ആരോഗ്യ ഇൻഷുറൻസ് സംവിധാനം; ബഹ്‌റൈനിൽ പ്രവാസികൾക്കും സന്ദർശകർക്കുമുള്ള ചികിത്സാ ഫീസ് പരിഷ്‌കരിക്കും
പ്രദീപ് പുറവങ്കര
മനാമ: ബഹ്‌റൈനിൽ ആരോഗ്യ ഇൻഷുറൻസ് സംവിധാനം പൂർണ്ണമായി നടപ്പിലാകുന്നതോടെ പ്രവാസികൾക്കും സന്ദർശകർക്കുമുള്ള ആരോഗ്യ സേവന ഫീസ് പുനഃപരിഷ്‌കരിക്കുമെന്ന് സർക്കാർ വ്യക്തമാക്കി. സേവനങ്ങളുടെ യഥാർത്ഥ ചെലവ്, ഗുണനിലവാരം, സുസ്ഥിരത എന്നിവ അടിസ്ഥാനമാക്കി പുതിയ നിരക്കുകൾ നടപ്പിലാക്കാനാണ് തീരുമാനം. വിദേശികൾക്കും സന്ദർശകർക്കും ആരോഗ്യ സേവന ഫീസ് വർദ്ധിപ്പിക്കണമെന്ന് ആവശ്യപ്പെട്ട് പാർലമെന്റിൽ അവതരിപ്പിച്ച അടിയന്തര നിർദ്ദേശത്തിന് മറുപടിയായാണ് പാർലമെന്റ്, ശൂറ കൗൺസിൽ കാര്യ മന്ത്രി ഘാനിം അൽ ബുഐനാൻ ഇക്കാര്യം വ്യക്തമാക്കിയത്.
നിർബന്ധിത ആരോഗ്യ ഇൻഷുറൻസ് നടപ്പിലാകുന്നതോടെ പ്രവാസികൾക്കും സന്ദർശകർക്കും ഇൻഷുറൻസ് പരിരക്ഷ നിർബന്ധമാകും. ഇൻഷുറൻസ് കമ്പനികൾ വഴിയാകും ഇതിനുള്ള പാക്കേജുകൾ ലഭ്യമാക്കുക. സന്ദർശക വിസകളിൽ ആരോഗ്യ ഇൻഷുറൻസ് ഫീസ് ഈടാക്കാനുള്ള നിർദ്ദേശത്തിന് ഇതിനകം അംഗീകാരം നൽകിയിട്ടുണ്ടെന്നും, ഇതുമായി ബന്ധപ്പെട്ട നടപടികൾ പുരോഗമിക്കുകയാണെന്നും മന്ത്രി അറിയിച്ചു. ആരോഗ്യ ഇൻഷുറൻസ് സംവിധാനം പൂർത്തിയാകുന്ന മുറയ്ക്ക്, നൽകപ്പെടുന്ന എല്ലാ ആരോഗ്യ സേവനങ്ങളും യഥാർത്ഥ ചെലവും ഗുണനിലവാരവും മുൻനിർത്തി പുനഃക്രമീകരിക്കുമെന്നും അദ്ദേഹം പറഞ്ഞു.
ഇതിനുപുറമേ, കായിക പരിശീലനം പൂർത്തിയാക്കിയ ബഹ്‌റൈനി ദന്തഡോക്ടർമാർക്ക് കൂടുതൽ തൊഴിലവസരങ്ങൾ നൽകുമെന്നും, തൊഴിൽരഹിതരായ മെഡിക്കൽ ബിരുദധാരികൾക്കായി പ്രത്യേക പരിശീലനങ്ങളും തംകീൻ പദ്ധതികളും നിലവിലുണ്ടെന്നും സർക്കാർ വ്യക്തമാക്കി. എന്നാൽ സൗദി ഗവർണറേറ്റിലെ പുതിയ ആരോഗ്യ കേന്ദ്രം, ഇബ്ൻ സിനാ ആരോഗ്യ കേന്ദ്രത്തിൽ റേഡിയോളജി ഡിപ്പാർട്ട്മെന്റ് എന്നിവ സ്ഥാപിക്കണമെന്ന ആവശ്യങ്ങൾ നിലവിലെ സൗകര്യങ്ങൾ പര്യാപ്തമാണെന്ന കാരണത്താൽ സർക്കാർ തള്ളി.
#HealthcareBahrain #HealthInsurance #BahrainNews #Expatriates #4PMNews
dsvdsds
