സ്കൂൾ തുറക്കൽ: സുരക്ഷയും ട്രാഫിക് നിയന്ത്രണവും ശക്തമാക്കാൻ ബഹ്റൈൻ സതേൺ ഗവർണറേറ്റ്

പ്രദീപ് പുറവങ്കര

മനാമ: വരാനിരിക്കുന്ന പുതിയ അക്കാദമിക് വർഷത്തിന് മുന്നോടിയായി വിദ്യാർത്ഥികളുടെ സുരക്ഷ ഉറപ്പാക്കുന്നതിനും ഗതാഗതക്കുരുക്ക് ലഘൂകരിക്കുന്നതിനുമുള്ള വൻ സുരക്ഷാ സജ്ജീകരണങ്ങളുമായി സതേൺ ഗവർണറേറ്റ്. സതേൺ ഗവർണർ എച്ച്.എച്ച്. ഷെയ്ഖ് ഖലീഫ ബിൻ അലി അൽ ഖലീഫയുടെ അധ്യക്ഷതയിൽ ചേർന്ന സെക്യൂരിറ്റി കമ്മിറ്റിയുടെ ഈ വർഷത്തെ എട്ടാമത് യോഗത്തിലാണ് സ്കൂൾ തുറക്കലുമായി ബന്ധപ്പെട്ട സുരക്ഷാ ക്രമീകരണങ്ങൾ പ്രധാന ചർച്ചാവിഷയമായത്.

സ്കൂളുകൾക്ക് സമീപം സുഗമമായ ഗതാഗതം ഉറപ്പാക്കുന്നതിനും വിദ്യാർത്ഥികളുടെ സുരക്ഷ മുൻനിർത്തി ട്രാഫിക് പട്രോളിംഗ് ശക്തമാക്കുന്നതിനും ജനറൽ ഡയറക്ടറേറ്റ് ഓഫ് ട്രാഫിക്കും സതേൺ ഗവർണറേറ്റ് പോലീസ് ഡയറക്ടറേറ്റും ചേർന്നൊരുക്കിയ പ്രത്യേക പദ്ധതികൾ യോഗം വിശദമായി അവലോകനം ചെയ്തു. പ്രധാന റോഡുകളിലും ദ്വിതീയ റോഡുകളിലും തടസ്സമില്ലാത്ത ഗതാഗത പ്രവാഹം നിലനിർത്തുന്നതിനൊപ്പം റോഡ് സുരക്ഷ സംബന്ധിച്ച് പൊതുജനങ്ങൾക്കിടയിൽ വിപുലമായ ബോധവൽക്കരണ പരിപാടികൾ നടപ്പിലാക്കാനും ഗവർണർ നിർദ്ദേശം നൽകി.

ഡെപ്യൂട്ടി ഗവർണർ ബ്രിഗേഡിയർ ഹമദ് മുഹമ്മദ് അൽ ഖയാത്ത്, സതേൺ ഗവർണറേറ്റ് പോലീസ് ഡയറക്ടറേറ്റ് ഡെപ്യൂട്ടി ഡയറക്ടർ ജനറൽ കേണൽ ഷെയ്ഖ് സൽമാൻ ബിൻ അഹമ്മദ് അൽ ഖലീഫ എന്നിവരുടെയും വിവിധ സുരക്ഷാ ഏജൻസി പ്രതിനിധികളുടെയും സാന്നിധ്യത്തിൽ ചേർന്ന യോഗത്തിൽ, വരാനിരിക്കുന്ന വിവിധ പൊതുപരിപാടികളുടെ സുരക്ഷാ മുന്നൊരുക്കങ്ങളും വിലയിരുത്തി. ജൂലൈ മാസത്തിലെ അടിയന്തര ഇടപെടലുകൾ സംബന്ധിച്ച് സിവിൽ ഡിഫൻസ് സമർപ്പിച്ച റിപ്പോർട്ടും, നിവാസികളിൽ നിന്ന് ലഭിച്ച സുരക്ഷാ സംബന്ധമായ പരാതികളിൽ കൈക്കൊണ്ട ദ്രുതനടപടികളും യോഗത്തിൽ ഗവർണർ പ്രശംസിച്ചു.

ആഭ്യന്തര മന്ത്രി ജനറൽ ഷെയ്ഖ് റാഷിദ് ബിൻ അബ്ദുള്ള അൽ ഖലീഫയുടെ മാർഗ്ഗനിർദ്ദേശപ്രകാരം കമ്മ്യൂണിറ്റി പങ്കാളിത്തം ഉറപ്പാക്കിക്കൊണ്ട് പ്രദേശത്തെ സുസ്ഥിരതയും നിലനിർത്താൻ സെക്യൂരിറ്റി കമ്മിറ്റി പൂർണ്ണ സജ്ജമാണെന്ന് ഷെയ്ഖ് ഖലീഫ വ്യക്തമാക്കി.