ആരോഗ്യരംഗത്ത് ആയിരം വർഷത്തെ സേവനപ്പാരമ്പര്യം; 70 പ്രമുഖ നഴ്സുമാരെ ആദരിച്ച് ഇന്ത്യൻ ലേഡീസ് അസോസിയേഷൻ
പ്രദീപ് പുറവങ്കര
മനാമ: ബഹ്റൈനിലെ ജനങ്ങൾക്കായി തങ്ങൾ കാഴ്ച്ചവെച്ച 70 വർഷത്തെ സേവനങ്ങളുടെ പ്ലാറ്റിനം ജൂബിലി ആഘോഷങ്ങളുടെ ഭാഗമായി, ഇന്ത്യൻ ലേഡീസ് അസോസിയേഷൻ (ഐഎൽഎ) ബഹ്റൈൻ, രാജ്യത്തെ ആരോഗ്യ മേഖലയ്ക്ക് മികച്ച സംഭാവനകൾ നൽകിയ 70 പ്രമുഖ നഴ്സുമാരെ ആദരിച്ചു. ഇവരുടെ ആകെ സേവനകാലയളവ് 1,000 വർഷത്തിലേറെ വരും.
ബഹ്റൈൻ നഴ്സസ് ആൻഡ് മിഡ്വൈവ്സ് അസോസിയേഷൻ പ്രസിഡന്റ് സെഹാം ബുബ്ഷൈത് മുഖ്യാതിഥിയായും, ബഹ്റൈൻ മെഡിക്കൽ അസോസിയേഷൻ പ്രസിഡന്റും അൽ ഹിലാൽ ഹെൽത്ത് കെയർ ഗ്രൂപ്പ് ചീഫ് മെഡിക്കൽ ഓഫീസറുമായ ഡോ. ആമർ അൽ ദെറാസി വിശിഷ്ടാതിഥിയായും ചടങ്ങിൽ പങ്കെടുത്തു. ആരോഗ്യരംഗത്തെ പ്രമുഖർ, കമ്മ്യൂണിറ്റി പ്രതിനിധികൾ, മെഡിക്കൽ രംഗത്തുള്ളവർ, മാധ്യമപ്രവർത്തകർ, സ്പോൺസർമാർ, ആശംസകർ എന്നിവരും ചടങ്ങിൽ സന്നിഹിതരായിരുന്നു.
അസോസിയേഷന്റെ പ്ലാറ്റിനം ജൂബിലി വർഷത്തിന്റെ പ്രാധാന്യം എടുത്തുപറഞ്ഞ ഐഎൽഎ പ്രസിഡന്റ് സ്മിത ജെൻസൻ, ഇത് ഏഴ് പതിറ്റാണ്ടിന്റെ സേവനത്തിന്റെയും കമ്മ്യൂണിറ്റി സ്പിരിറ്റിന്റെയും ബഹ്റൈനിലെ ജനങ്ങളോടുള്ള പ്രതിബദ്ധതയുടെയും ആഘോഷമാണെന്ന് വിശേഷിപ്പിച്ചു. സേവനം, കാരുണ്യം, സമർപ്പണം എന്നിവയ്ക്ക് ജീവിതം കൊണ്ട് മാതൃകയായ വ്യക്തികളെ ആദരിക്കാനുള്ള അവസരമാണ് ഈ നാഴികക്കല്ല് സമ്മാനിച്ചതെന്നും അവർ കൂട്ടിച്ചേർത്തു.
അവാർഡ് ജേതാക്കളെ ബഹ്റൈനിലെ ആധുനിക കാലത്തെ "നൈറ്റിംഗേലുകൾ" എന്ന് വിശേഷിപ്പിച്ച മിസിസ് ജെൻസൻ, തലമുറകൾക്ക് മുമ്പ് ഫ്ലോറൻസ് നൈറ്റിംഗേലിന്റെ വിളക്ക് കാരുണ്യത്തോടെയുള്ള പരിചരണത്തിന്റെ പാത പ്രകാശിപ്പിച്ചപ്പോൾ, അതിന്റെ വെളിച്ചം സ്വാർത്ഥരഹിതമായ സേവനത്തിലൂടെ ഇന്ന് ആദരിക്കപ്പെടുന്ന നഴ്സുമാരിലൂടെ തുടർന്നും പ്രകാശിക്കുകയാണെന്ന് പറഞ്ഞു. വ്യത്യസ്ത പശ്ചാത്തലങ്ങളിൽ നിന്നുള്ള നഴ്സുമാരുടെ കൂട്ടായ സംഭാവനകൾ ബഹ്റൈന്റെ ആരോഗ്യ മേഖലയെ ശക്തിപ്പെടുത്തുകയും എണ്ണമറ്റ രോഗികളുടെയും കുടുംബങ്ങളുടെയും ജീവിതത്തെ സ്പർശിക്കുകയും ചെയ്തതിനെയാണ് ഈ അവാർഡ് അംഗീകരിക്കുന്നതെന്ന് അവർ കുറിച്ചു.
ബഹ്റൈനിലെ പ്രവാസി സമൂഹത്തിലെ ആദ്യകാല അംഗങ്ങളിൽ ഉൾപ്പെടുന്ന ഇന്ത്യൻ ഉപഭൂഖണ്ഡത്തിൽ നിന്നുള്ള നഴ്സുമാർ വഹിച്ച പയനിയറിംഗ് പങ്കിനെയും മിസിസ് ജെൻസൻ ചടങ്ങിൽ നന്ദിയോടെ സ്മരിച്ചു.
ബഹ്റൈനിലുടനീളമുള്ള നഴ്സുമാരിൽ നിന്ന് പരസ്യമായി നാമനിർദ്ദേശങ്ങൾ ക്ഷണിച്ചുകൊണ്ടാണ് ഈ പരിപാടിക്ക് തുടക്കം കുറിച്ചത്. ബഹ്റൈന്റെ ആരോഗ്യ പരിപാലന മേഖലയിൽ കുറഞ്ഞത് 25 വർഷത്തെ സേവന പരിചയമുള്ള നഴ്സുമാരിൽ നിന്നാണ് അർഹരായവരെ തിരഞ്ഞെടുത്തത്. ആദ്യം വരുന്നവർക്ക് ആദ്യം എന്ന മുൻഗണനാ ക്രമത്തിലാണ് നാമനിർദ്ദേശങ്ങൾ പരിഗണിച്ചത്. ആദരിക്കപ്പെട്ട 70 നഴ്സുമാർക്കും അവാർഡുകൾ സമ്മാനിച്ചതോടെ ചടങ്ങുകൾ സമാപിച്ചു.
dfssdf
