കർണാടക മുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ. ശിവകുമാറും കൂടിക്കാഴ്ച നടത്തി

ശാരിക / ബെംഗളൂരു

നേതൃത്വത്തെച്ചൊല്ലിയുള്ള കടുത്ത പോരാട്ടങ്ങൾക്കിടയിൽ, കർണാടക മുഖ്യമന്ത്രി സിദ്ധരാമയ്യയും അദ്ദേഹത്തിന്റെ ഉപമുഖ്യമന്ത്രിയും കർണാടക പ്രദേശ് കോൺഗ്രസ് കമ്മിറ്റി പ്രസിഡന്റുമായ ഡി.കെ. ശിവകുമാറും ബംഗളൂരുവിലെ മുഖ്യമന്ത്രിയുടെ ഔദ്യോഗിക വസതിയായ കാവേരിയിൽ വെച്ച് കൂടിക്കാഴ്ച നടത്തി.

ഇരുവരും തമ്മിലുള്ള അഭിപ്രായവ്യത്യാസങ്ങൾ പരിഹരിക്കുന്നതിനായി ചർച്ചകൾ നടത്താൻ കോൺഗ്രസ് ഹൈക്കമാൻഡ് ഫോൺ വിളിച്ച് നിർദ്ദേശിച്ചതിനെ തുടർന്നാണ് കൂടിക്കാഴ്ച നടന്നത്.

ശനിയാഴ്ച രാവിലെ 10 മണിയോടെ, നിയമോപദേഷ്ടാവും കോൺഗ്രസ് എം.എൽ.എയുമായ എ.എസ്. പൊന്നണ്ണയോടൊപ്പം എത്തിയ ശിവകുമാറിനെ സിദ്ധരാമയ്യ സ്വീകരിച്ചു. ഇരുവരും പ്രഭാത ഭക്ഷണം കഴിക്കുന്ന ചിത്രങ്ങൾ മുഖ്യമന്ത്രിയുടെ ഓഫീസ് പുറത്തുവിട്ടു.

ഏകദേശം 40 മിനിറ്റ് നീണ്ടുനിന്ന ഈ കൂടിക്കാഴ്ചയ്ക്ക് ഏറെ പ്രാധാന്യമുണ്ട്. സിദ്ധരാമയ്യ നേരത്തെ താൻ അഞ്ച് വർഷത്തെ മുഴുവൻ കാലാവധിയും മുഖ്യമന്ത്രിയായി തുടരുമെന്നും, എന്നാൽ ഹൈക്കമാൻഡ് എടുക്കുന്ന ഏത് തീരുമാനവും അംഗീകരിക്കുമെന്നും പ്രഖ്യാപിച്ചിരുന്നു.

എന്നാൽ സർക്കാരിന്റെ 2.5 വർഷത്തെ കാലാവധി നവംബർ 20, 2025-ന് പൂർത്തിയാകുമ്പോൾ അധികാരം തനിക്ക് കൈമാറണമെന്ന് ശിവകുമാർ ആവശ്യപ്പെട്ടിരുന്നു. ഇത്തരത്തിൽ ഇരു നേതാക്കളും തമ്മിൽ ഭിന്നത നിലനിൽക്കുന്ന സാഹചര്യത്തിലാണ് ഹൈക്കമാൻഡ് ഇത്തരത്തിൽ ഒരു കൂടിക്കാഴ്ചയ്ക്ക് നിർദ്ദേശം നൽകിയത്.

അതേസമയം മുഖ്യമന്ത്രി സിദ്ധരാമയ്യ, താനും ശിവകുമാറും തമ്മിൽ യാതൊരു അഭിപ്രായവ്യത്യാസവുമില്ലെന്ന് വ്യക്തമാക്കി. “ഞങ്ങൾക്ക് മുൻപും അഭിപ്രായവ്യത്യാസങ്ങൾ ഉണ്ടായിരുന്നില്ല, ഇപ്പോഴുമില്ല,” അദ്ദേഹം പറഞ്ഞു. താൻ വരും ദിവസങ്ങളിൽ മുഖ്യമന്ത്രിയെ ഉച്ചഭക്ഷണത്തിന് ആതിഥേയത്വം വഹിക്കുമെന്ന് ശിവകുമാർ അറിയിച്ചു. വരാനിരിക്കുന്ന നിയമസഭാ സമ്മേളനത്തിനായുള്ള തന്ത്രങ്ങൾ ഇരുവരും ചർച്ച ചെയ്തതായും അദ്ദേഹം കൂട്ടിച്ചേർത്തു. സംസ്ഥാനത്തെ നേതൃത്വ വിഷയത്തിൽ പാർട്ടി ഹൈക്കമാൻഡിൻ്റെ തീരുമാനത്തിനനുസരിച്ച് മുന്നോട്ട് പോകുമെന്ന് ശ്രീ. ശിവകുമാർ ആവർത്തിച്ചു.

സംസ്ഥാന നിയമസഭയുടെ ശീതകാല സമ്മേളനം ഡിസംബർ 8-ന് ബെളഗാവിയിൽ ആരംഭിക്കാനിരിക്കുകയാണ്. ഈ സാഹചര്യത്തിൽ, ഭരണപക്ഷത്ത് എല്ലാം സുഗമമാണെന്ന സന്ദേശം എതിരാളികളായ ബിജെപിക്കും ജെഡി(എസി)നും നൽകാൻ ഈ കൂടിക്കാഴ്ച ഉപകരിക്കും. അതോടൊപ്പം പാർട്ടിയുടെ താൽപ്പര്യങ്ങൾക്കനുസരിച്ച് ഉറച്ച തീരുമാനങ്ങൾ എടുക്കാൻ സമയം കണ്ടെത്താനും സഹായിക്കുമെന്നും പറയപ്പെടുന്നു.

അതേസമയം, മുഖ്യമന്ത്രിയുടെ സ്വന്തം ജില്ലയായ മൈസൂരുവിൽ,ശിവകുമാറിന്റെ അനുയായികളും അണികളും തങ്ങളുടെ നേതാവിന് ഉന്നത പദവി ആവശ്യപ്പെട്ട് റാലി നടത്തുന്നുണ്ട്.