നിയമസഭാ തെരഞ്ഞെടുപ്പ്: കോൺഗ്രസ് എംപിമാർ മത്സരിക്കേണ്ടെന്ന് എഐസിസി; ഇളവുകൾക്ക് സാധ്യത കുറവ്
ഷീബ വിജയൻ
ന്യൂഡൽഹി: വരാനിരിക്കുന്ന നിയമസഭാ തെരഞ്ഞെടുപ്പിൽ കോൺഗ്രസ് എംപിമാർ മത്സരിക്കാൻ അനുമതി നൽകേണ്ടതില്ലെന്ന് എഐസിസി നേതൃത്വം തീരുമാനിച്ചതായി സൂചന. ഉപതെരഞ്ഞെടുപ്പ് ഭാരവും രാഷ്ട്രീയമായ പ്രത്യാഘാതങ്ങളും പരിഗണിച്ചാണ് ഇത്തരമൊരു നിലപാടിലേക്ക് ഹൈക്കമാൻഡ് എത്തിയത്. കേരളത്തിലെ ഭരണമാറ്റ സാധ്യത കണക്കിലെടുത്ത് ചില എംപിമാർ മത്സരിക്കാൻ താൽപ്പര്യം പ്രകടിപ്പിച്ചിരുന്നെങ്കിലും നിലവിലെ സാഹചര്യത്തിൽ അതിന് അനുമതി നൽകേണ്ടതില്ലെന്നാണ് വിലയിരുത്തൽ.
എംപിമാർ കൂട്ടത്തോടെ നിയമസഭയിലേക്ക് മത്സരിക്കുന്നത് ജനങ്ങൾക്കിടയിൽ തെറ്റായ സന്ദേശം നൽകുമെന്നും ഇത് എതിരാളികൾ ആയുധമാക്കുമെന്നും പാർട്ടിക്കുള്ളിൽ അഭിപ്രായമുണ്ട്. കൂടാതെ, എംപിമാർ ജയിച്ചാൽ നിരവധി ലോക്സഭാ മണ്ഡലങ്ങളിൽ ഉപതെരഞ്ഞെടുപ്പ് നടത്തേണ്ടി വരുന്നത് വലിയ സാമ്പത്തിക-രാഷ്ട്രീയ ബാധ്യതയുണ്ടാക്കും. തർക്കങ്ങൾ ഒഴിവാക്കാൻ ആർക്കും പ്രത്യേക ഇളവുകൾ നൽകേണ്ടതില്ലെന്നാണ് പ്രാഥമിക തീരുമാനം.
fggffgfg
