സ്കൂൾ കായികമേളയിലെ അപകടം: ഗുരുതര വീഴ്ചയെന്ന് ഇൻ്റലിജൻസ്, ഉന്നതതല അന്വേഷണത്തിന് നിർദേശം

ഷീബ വിജയൻ

തൃശൂരിൽ നടക്കുന്ന സംസ്ഥാന സ്കൂൾ കായികമേളയ്ക്കിടെ നീന്തൽ മത്സരവേദിയുടെ താൽക്കാലിക മേൽക്കൂര തകർന്നുവീണ സംഭവത്തിൽ പൊതുവിദ്യാഭ്യാസ വകുപ്പ് അന്വേഷണം പ്രഖ്യാപിച്ചു. അക്വാട്ടിക് കോംപ്ലക്സിലെ ഷീറ്റുകൾ പതിച്ച് വിദ്യാർഥികൾ ഉൾപ്പെടെയുള്ളവർക്ക് പരിക്കേറ്റ സാഹചര്യത്തിലാണ് അടിയന്തര പ്രഖ്യാപനം. രണ്ടു ദിവസത്തിനകം സമഗ്രമായ റിപ്പോർട്ട് സമർപ്പിക്കാൻ പൊതുവിദ്യാഭ്യാസ ഡയറക്ടർക്ക് വിദ്യാഭ്യാസ മന്ത്രി എൻ. ഷംസുദ്ദീൻ നിർദേശം നൽകി.

സംഘാടകരുടെ ഭാഗത്തുനിന്ന് ഗുരുതരമായ വീഴ്ചയും നിരുത്തരവാദപരമായ സമീപനവും ഉണ്ടായിട്ടുണ്ടെന്ന് പൊലീസിന്റെ രഹസ്യാന്വേഷണ വിഭാഗം സമർപ്പിച്ച റിപ്പോർട്ടിൽ വ്യക്തമാക്കിയിട്ടുണ്ട്. യാതൊരു മുൻകരുതലുകളോ സുരക്ഷാ സജ്ജീകരണങ്ങളോ ഇല്ലാതെയാണ് മത്സരങ്ങൾ സംഘടിപ്പിച്ചതെന്ന് ഇൻ്റലിജൻസ് എഡിജിപിക്ക് നൽകിയ റിപ്പോർട്ടിൽ ചൂണ്ടിക്കാണിക്കുന്നു. പ്രതിപക്ഷ നേതാവ് പിണറായി വിജയൻ അടക്കമുള്ളവർ കായികമേള സംഘാടനത്തിലെ പോരായ്മകൾ ചൂണ്ടിക്കാട്ടി സർക്കാരിനെതിരെ രൂക്ഷമായ വിമർശനം ഉന്നയിച്ചിരുന്നു. ഇതിന് പിന്നാലെയാണ് അടിയന്തര അന്വേഷണത്തിന് ഉത്തരവിട്ടത്.

വരാനിരിക്കുന്ന റിപ്പോർട്ടിന്റെ അടിസ്ഥാനത്തിലായിരിക്കും തുടർനടപടികൾ. മഴയിലും കൊടുങ്കാറ്റിലും ഷീറ്റുകൾ പറന്നുവീണ് റിലേ മത്സരങ്ങളിൽ പങ്കെടുത്ത പത്തിലധികം കുട്ടികൾക്കാണ് പരിക്കേറ്റത്. ചില കായികതാരങ്ങൾക്ക് തലയ്ക്ക് ഗുരുതരമായി പരിക്കേറ്റിട്ടുണ്ട്. അപകട സമയത്ത് സംഘാടകർ ആരും തന്നെ സ്ഥലത്തില്ലായിരുന്നുവെന്നും പരിക്കേറ്റ കുട്ടികളെ ആശുപത്രിയിൽ എത്തിക്കാൻ പോലുമുള്ള പ്രാഥമിക സഹായം നൽകിയില്ലെന്നും രക്ഷിതാക്കൾ പരാതിപ്പെട്ടു. അടിസ്ഥാന സൗകര്യങ്ങളുടെയും സുരക്ഷയുടെയും കുറവ് ചൂണ്ടിക്കാട്ടി തുടക്കം മുതലേ പരാതികൾ ഉണ്ടായിരുന്നതായി അവർ വ്യക്തമാക്കുന്നു. താമസസൗകര്യമോ കുടിവെള്ളമോ ഭക്ഷണമോ കൃത്യമായി ലഭിച്ചില്ലെന്നും കായികതാരങ്ങൾ ഉന്നയിച്ചിരുന്നു. അപകടത്തിന് പിന്നാലെ യാതൊരു മുൻകൂട്ടി അറിയിപ്പുമില്ലാതെ മത്സരങ്ങൾ മാറ്റിവെച്ചതും വലിയ അമർഷത്തിന് ഇടയാക്കി.

കായികമേള നടക്കുന്നത് സംബന്ധിച്ച് പ്രാദേശിക പൊലീസിനെ പോലും സംഘാടകർ അറിയിച്ചിരുന്നില്ലെന്ന് പൊലീസിന്റെ റിപ്പോർട്ടിലുണ്ട്. ഇതോടൊപ്പം വിവിധ ജില്ലകളിൽ നിന്നുമെത്തിയ കുട്ടികൾക്ക് വെറും 150 രൂപ നൽകി വേഗത്തിൽ മടക്കി അയക്കാൻ ശ്രമിച്ചതായും, സുരക്ഷ ആവശ്യപ്പെട്ട രക്ഷിതാക്കളെ പുറത്താക്കാൻ നീക്കം നടന്നതായും ആരോപണമുണ്ട്. വാർത്ത ചിത്രീകരിക്കാനെത്തിയ മാധ്യമപ്രവർത്തകരെ തടയാൻ പൊലീസ് ശ്രമിച്ചത് പ്രതിഷേധത്തിനിടയാക്കിയിരുന്നു. സംഘാടനത്തിലെ വീഴ്ചകൾക്കെതിരെ അക്വാട്ടിക് കോംപ്ലക്സ് പരിസരത്ത് കടുത്ത പ്രതിഷേധവും തർക്കങ്ങളും നിലനിൽക്കുകയാണ്.