ഇറാന്റെ കടന്നുകയറ്റം; സൗദിയുടെ നേതൃത്വത്തിൽ അറബ്-ഇസ്ലാമിക രാജ്യങ്ങളുടെ അടിയന്തര യോഗം ചേർന്നു
പ്രദീപ് പുറവങ്കര
ഇറാൻ്റെ വർദ്ധിച്ചുവരുന്ന സൈനിക ആക്രമണങ്ങളെ പ്രതിരോധിക്കുന്നതിനും പ്രാദേശിക സുരക്ഷ ഉറപ്പാക്കുന്നതിനുമായി സൗദി അറേബ്യയുടെ നേതൃത്വത്തിൽ അറബ്-ഇസ്ലാമിക രാജ്യങ്ങളിലെ വിദേശകാര്യ മന്ത്രിമാരുടെ നിർണ്ണായക കൺസൾട്ടേറ്റീവ് യോഗം റിയാദിൽ ചേർന്നു. മിഡിൽ ഈസ്റ്റിലെ സംഘർഷാവസ്ഥ ലഘൂകരിക്കുന്നതിനും സമാധാനം പുനഃസ്ഥാപിക്കുന്നതിനുമുള്ള മാർഗങ്ങൾ ചർച്ച ചെയ്യാനാണ് സൗദി അറേബ്യ ഈ അടിയന്തര യോഗത്തിന് ആതിഥേയത്വം വഹിച്ചത്. ഗൾഫ് സഹകരണ കൗൺസിൽ (GCC) അംഗരാജ്യങ്ങൾ, അറബ് ലീഗ് പ്രതിനിധികൾ, നിലവിലെ സംഘർഷം നേരിട്ട് ബാധിച്ച ഓർഗനൈസേഷൻ ഓഫ് ഇസ്ലാമിക് കോപ്പറേഷൻ (OIC) രാജ്യങ്ങളിലെ വിദേശകാര്യ മന്ത്രിമാർ എന്നിവർ ചർച്ചയിൽ പങ്കെടുത്തു. സമാധാനം നിലനിർത്തുന്നതിനും മേഖലയിൽ കൂടുതൽ പ്രകോപനങ്ങൾ ഒഴിവാക്കുന്നതിനുമുള്ള അവസരമായാണ് ഈ യോഗത്തെ സൗദി വിദേശകാര്യ മന്ത്രാലയം വിശേഷിപ്പിച്ചത്. എന്നാൽ ചർച്ചകളുടെ അന്തിമ തീരുമാനങ്ങളെക്കുറിച്ചുള്ള ഔദ്യോഗിക വിവരങ്ങൾ മന്ത്രാലയം ഇതുവരെ പുറത്തുവിട്ടിട്ടില്ല.
അമേരിക്കൻ സൈനിക കേന്ദ്രങ്ങൾക്കും ഇസ്രായേലിനും പുറമെ യുഎഇ, ബഹ്റൈൻ, കുവൈറ്റ്, ഖത്തർ, സൗദി അറേബ്യ, ജോർദാൻ എന്നീ രാജ്യങ്ങളെ ലക്ഷ്യമിട്ടും ഇറാൻ അടുത്തിടെ മിസൈൽ ആക്രമണങ്ങൾ നടത്തിയിരുന്നു. തങ്ങളുടെ ശത്രുക്കളെ സഹായിക്കുന്നു എന്നാരോപിച്ചാണ് ഇറാൻ അയൽരാജ്യങ്ങളെ ലക്ഷ്യം വെക്കുന്നത്. ഇത്തരം ആക്രമണങ്ങൾ സിവിലിയൻ കേന്ദ്രങ്ങളിൽ നാശനഷ്ടങ്ങൾക്കും ആളപായത്തിനും കാരണമായിട്ടുണ്ട്. കൂടാതെ, വ്യോമപാതകൾ അടച്ചതും വ്യാപാര-ഗതാഗത മേഖലകളിലുണ്ടായ തടസ്സങ്ങളും ഗൾഫ് രാജ്യങ്ങളെ പ്രതിസന്ധിയിലാക്കിയിട്ടുണ്ട്. മേഖലയിലെ സുരക്ഷാ വെല്ലുവിളികൾ നേരിടാൻ സംയുക്തമായ നീക്കങ്ങൾക്കാണ് സൗദി അറേബ്യ ഇപ്പോൾ മുൻകൈ എടുക്കുന്നത്.
dsdfsdsf
