സൈക്കിൾ യാത്രക്കാരുടെ മരണത്തിനിടയാക്കിയ വാഹനാപകടം: പ്രതിയുടെ 7 വർഷത്തെ തടവുശിക്ഷ ശരിവെച്ച് ബഹ്റൈൻ അപ്പീൽ കോടതി
പ്രദീപ് പുറവങ്കര
മനാമ, ബഹ്റൈൻ — സലാഖ് ഹൈവേയിൽ രണ്ട് സൈക്കിൾ യാത്രക്കാരുടെ മരണത്തിനും മറ്റ് രണ്ടുപേർക്ക് പരിക്കേൽക്കാനും ഇടയാക്കിയ വാഹനാപകടക്കേസിൽ പ്രതിക്ക് വിധിച്ച ഏഴ് വർഷത്തെ തടവുശിക്ഷ ഫസ്റ്റ് ഹൈ ക്രിമിനൽ കോർട്ട് ഓഫ് അപ്പീൽ ശരിവെച്ചു.
വാഹനം ഓടിക്കുന്നതിനിടയിൽ ശ്രദ്ധ തിരിഞ്ഞതാണ് അപകടത്തിന് കാരണമായത്. വണ്ടി ഓടിക്കുന്നതിനിടെ താഴെ വീണ സിഗരറ്റ് എടുക്കാൻ ശ്രമിച്ചപ്പോഴാണ് 29-കാരനായ ഡ്രൈവർക്ക് വാഹനത്തിന്റെ നിയന്ത്രണം നഷ്ടപ്പെട്ടതെന്ന് കോടതി രേഖകൾ വ്യക്തമാക്കുന്നു. ഇതേതുടർന്ന് റോഡിലൂടെ പോവുകയായിരുന്ന 'ലാസ്പാഗ് സൈക്ലിംഗ് ഗ്രൂപ്പ്' അംഗങ്ങളുടെ മുകളിലേക്ക് വാഹനം ഇടിച്ചുകയറുകയായിരുന്നു.
2026 മാർച്ച് 21 ഈദുൽ ഫിത്തർ ദിനത്തിൽ രാവിലെ 5:55-ഓടെയായിരുന്നു ദാരുണമായ ഈ അപകടം നടന്നത്. അപകടത്തിൽ ഫിലിപ്പൈൻ സ്വദേശികളായ രണ്ട് സൈക്കിൾ യാത്രക്കാർ സംഭവസ്ഥലത്തുതന്നെ മരണപ്പെടുകയും മറ്റ് രണ്ടുപേർക്ക് ഗുരുതരമായി പരിക്കേൽക്കുകയും ചെയ്തു. പരിക്കേറ്റവരെ ഉടൻ തന്നെ ആശുപത്രിയിൽ പ്രവേശിപ്പിച്ചു. അപകടത്തിൽ വാഹനത്തിനും സൈക്കിളുകൾക്കും കേടുപാടുകൾ സംഭവിച്ചിട്ടുണ്ട്.
അപകടത്തിന് ശേഷം പരിക്കേറ്റവരെ സഹായിക്കാനോ അടിയന്തര സേനകളെ വിവരം അറിയിക്കാനോ നിൽക്കാതെ ഡ്രൈവർ സംഭവസ്ഥലത്തുനിന്ന് കടന്നുകളയുകയായിരുന്നു. എന്നാൽ അന്വേഷണ ഉദ്യോഗസ്ഥർ പ്രതിയെ വേഗത്തിൽ തിരിച്ചറിയുകയും അറസ്റ്റ് ചെയ്ത് വിചാരണയ്ക്കായി കോടതിയിൽ ഹാജരാക്കുകയുമായിരുന്നു.
അനുമതിയില്ലാതെ ലഹരിവസ്തുക്കൾ കൈവശം വെക്കുകയും ഉപയോഗിക്കുകയും ചെയ്യുക, അശ്രദ്ധമൂലം മരണവും പരിക്കുകളും ഉണ്ടാക്കുക, അപകടസ്ഥലത്തുനിന്ന് രക്ഷപ്പെടുക, അധികൃതരെ അറിയിക്കാതിരിക്കുക, പൊതുമുതൽ നശിപ്പിക്കുക, അശ്രദ്ധമായി വാഹനം ഓടിക്കുക തുടങ്ങിയ കുറ്റങ്ങളാണ് പബ്ലിക് പ്രോസിക്യൂഷൻ പ്രതിക്കെതിരെ ചുമത്തിയത്. കേസ് വിശദമായി പരിശോധിച്ച ശേഷമാണ് ലോവർ കോടതി വിധിച്ച ഏഴ് വർഷത്തെ തടവുശിക്ഷ അപ്പീൽ കോടതിയും ശരിവെച്ചത്.
sdsdf
