സൗദിയിലെ പെട്രോളിയം കേന്ദ്രങ്ങൾക്ക് നേരെ നടന്ന ഭീകരാക്രമണ ശ്രമത്തെ അപലപിച്ച് ബഹ്റൈൻ
പ്രദീപ് പുറവങ്കര
മനാമ, ബഹ്റൈൻ — സൗദി അറേബ്യയിലെ ഈസ്റ്റേൺ റീജിയണിലും റിയാദിലുമുള്ള പെട്രോളിയം കേന്ദ്രങ്ങൾ ലക്ഷ്യമിട്ട് ഇറാന്റെ പിന്തുണയുള്ള ഭീകര സംഘടനകൾ ഇറാഖിൽ നിന്ന് നടത്തിയ ഡ്രോൺ ആക്രമണ ശ്രമത്തെ ബഹ്റൈൻ ശക്തമായി അപലപിച്ചു.
രാജ്യാന്തര നിയമങ്ങളുടെയും യു.എൻ ചാപ്റ്ററിന്റെയും നഗ്നമായ ലംഘനമാണ് ഈ ആക്രമണമെന്ന് ബഹ്റൈൻ വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി. മേഖലയിലെ സുരക്ഷയ്ക്കും ഊർജ്ജ വിതരണത്തിനും സമാധാന ശ്രമങ്ങൾക്കും വലിയ ഭീഷണിയാണ് ഇത്തരം നീക്കങ്ങളെന്നും മന്ത്രാലയം ചൂണ്ടിക്കാട്ടി. രാജ്യത്തിന്റെ പരമാധികാരവും സുരക്ഷയും പ്രധാന ഇൻസ്റ്റലേഷനുകളും സംരക്ഷിക്കുന്നതിനായി സൗദി അറേബ്യ സ്വീകരിക്കുന്ന എല്ലാ നടപടികൾക്കും ബഹ്റൈൻ പൂർണ്ണ പിന്തുണ വാഗ്ദാനം ചെയ്തു.
ഭീകരരുടെ ഡ്രോണുകൾ ലക്ഷ്യസ്ഥാനങ്ങളിൽ എത്തുന്നതിന് മുൻപ് തന്നെ അവ കണ്ടെത്താനും തകർക്കാനും സൗദി വ്യോമസേന കാണിച്ച കാര്യക്ഷമതയെയും അതിവേഗ സജ്ജതയെയും ബഹ്റൈൻ വിദേശകാര്യ മന്ത്രാലയം പ്രശംസിച്ചു. സൗദി സേനയുടെ സമയബന്ധിതമായ ഇടപെടൽ കാരണം വലിയ അപകടങ്ങളും നാശനഷ്ടങ്ങളുമാണ് ഒഴിവായത്.
xcvxcv
