കിലോഗ്രാമിന് 1.23 ലക്ഷം! സ്വർണത്തിളക്കത്തിൽ 'അശർഫി' ദീപാവലി മധുരവുമായി ജയ്പൂരിലെ മിഠായിക്കട

ഷീബ വിജയൻ

ജയ്പൂർ: രാജ്യത്ത് ദീപാവലി ആഘോഷങ്ങൾ കൊഴുക്കവെ, ജയ്പൂരിൽ നിന്നുള്ള ഒരു അപൂർവ്വ മധുരപലഹാരത്തിന്റെ വിശേഷങ്ങൾ സമൂഹമാധ്യമങ്ങളിൽ വലിയ ചർച്ചയാകുന്നു. ജയ്പൂർ ആസ്ഥാനമായുള്ള ഒരു പ്രശസ്തമായ മിഠായിക്കടയാണ് കിലോഗ്രാമിന് ഏകദേശം 1.23 ലക്ഷം രൂപ വിലവരുന്ന ഈ ആഡംബര മിഠായി പുറത്തിറക്കിയിരിക്കുന്നത്. സ്വർണനാണയത്തിന്റെ മാതൃകയിൽ തയാറാക്കിയ ഈ പലഹാരത്തിന് 'അശർഫി' എന്നാണ് പേരിട്ടിരിക്കുന്നത്. അറബിക് ഭാഷയിൽ സ്വർണനാണയം എന്നാണ് ഈ വാക്കിന്റെ അർത്ഥം.

തികച്ചും വ്യക്തിപരമായ ഒരു കാരണത്താലാണ് ഇങ്ങനെയൊരു ആശയം രൂപപ്പെട്ടത്. കടയുടെ സ്ഥാപകയായ സി.എ. അഞ്ജലി ജയ്ൻ തന്റെ മകന്റെ രോഗപ്രതിരോധശേഷി വർദ്ധിപ്പിക്കാനുള്ള വഴികൾ തേടുന്നതിനിടയിലാണ് ആയുർവേദത്തിലെ 'സ്വർണ ഭസ്മ'ത്തിന്റെ ആരോഗ്യ ഗുണങ്ങളെക്കുറിച്ച് മനസ്സിലാക്കുന്നത്. തുടർന്ന് ഇത് തങ്ങളുടെ ഭക്ഷണക്രമത്തിന്റെ ഭാഗമാക്കാൻ അവർ തീരുമാനിക്കുകയായിരുന്നു. വീട്ടിൽ തയാറാക്കിയ പായസത്തിലും ലഡ്ഡുവിലും പരീക്ഷിച്ച ഇതിന്റെ ഗുണഫലങ്ങൾ നേരിട്ടറിഞ്ഞതോടെയാണ് അവർ ഈ സംരംഭത്തിലേക്ക് തിരിഞ്ഞത്. മധുരപലഹാരങ്ങൾ ആരോഗ്യത്തിന് ഹാനികരമാണെന്ന പൊതുധാരണ മാറ്റിയെടുക്കുകയാണ് ഇതിലൂടെ ലക്ഷ്യമിടുന്നതെന്ന് അഞ്ജലി വ്യക്തമാക്കുന്നു.

സ്വർണത്തിന്റെ തിളക്കത്തിനപ്പുറം ഇതിലെ ചേരുവകളും ഏറെ പ്രത്യേകതകൾ നിറഞ്ഞതാണ്. ഈന്തപ്പഴത്തിന്റെ പരിപ്പ്, കുങ്കുമപ്പൂവ്, ശുദ്ധമായ തേൻ, ആയുർവേദ ഗുണങ്ങളുള്ള ശുദ്ധമായ സ്വർണ ഭസ്മം എന്നിവ ചേർത്താണ് ഇത് നിർമ്മിക്കുന്നത്. വെറും ഒമ്പത് ഗ്രാം മാത്രം ഭാരമുള്ള ഒരു ചെറിയ കഷണത്തിന് 1,111 രൂപയാണ് വില. ആ കണക്കുപ്രകാരമാണ് കിലോഗ്രാമിന് 1.23 ലക്ഷം രൂപയെന്ന വലിയ വിലയിലേക്ക് ഇത് എത്തുന്നത്. ദീപാവലിയെ കൂടുതൽ സ്പെഷ്യലാക്കാൻ ഈ സ്വർണ മിഠായിക്ക് പുറമെ പരമ്പരാഗത രത്നങ്ങളിൽ നിന്ന് പ്രചോദനം ഉൾക്കൊണ്ട് ഒമ്പത് വ്യത്യസ്ത തരത്തിലുള്ള 'കജു കത്ലി' ശേഖരവും ഈ കട വിപണിയിലെത്തിച്ചിട്ടുണ്ട്.