സൗദി അറേബ്യയിൽ ഇനി 'അണ്നോണ് കോൾസ്' ഇല്ല; പേരും ഐഡിയും ഡിസ്പ്ലെയില് തെളിയും, സംവിധാനം ഇന്ന് മുതൽ
റിയാദ്:
സൗദി അറേബ്യയിൽ ഫോണ് വിളിക്കുന്ന അജ്ഞാതരുടെ പേരും ഐഡന്റിറ്റിയും ഡിസ്പ്ലെയില് തെളിയുന്ന സംവിധാനം ഇന്ന് മുതല് നിലവില് വന്നു. രാജ്യത്ത് പ്രവര്ത്തിക്കുന്ന എല്ലാ മൊബൈല്, ലാന്റ് ഫോണ് നെറ്റ് വര്ക്കുകളും പുതിയ സംവിധാനത്തിന്റെ ഭാഗമായതായി സൗദി കമ്മ്യൂണിക്കേഷന്സ്, സ്പേസ് ആന്ഡ് ടെക്നോളജി കമ്മീഷന് വ്യക്തമാക്കി.
രാജ്യത്ത് നേരത്തെ പ്രഖ്യാപിച്ച സംവിധാനമാണ് ഇന്ന് മുതല് നിലവില് വന്നത്. മൊബൈല് ഫോണിലും ലാന്ഡ് ഫോണിലും നിന്ന് വിളിക്കുന്നവരുടെ പേരും ഐഡിയും സ്വീകര്ത്താവിന്റെ ഡിസ്പ്ലേയില് തെളിയുന്നതാണ് പുതിയ സംവിധാനം.
ഇതിനായി രാജ്യത്തെ എല്ലാ മൊബൈല് നെറ്റ്വര്ക്ക് കമ്പനികളും മുഴുവന് സിം ഉപഭോക്താക്കളുടെയും വിവരങ്ങള് ശേഖരിച്ചിരുന്നു. 2ജി, 3ജി, 4ജി, 5ജി എന്നിവയുള്പ്പെടെ എല്ലാ തരത്തിലുമുള്ള സാങ്കേതിക സേവനങ്ങളിലും ഇത് ലഭ്യമാണ്. രാജ്യത്തെ മൊബൈല് നെറ്റ്വര്ക്കുകളിൽ പ്രവര്ത്തിക്കുന്ന ടെര്മിനല് ഉപകരണങ്ങളില് കണക്റ്റുചെയ്തിരിക്കുന്ന എല്ലാ സിം ഉപയോക്താക്കളുടെയും പേര് പ്രദര്ശിപ്പിക്കുന്നതിനുള്ള സാങ്കേതികത ഉറപ്പാക്കിയതായി സൗദി കമ്മ്യൂണിക്കേഷന്സ്, സ്പേസ് ആന്ഡ് ടെക്നോളജി കമ്മീഷന് നേരത്തെ വ്യക്തമാക്കിയിരുന്നു.
അജ്ഞാത കോളുകള്ക്കും അതുവഴിയുള്ള തട്ടിപ്പുകള്ക്കും ഒരു പരിധി വരെ തടയിടാന് പുതിയ സംവിധാനം സഹായിക്കുമെന്നാണ് പ്രതീക്ഷിക്കുന്നത്. അനാവശ്യ കോളുകള് ഒഴിവാക്കാനും ഇത് ഉപകരിക്കും. ആധുനിക സാങ്കേതികവിദ്യകള് ഉപയോഗിച്ച് ഉപഭോക്താവിന് നല്കുന്ന സേവനങ്ങളുടെ കാര്യക്ഷമത വര്ധിപ്പിക്കുകയാണ് ഈ സ്പെസിഫിക്കേഷനിലൂടെ ലക്ഷ്യമിടുന്നതെന്ന് കമ്മ്യൂണിക്കേഷന്സ്, സ്പേസ് ആന്ഡ് ടെക്നോളജി കമ്മീഷന് അറിയിച്ചു.
a
