നതാൻസ് ആണവനിലയത്തിന് നേരെ ആക്രമണം; റേഡിയോ ആക്ടീവ് ചോർച്ചയില്ലെന്ന് ഇറാൻ
പ്രദീപ് പുറവങ്കര
ടെഹ്റാൻ: ഇറാന്റെ പ്രധാന യുറേനിയം സമ്പുഷ്ടീകരണ കേന്ദ്രമായ നതാൻസിന് നേരെ അമേരിക്കയും ഇസ്രായേലും ഇന്ന് പുലർച്ചെ ആക്രമണം നടത്തിയതായി തസ്നീം വാർത്താ ഏജൻസി റിപ്പോർട്ട് ചെയ്തു. ആക്രമണത്തിന് പിന്നാലെ പ്രദേശത്ത് റേഡിയോ ആക്ടീവ് മലിനീകരണം പടരാനുള്ള സാധ്യതയെക്കുറിച്ച് രാജ്യത്തെ ന്യൂക്ലിയർ സേഫ്റ്റി സിസ്റ്റം സെന്റർ സാങ്കേതിക പരിശോധനകളും വിദഗ്ധ അന്വേഷണങ്ങളും നടത്തി. പരിശോധനാ ഫലങ്ങൾ പ്രകാരം ആണവനിലയത്തിൽ നിന്ന് റേഡിയോ ആക്ടീവ് പദാർത്ഥങ്ങളുടെ ചോർച്ച റിപ്പോർട്ട് ചെയ്തിട്ടില്ലെന്നും സമീപപ്രദേശങ്ങളിലെ താമസക്കാർക്ക് യാതൊരുവിധ ആരോഗ്യ ഭീഷണിയുമില്ലെന്നും അധികൃതർ വ്യക്തമാക്കി.
ഇറാന്റെ ആണവ പദ്ധതിയുടെ ഭാഗമായി 2002-ൽ പ്രഖ്യാപിക്കപ്പെട്ട നതാൻസ് നിലയം, പിന്നീട് ആണവ കരാറുമായി ബന്ധപ്പെട്ട അന്താരാഷ്ട്ര ചർച്ചകളുടെ കേന്ദ്രബിന്ദുവായി മാറിയിരുന്നു. വ്യോമാക്രമണങ്ങളെ പ്രതിരോധിക്കാൻ ശേഷിയുള്ള ഭൂഗർഭ സമ്പുഷ്ടീകരണ ഹാളുകളും ഉപരിതല സൗകര്യങ്ങളും ഉൾപ്പെടുന്നതാണ് ഈ സമുച്ചയം. അത്യാധുനിക ഐആർ-6 (IR-6) മോഡലുകൾ ഉൾപ്പെടെ ആയിരക്കണക്കിന് സെൻട്രിഫ്യൂജുകൾ ഇവിടെ പ്രവർത്തിക്കുന്നുണ്ട്.
2025 ജൂൺ 22-ന് 'മിഡ്നൈറ്റ് ഹാമർ' എന്ന പേരിൽ അമേരിക്ക ഇറാനിൽ നടത്തിയ വിപുലമായ ആക്രമണങ്ങളിലും നതാൻസ് പ്രധാന ലക്ഷ്യമായിരുന്നു. അന്ന് ബി-2 വിമാനങ്ങളിൽ നിന്നുള്ള ബങ്കർ ബസ്റ്റർ ബോംബുകളും അന്തർവാഹിനികളിൽ നിന്നുള്ള ടോമാഹോക്ക് മിസൈലുകളും ഉപയോഗിച്ചാണ് ഇവിടെ ബോംബാക്രമണം നടത്തിയത്. നതാൻസ് നിലയം പൂർണ്ണമായും നശിപ്പിക്കപ്പെട്ടുവെന്ന് അന്ന് അമേരിക്കൻ ഉദ്യോഗസ്ഥർ അവകാശപ്പെട്ടെങ്കിലും, നാശനഷ്ടങ്ങൾ ഗുരുതരമാണെന്നും എന്നാൽ ഇറാന്റെ ആണവ പദ്ധതി പൂർണ്ണമായി അവസാനിപ്പിക്കാൻ അതിനായില്ലെന്നുമാണ് പിന്നീട് പുറത്തുവന്ന വിലയിരുത്തലുകൾ സൂചിപ്പിക്കുന്നത്.
fdgdfg
