കൊച്ചിൻ ഷിപ്പ്‌യാർഡിന്റെ പുതിയ പദ്ധതികൾക്ക് 6,000 കോടി രൂപയുടെ നിക്ഷേപം

ശാരിക

കൊച്ചി: കേരളത്തിന്റെ കപ്പൽ നിർമാണ മേഖലയ്ക്ക് വലിയ കുതിപ്പേകാൻ ലക്ഷ്യമിട്ട് കൊച്ചിൻ ഷിപ്പ്‌യാർഡ് ലിമിറ്റഡ് പുതിയ പദ്ധതികളുമായി രംഗത്ത്. കൊച്ചിയിലെ വല്ലാർപാടത്തും തമിഴ്‌നാട്ടിലെ തൂത്തുക്കുടിയിലുമായി ഏകദേശം 6,000 കോടി രൂപയുടെ വികസന പ്രവർത്തനങ്ങളാണ് കമ്പനി ആസൂത്രണം ചെയ്യുന്നത്. രാജ്യത്തിന്റെ കപ്പൽ നിർമാണ, അറ്റകുറ്റപ്പണി ശേഷി ഗണ്യമായി വർധിപ്പിക്കുക എന്നതാണ് ഈ പദ്ധതികളുടെ പ്രധാന ലക്ഷ്യം.

വല്ലാർപാടത്ത് പുതിയ സ്റ്റീൽ ബ്ലോക്ക് നിർമാണ യൂണിറ്റ് സ്ഥാപിക്കുന്നതിനായി 3,000 കോടി മുതൽ 4,000 കോടി രൂപ വരെയാണ് നിക്ഷേപിക്കാൻ ഉദ്ദേശിക്കുന്നത്. വൻകിട കപ്പലുകളുടെ നിർമാണത്തിന് ആവശ്യമായ സ്റ്റീൽ ഘടകങ്ങൾ കൂടുതൽ കാര്യക്ഷമമായി നിർമിക്കുകയാണ് ഇതിലൂടെ ലക്ഷ്യമിടുന്നത്. ഇതിനായി കൊച്ചിൻ പോർട്ടിൽ നിന്ന് ഏകദേശം 60 ഏക്കറും കേരള സർക്കാരിൽ നിന്ന് 18 ഏക്കറും ഉൾപ്പെടെ 78 ഏക്കറോളം ഭൂമി പാട്ടത്തിനെടുക്കാനാണ് കമ്പനിയുടെ തീരുമാനം. അടിസ്ഥാന സൗകര്യങ്ങൾ വിപുലീകരിക്കുന്നതിന്റെ ഭാഗമായാണ് വല്ലാർപാടത്ത് ഈ സംരംഭം വരുന്നത്.

ഇതിനുപുറമെ, തമിഴ്‌നാട്ടിലെ വി.ഒ. ചിദംബരനാർ തുറമുഖത്ത് കപ്പൽ നിർമാണത്തിനും അറ്റകുറ്റപ്പണികൾക്കുമായി പുതിയ യൂണിറ്റ് ആരംഭിക്കുന്നതും കമ്പനിയുടെ പരിഗണനയിലുണ്ട്. ഇതിനായി പ്രാഥമികമായി 1,500 കോടി മുതൽ 2,000 കോടി രൂപ വരെ നിക്ഷേപമാണ് പ്രതീക്ഷിക്കുന്നത്. വിശദമായ പദ്ധതി രേഖ തയ്യാറാക്കിയ ശേഷം മാത്രമേ അന്തിമ നിക്ഷേപ തുക സംബന്ധിച്ച് വ്യക്തത വരൂ.

നിലവിൽ കൊച്ചിൻ ഷിപ്പ്‌യാർഡിന്റെ ആകെ ഓർഡർ ബുക്ക് 22,300 കോടി രൂപയാണ്. ഇതിനുപുറമേ, ഇന്ത്യൻ നാവികസേനയ്ക്കായി അഞ്ച് പുതിയ ജനറേഷൻ സർവേ വെസലുകൾ നിർമിക്കുന്നതിനുള്ള 5,000 കോടി രൂപയുടെ കരാറിലും കമ്പനി ഏറ്റവും കുറഞ്ഞ നിരക്ക് ക്വോട്ട് ചെയ്തിട്ടുണ്ട്. ഔദ്യോഗിക കരാർ ഒപ്പിട്ടുകഴിയുമ്പോൾ കമ്പനിയുടെ ഓർഡർ ബുക്ക് ഏകദേശം 27,300 കോടി രൂപയായി ഉയരും. ഈ പദ്ധതികൾ പൂർത്തിയാകുന്നതോടെ ആഗോള കപ്പൽ നിർമാണ വിപണിയിൽ ഇന്ത്യയുടെ സ്ഥാനം കൂടുതൽ ദൃഢമാക്കാൻ കൊച്ചിൻ ഷിപ്പ്‌യാർഡിന് സാധിക്കും.

ഈ മുന്നേറ്റങ്ങൾക്കൊപ്പം, കൊച്ചിൻ ഷിപ്പ്‌യാർഡിന്റെ ഉപകമ്പനിയായ ഹൂഗ്ലി കൊച്ചിൻ ഷിപ്പ്‌യാർഡിനും പുതിയ നിർമാണ കരാർ ലഭിച്ചിട്ടുണ്ട്. ഹെറിറ്റേജ് റിവർ ജേർണീസ് പ്രൈവറ്റ് ലിമിറ്റഡിൽ നിന്ന് രണ്ട് ലക്ഷ്വറി റിവർ ക്രൂസ് വെസലുകൾ നിർമിക്കുന്നതിനുള്ള ഓർഡറാണ് ലഭിച്ചത്. 2025 ജൂണിൽ ലഭിച്ച മുൻ ഓർഡറിന്റെ തുടർച്ചയായാണ് ഈ പുതിയ കരാർ. കരാർ പ്രകാരമുള്ള വെസലുകൾ യഥാക്രമം 2029 ജൂണിലും 2030 ജൂണിലും കൈമാറുമെന്നാണ് പ്രതീക്ഷിക്കുന്നത്. ഏകദേശം 100 കോടി മുതൽ 250 കോടി രൂപ വരെയാണ് ഈ കരാറിന്റെ മൂല്യം എന്ന് റിപ്പോർട്ടുകൾ വ്യക്തമാക്കുന്നു.