ബഹ്‌റൈന്റെ പരമാധികാരം ലംഘിക്കുന്ന ഇറാന്റെ ശത്രുതാപരമായ നടപടികളെ ശക്തമായി അപലപിച്ച് മന്ത്രിസഭ

പ്രദീപ് പുറവങ്കര

മനാമ: കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫയുടെ അധ്യക്ഷതയിൽ ഗുദൈബിയ കൊട്ടാരത്തിൽ പ്രതിവാര മന്ത്രിസഭാ യോഗം ചേർന്നു. ബഹ്‌റൈൻ, മറ്റ് ജി.സി.സി രാജ്യങ്ങൾ, ജോർദാൻ എന്നിവയെ ലക്ഷ്യമിട്ട് ഇറാൻ തുടരുന്ന ശത്രുതാപരമായ നടപടികളെ യോഗം ശക്തമായി അപലപിച്ചു. ഈ ആക്രമണങ്ങൾ ബഹ്‌റൈന്റെ പരമാധികാരത്തിന്മേലുള്ള കടന്നുകയറ്റവും അന്താരാഷ്ട്ര നിയമങ്ങളുടെയും ഐക്യരാഷ്ട്ര സുരക്ഷാ കൗൺസിലിന്റെ പ്രമേയത്തിന്റെയും ലംഘനവുമാണെന്ന് മന്ത്രിസഭ വ്യക്തമാക്കി.

സാധാരണക്കാരെയും താമസക്കാരെയും അടിസ്ഥാന സൗകര്യങ്ങളെയും ലക്ഷ്യമിട്ടുള്ള ഇത്തരം ആക്രമണങ്ങൾ ബഹ്‌റൈന്റെ ദൃഢനിശ്ചയത്തെ ദുർബലപ്പെടുത്തില്ലെന്ന് മന്ത്രിസഭ അറിയിച്ചു. സ്വന്തം സുരക്ഷയും പ്രാദേശിക അഖണ്ഡതയും സംരക്ഷിക്കാൻ അന്താരാഷ്ട്ര നിയമപ്രകാരം രാജ്യത്തിനുള്ള അവകാശം യോഗം വീണ്ടും അടിവരയിട്ടു വ്യക്തമാക്കി. സമാനമായ ഭീഷണികൾ നേരിടുന്ന സഖ്യകക്ഷികളോട് പൂർണ്ണ ഐക്യദാർഢ്യം പ്രഖ്യാപിച്ച മന്ത്രിസഭ, അന്താരാഷ്ട്ര നിയമലംഘനങ്ങൾ തടയുന്നതിനും ഹോർമുസ് കടലിടുക്കിലൂടെയുള്ള സുരക്ഷിത ഗതാഗതം ഉൾപ്പെടെയുള്ള ആഗോള സമുദ്രപാതകളുടെ സുരക്ഷ ഉറപ്പാക്കുന്നതിനും അന്താരാഷ്ട്ര സമൂഹം ശക്തമായ നടപടികൾ സ്വീകരിക്കണമെന്ന് ആവശ്യപ്പെട്ടു. ദേശീയ സുരക്ഷ ഉറപ്പാക്കുന്നതിൽ ബഹ്‌റൈൻ ഡിഫൻസ് ഫോഴ്‌സ്, നാഷണൽ ഗാർഡ്, ആഭ്യന്തര മന്ത്രാലയം എന്നിവരുൾപ്പെടെയുള്ള എല്ലാ സൈനിക, സുരക്ഷാ, സിവിൽ വിഭാഗങ്ങളുടെയും സന്നദ്ധതയെയും സേവനങ്ങളെയും മന്ത്രിസഭ അഭിനന്ദിച്ചു.

ദേശീയ തൊഴിൽ വിപണി പദ്ധതിയുടെ (2023–2026) കീഴിലുള്ള ലക്ഷ്യങ്ങളിലെ പുരോഗതിയും യോഗം വിലയിരുത്തി. ഏറ്റവും പുതിയ കണക്കുകൾ പ്രകാരം തൊഴിൽ, പരിശീലന രംഗങ്ങളിൽ മികച്ച നേട്ടമാണ് കൈവരിക്കുന്നത്. 2026-ന്റെ രണ്ടാം പാദത്തോടെ, പ്രതിവർഷം 25,000 സ്വദേശികൾക്ക് തൊഴിൽ നൽകാനുള്ള ലക്ഷ്യത്തിന്റെ 43 ശതമാനവും പൂർത്തീകരിച്ചു. പുതുതായി തൊഴിൽ വിപണിയിലേക്ക് പ്രവേശിച്ച സ്വദേശികളുടെ എണ്ണം നിശ്ചയിച്ച 10,000 എന്ന ലക്ഷ്യത്തിന്റെ 33 ശതമാനത്തിലെത്തി. കൂടാതെ, 15,000 പേർക്ക് പരിശീലനം നൽകാനുള്ള പദ്ധതിയിൽ 40.5 ശതമാനം ആളുകൾ ഇതിനകം പങ്കാളികളായിക്കഴിഞ്ഞു.

പുതിയ വാണിജ്യ പ്രവർത്തനങ്ങൾക്കുള്ള അനുമതി, മുനിസിപ്പൽ പദ്ധതികൾക്കായുള്ള സാമ്പത്തിക വിഹിതം, ജി.സി.സി നിയമ-നീതിന്യായ സഹകരണത്തിനായുള്ള കരാർ കരടുകൾ എന്നിവയുൾപ്പെടെയുള്ള പ്രമുഖ തീരുമാനങ്ങൾക്ക് മന്ത്രിസഭ അംഗീകാരം നൽകി. ഒപ്പം, 2025–2026 അധ്യയന വർഷത്തിലെ 9, 12 ക്ലാസുകളിലെ ദേശീയ പരീക്ഷകളുടെയും വിദ്യാഭ്യാസ ഗുണനിലവാരത്തിന്റെയും റിപ്പോർട്ടുകളും യോഗം അവലോകനം ചെയ്തു.