ജിസിസി ഗെയിംസിൽ ചരിത്ര നേട്ടവുമായി ബഹ്റൈൻ; 63 മെഡലുകളോടെ മൂന്നാം സ്ഥാനം
പ്രദീപ് പുറവങ്കര
മനാമ: ദോഹയിൽ സമാപിച്ച നാലാമത് ജിസിസി ഗെയിംസിൽ ചരിത്രത്തിലെ തന്നെ ഏറ്റവും മികച്ച പ്രകടനങ്ങളിലൊന്ന് പുറത്തെടുത്ത് ബഹ്റൈൻ. ടൂർണമെന്റിലുടനീളം മികച്ച മുന്നേറ്റം കാഴ്ചവെച്ച ബഹ്റൈൻ 25 സ്വർണ്ണവും 22 വെള്ളിയും 16 വെങ്കലവുമടക്കം ആകെ 63 മെഡലുകൾ കരസ്ഥമാക്കി മെഡൽ പട്ടികയിൽ മൂന്നാം സ്ഥാനത്ത് ഫിനിഷ് ചെയ്തു. മത്സരങ്ങൾ നടന്ന 17 കായിക ഇനങ്ങളിൽ 15 എണ്ണത്തിലും മെഡൽ നേടാൻ കഴിഞ്ഞത് ഗൾഫ് മേഖലയിലെ ശക്തമായ കായിക ശക്തിയെന്ന ബഹ്റൈന്റെ പദവി ഒരിക്കൽ കൂടി ഉറപ്പിക്കുന്നതായി.
മേയ് 11 മുതൽ 22 വരെ ഖത്തർ ആതിഥേയത്വം വഹിച്ച ഗെയിംസിൽ ആറ് ജിസിസി രാജ്യങ്ങളിൽ നിന്നുള്ള അത്ലറ്റുകളാണ് പങ്കെടുത്തത്. 12 ദിവസം നീണ്ടുനിന്ന ആവേശകരമായ പോരാട്ടങ്ങൾക്കൊടുവിൽ ദോഹയിലെ വിവിധ വേദികളിൽ വെച്ചാണ് മത്സരങ്ങൾ സമാപിച്ചത്. അന്തിമ പോയിന്റ് പട്ടിക പുറത്തുവന്നപ്പോൾ 134 മെഡലുകളോടെ ആതിഥേയരായ ഖത്തർ ചാമ്പ്യന്മാരായി. 82 മെഡലുകൾ നേടിയ സൗദി അറേബ്യ രണ്ടാം സ്ഥാനവും 63 മെഡലുകളോടെ ബഹ്റൈൻ മൂന്നാം സ്ഥാനവും നിലനിർത്തി. വലിയൊരു മെഡൽ കൊയ്ത്തുമായി മടങ്ങുന്ന ബഹ്റൈൻ അത്ലറ്റുകൾക്ക് രാജ്യത്തുടനീളം വലിയ രീതിയിലുള്ള അഭിനന്ദനങ്ങളാണ് ലഭിച്ചുകൊണ്ടിരിക്കുന്നത്.
dsfsdf
