അപ്പത്തിനും മുട്ടക്കറിക്കും അമിത വില ഈടാക്കിയ ഹോട്ടലിനെതിരെ കളക്ടർക്കു പരാതി നൽകി എംഎൽഎ
ഭക്ഷണത്തിന് അമിത വില ഈടാക്കിയ ഹോട്ടലിനെതിരെ ജില്ലാ കളക്ടർക്കു പരാതി നൽകി പി.പി. ചിത്തരഞ്ജൻ എംഎൽഎ. കണിച്ചുക്കുളങ്ങരയിലെ ഒരു ഹോട്ടലിൽനിന്നും അഞ്ച് അപ്പവും രണ്ട് മുട്ടക്കറിക്കും തന്നോട് 184 രൂപ ഈടാക്കിയെന്നാണ് എംഎൽഎയുടെ പരാതി. കനം കുറഞ്ഞ ഒരു അപ്പത്തിന് 15 രൂപയും ഒരു മുട്ടയ്ക്കും അൽപം ഗ്രേവിക്കും 50 രൂപയും ഹോട്ടൽ ഉടമ ഈടാക്കിയെന്നു ചിത്തരഞ്ജൻ ആരോപിക്കുന്നു.
താൻ കയറിയതു സ്റ്റാർ ഹോട്ടലിൽ അല്ലെന്നും എസി ഹോട്ടൽ എന്നു പറഞ്ഞിട്ട് എസി ഇല്ലായിരുന്നുവെന്നും ഹോട്ടലിൽ വിലവിവരപ്പട്ടിക ഇല്ലായിരുന്നുവെന്നും എംഎൽഎ പറഞ്ഞു.
ഹോട്ടലുകൾ അമിത വില ഈടാക്കുന്നതിനെതിരെ നടപടി സ്വീകരിക്കണമെന്നാണ് എംഎൽഎയുടെ ആവശ്യം. പരാതിയിന്മേൽ അന്വേഷിച്ച് റിപ്പോർട്ട് നൽകാൻ ജില്ലാ സിവിൽ സപ്ലൈസ് ഓഫീസർക്കു നിർദേശം നൽകിയതായി കളക്ടർ അറിയിച്ചു.
