സൗജന്യ കൺസൾട്ടേഷനുകളുമായി "ലവ് യുവർ സ്കിൻ 2" സംഘടിപ്പിക്കുന്നു
പ്രദീപ് പുറവങ്കര
മനാമ: ഗവൺമെന്റ് ആശുപത്രികൾ എഡ്യൂക്കേഷൻ പ്ലസുമായി സഹകരിച്ച് "ലവ് യുവർ സ്കിൻ 2" എന്ന ബോധവൽക്കരണ പരിപാടി പ്രഖ്യാപിച്ചു. ഡെർമറ്റോളജി വിഭാഗം ഒന്നിച്ച് ചേർന്ന് നടത്തുന്ന ഈ പരിപാടി ജൂൺ 11 മുതൽ 13 വരെ മനാമയിലെ ആങ്കേഴ്സ് ഗാലേറിയ കോംപ്ലക്സിലാണ് സംഘടിപ്പിക്കുന്നത്. ചർമ്മത്തിന്റെ ആരോഗ്യ സംരക്ഷണത്തിന്റെ പ്രാധാന്യത്തെക്കുറിച്ച് പൊതുജനങ്ങളിൽ അവബോധം വളർത്തുന്നതിനും ഗവൺമെന്റ് ആശുപത്രികളിലെ ഡെർമറ്റോളജി വിഭാഗങ്ങൾ നൽകുന്ന പ്രത്യേക സേവനങ്ങൾ ജനങ്ങളിലേക്ക് എത്തിക്കുന്നതിനുമാണ് ഈ പരിപാടി ലക്ഷ്യമിടുന്നത്.
മേളയിലെത്തുന്ന സന്ദർശകർക്ക് വിദഗ്ധരായ ഡെർമറ്റോളജിസ്റ്റുകളിൽ നിന്ന് നേരിട്ട് മെഡിക്കൽ കൺസൾട്ടേഷനുകൾ സ്വീകരിക്കാവുന്നതാണ്. ചർമ്മം, മുടി, നഖം എന്നിവയുമായി ബന്ധപ്പെട്ട വിവിധ രോഗങ്ങളെക്കുറിച്ചുള്ള സംശയങ്ങൾക്ക് ഡോക്ടർമാർ മറുപടി നൽകും. അതോടൊപ്പം തന്നെ ഇത്തരം രോഗങ്ങൾ നേരത്തെ തന്നെ തിരിച്ചറിയേണ്ടതിന്റെയും കൃത്യമായ ചികിത്സ ഉറപ്പാക്കേണ്ടതിന്റെയും പ്രാധാന്യത്തെക്കുറിച്ച് ഇവർ പൊതുജനങ്ങൾക്ക് നിർദ്ദേശങ്ങൾ നൽകുകയും ചെയ്യും.
സോറിയാസിസ്, എക്സിമ, മുഖക്കുരു, അലർജികൾ, മുടികൊഴിച്ചിൽ, താരൻ, പിഗ്മെന്റേഷൻ തുടങ്ങിയ സാധാരണയായി കാണപ്പെടുന്ന ചർമ്മ രോഗങ്ങളെക്കുറിച്ചുള്ള ബോധവൽക്കരണ ക്ലാസുകളും ഇതിന്റെ ഭാഗമായി ഉണ്ടായിരിക്കും. വിവിധ ചർമ്മ രോഗങ്ങളെ തടയുന്നതിൽ വാക്സിനേഷനുകൾക്കുള്ള പങ്കിനെക്കുറിച്ചും, ചില പ്രത്യേക ചർമ്മ ആരോഗ്യ പ്രശ്നങ്ങളുമായി അവയ്ക്കുള്ള ബന്ധത്തെക്കുറിച്ചും സംഘാടകർ ഈ പരിപാടിയിലൂടെ ജനങ്ങളിലേക്ക് എത്തിക്കും.
xxvxgx
