ഹോർമുസ് കടലിടുക്ക്: ജപ്പാൻ കപ്പലുകൾക്ക് സുരക്ഷിത പാത വാഗ്ദാനം ചെയ്ത് ഇറാൻ
പ്രദീപ് പുറവങ്കര
ഹോർമുസ് കടലിടുക്ക് വഴി ജപ്പാൻ്റെ കപ്പലുകൾക്ക് സുരക്ഷിത പാത ഒരുക്കാൻ തയ്യാറാണെന്ന് ഇറാൻ വിദേശകാര്യ മന്ത്രി അബ്ബാസ് അരാഖ്ചി. ആഗോള എണ്ണ വിതരണത്തിൻ്റെ പ്രധാന കേന്ദ്രമായ ഈ പ്രദേശം തുറന്നുകൊടുക്കുന്നത് സംബന്ധിച്ച് ജപ്പാൻ വിദേശകാര്യ മന്ത്രിയുമായി ചർച്ചകൾ തുടങ്ങിയതായി അദ്ദേഹം പറഞ്ഞു.
അമേരിക്കയും ഇസ്രായേലും ഇറാനുമായി നടത്തുന്ന യുദ്ധത്തെത്തുടർന്ന് നിലവിൽ ഈ പാത ഭാഗികമായി അടച്ചിരിക്കുകയാണ്. ജപ്പാൻ്റെ എണ്ണ ഇറക്കുമതിയുടെ 90 ശതമാനവും ഈ വഴിയിലൂടെയായതിനാൽ യുദ്ധം കാരണം എണ്ണവില കുതിച്ചുയരുകയും രാജ്യം പ്രതിസന്ധിയിലാവുകയും ചെയ്തിട്ടുണ്ട്. ജപ്പാൻ്റെ സഹായം തേടി പ്രധാനമന്ത്രി സനെയ് തകൈച്ചിയുമായി യുഎസ് പ്രസിഡൻ്റ് ഡൊണാൾഡ് ട്രംപ് കൂടിക്കാഴ്ച നടത്തിയിരുന്നു.
രണ്ടാം ലോകമഹായുദ്ധത്തിന് ശേഷമുള്ള ജപ്പാൻ്റെ ഭരണഘടന സൈനിക ഇടപെടലുകൾക്ക് നിയന്ത്രണം ഏർപ്പെടുത്തുന്നുണ്ടെങ്കിലും, 2015-ലെ സുരക്ഷാ നിയമപ്രകാരം രാജ്യത്തിൻ്റെ നിലനിൽപ്പിനെ ബാധിക്കുന്ന ഘട്ടത്തിൽ പരിമിതമായ സൈനിക നീക്കങ്ങൾക്ക് അനുവാദമുണ്ട്. എന്നാൽ ഇറാന്റെ വാഗ്ദാനത്തോട് പ്രതികരിക്കാൻ ജപ്പാൻ ഔദ്യോഗികമായി ഇതുവരെ തയ്യാറായിട്ടില്ല.
sdfsdf
