ഗ്യാനേഷ് കുമാറിനെതിരെ പ്രതിപക്ഷ നീക്കം കടുക്കുന്നു: രാജ്യവ്യാപകമായി ഒപ്പുശേഖരണം ആരംഭിച്ചു
ശാരിക
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ പ്രതിപക്ഷം നിലപാട് കടുപ്പിക്കുന്നു. പ്രതിഷേധം ശക്തമാക്കുന്നതിന്റെ ഭാഗമായി പൊതുജനങ്ങളിൽ നിന്ന് വ്യാപകമായി ഒപ്പ് ശേഖരണം തുടങ്ങി. ഈ ഒപ്പുകൾ സഹിതം രാഷ്ട്രപതിക്ക് പരാതി നൽകാനാണ് പ്രതിപക്ഷത്തിന്റെ നീക്കം. അതേസമയം ഡൽഹിയിൽ പ്രതിഷേധം ശക്തമാകുമെന്ന സൂചനയെ തുടർന്ന് സുരക്ഷ ശക്തമാക്കിയിട്ടുണ്ട്. ഇതിന്റെ ഭാഗമായി ഡൽഹി പൊലീസിനെയും അർധസൈനിക വിഭാഗങ്ങളെയും ഉൾപ്പെടുത്തി പ്രത്യേക കോർഡിനേഷൻ കമ്മിറ്റി രൂപീകരിക്കും. ജന്തർമന്തർ ഉൾപ്പെടെയുള്ള നഗരത്തിന്റെ വിവിധ ഭാഗങ്ങളിൽ പ്രതിഷേധങ്ങൾ ശക്തമാകുമെന്ന വിലയിരുത്തലിലാണ് ഈ നീക്കം.
തെരഞ്ഞെടുപ്പ് കമ്മീഷൻ കഴിഞ്ഞ ദിവസം പുറത്തിറക്കിയ സംയുക്ത വാർത്താക്കുറിപ്പ് പ്രതിപക്ഷം പൂർണമായും തള്ളിക്കളഞ്ഞു. തങ്ങൾ ഉന്നയിച്ച പരാതികളും പുറത്തുവന്ന വിവരങ്ങളും ശരിവയ്ക്കുന്നതാണ് കമ്മീഷന്റെ വിശദീകരണമെന്ന് കോൺഗ്രസ് കുറ്റപ്പെടുത്തി. വിവാദത്തിന്റെ പശ്ചാത്തലത്തിൽ ദേശീയതലത്തിൽ പ്രതിപക്ഷ ഏകോപനം ശക്തമാക്കാനുള്ള തീവ്ര ശ്രമത്തിലാണ് സിപിഎം. ഇതിന്റെ ഭാഗമായി സിപിഎം നേതാവ് എം.എ.ബേബി ഇന്ന് അരവിന്ദ് കെജ്രിവാളുമായി കൂടിക്കാഴ്ച നടത്തും. എൻഡിഎ ഇതര കക്ഷികളെ അണിനിരത്തി ശക്തമായ സംയുക്ത പ്രതിപക്ഷ കൂട്ടായ്മ രൂപീകരിക്കുന്നതിനുള്ള ചർച്ചകളുടെ തുടർച്ചയായാണ് ഈ കൂടിക്കാഴ്ച.
assdsadsds
