സംസ്ഥാനത്ത് സ്വർണവിലയിൽ വൻ ഇടിവ്; ഇന്ന് മാത്രം പവന് 4040 രൂപ കുറഞ്ഞു
ഷീബ വിജയൻ
പശ്ചിമേഷ്യൻ യുദ്ധവും അന്താരാഷ്ട്ര വിപണിയിലെ മാറ്റങ്ങളും സ്വർണവിലയിൽ വൻ ഇടിമുഴക്കമുണ്ടാക്കുന്നു. കേരളത്തിൽ ഇന്ന് മാത്രം സ്വർണവിലയിൽ 4040 രൂപയുടെ കുറവാണ് രേഖപ്പെടുത്തിയത്. ഉച്ചയ്ക്ക് ശേഷം പവന് 2000 രൂപ കൂടി കുറഞ്ഞതോടെ ഒരു പവൻ സ്വർണത്തിന്റെ വില 1,11,400 രൂപയായി താഴ്ന്നു. ഗ്രാമിന് 250 രൂപ കുറഞ്ഞ് 13,925 രൂപയിലാണ് നിലവിൽ വ്യാപാരം നടക്കുന്നത്.
രാവിലെ പവന് 2040 രൂപ കുറഞ്ഞതിന് പിന്നാലെയാണ് ഉച്ചയ്ക്ക് ശേഷവും വിലയിടിവ് തുടർന്നത്. ഈ മാസത്തെ ഏറ്റവും കുറഞ്ഞ നിരക്കാണിത്. ജനുവരി 29-ന് രേഖപ്പെടുത്തിയ പവന് 1,31,160 രൂപ എന്ന റെക്കോർഡ് വിലയിൽ നിന്നാണ് സ്വർണം ഇപ്പോൾ വലിയ തോതിൽ താഴേക്ക് പതിച്ചിരിക്കുന്നത്. ആഗോള വിപണിയിൽ ട്രോയ് ഔൺസിന് 5000 ഡോളറിന് താഴെ എത്തിയതും പശ്ചിമേഷ്യയിലെ സംഘർഷങ്ങൾക്കിടയിലെ വിപണിയിലെ മാറ്റങ്ങളുമാണ് വില കുറയാൻ കാരണമായത്. വരും ദിവസങ്ങളിലും വിപണിയിൽ വലിയ ചാഞ്ചാട്ടമുണ്ടാകാൻ സാധ്യതയുണ്ടെന്നാണ് സാമ്പത്തിക വിദഗ്ധരുടെ വിലയിരുത്തൽ.
hvhgffgfg
