ഒമാൻ തീരത്ത് ഇന്ത്യൻ കപ്പലിന് നേരെ വ്യോമാക്രമണം; ഇന്ത്യൻ നാവികൻ കൊല്ലപ്പെട്ടു, 13 പേരെ രക്ഷപ്പെടുത്തി

ശാരിക

ഒമാൻ: ഒമാൻ തീരത്ത് വച്ച് 14 ഇന്ത്യൻ നാവികരുമായി സഞ്ചരിച്ച ഇന്ത്യൻ പതാക വഹിച്ച ചരക്ക് കപ്പലിന് നേരെ വ്യോമാക്രമണം ഉണ്ടായതായി കേന്ദ്ര ഷിപ്പിംഗ് മന്ത്രി സർബാനന്ദ സോണോവാൾ സ്ഥിരീകരിച്ചു. ആക്രമണത്തിൽ പരിക്കേറ്റ ഒരു ജീവനക്കാരൻ മരണപ്പെടുകയും ശേഷിക്കുന്ന 13 നാവികരെ ഒമാനി കോസ്റ്റ് ഗാർഡ് സുരക്ഷിതമായി ഒഴിപ്പിച്ചു രക്ഷപ്പെടുത്തുകയും ചെയ്തു.

ഗുജറാത്ത് സ്വദേശിയായ ഗാന്ധാർ നഹീം അസീസ് ആണ് കൊല്ലപ്പെട്ടത്. 'എം‌എസ്‌വി അൽ ജുസൂഫി' (MSV AL JUSUFI) എന്ന് പേരിട്ടിരിക്കുന്ന കപ്പൽ ഒമാൻ തീരത്തിന് സമീപം സഞ്ചരിക്കുമ്പോഴാണ് ദുരന്തമുണ്ടായത്. ഗുജറാത്തിലെ ജാംനഗർ/കച്ച് മേഖലയിലുള്ള സലായാ തുറമുഖത്ത് നിന്നുള്ള കപ്പലാണിത്.

മുസന്ദം / ലിമ തുറമുഖത്തിന് സമീപത്തുകൂടി കപ്പൽ സഞ്ചരിക്കുമ്പോൾ തിരിച്ചറിയാത്ത ഒരു വ്യോമവസ്തു (ഡ്രോൺ അല്ലെങ്കിൽ പ്രൊജക്റ്റൈൽ) വന്ന് പതിക്കുകയായിരുന്നു. അപകടത്തിൽപ്പെട്ട കപ്പലിലുണ്ടായിരുന്ന 14 ഇന്ത്യൻ ജീവനക്കാരിൽ 13 പേരെ ഒമാനി കോസ്റ്റ് ഗാർഡും ഒമാൻ റോയൽ നേവിയും ചേർന്ന് നടത്തിയ സംയുക്ത രക്ഷാപ്രവർത്തനത്തിലൂടെ സുരക്ഷിതമായി കരയിലെത്തിച്ചു.

മരിച്ച നാവികന്റെ കുടുംബത്തെ കേന്ദ്ര തുറമുഖ-ഷിപ്പിംഗ് മന്ത്രി സർബാനന്ദ സോണോവാൾ അനുശോചനം അറിയിച്ചു. "14 ഇന്ത്യൻ നാവികരുമായി സഞ്ചരിച്ച ഇന്ത്യൻ കപ്പലായ എം‌എസ്‌വി അൽ ജുസൂഫിക്ക് നേരെ ഒമാൻ തീരത്തിന് സമീപം വച്ച് തിരിച്ചറിയാത്ത ഒരു വ്യോമവസ്തു വന്ന് പതിക്കുകയായിരുന്നു. 13 ജീവനക്കാരെ സുരക്ഷിതമായി ഒഴിപ്പിക്കുകയും ഒമാൻ കോസ്റ്റ് ഗാർഡ് രക്ഷപ്പെടുത്തുകയും ചെയ്തു" എന്ന് അദ്ദേഹം എക്സിൽ കുറിച്ചു.

മസ്‌കറ്റിലെ ഇന്ത്യൻ എംബസിയും കേന്ദ്ര വിദേശകാര്യ മന്ത്രാലയവും ഒമാൻ അധികൃതരുമായി ചേർന്ന് രക്ഷപ്പെട്ട 13 പേർക്ക് ആവശ്യമായ എല്ലാ സഹായങ്ങളും നൽകാനും, കൊല്ലപ്പെട്ട നാവികന്റെ മൃതദേഹം നാട്ടിലെത്തിക്കാനുമുള്ള നടപടികൾ സ്വീകരിച്ചു വരികയാണ്.