മന്ത്രിതല സന്ദർശനങ്ങൾ എന്നിവയെക്കുറിച്ചും യോഗം അവലോകനം ചെയ്തു.