ഓണക്കാലത്തെ യാത്രാതിരക്ക് ഒഴിവാക്കാൻ സ്വകാര്യ ബസുകൾ വാടകയ്ക്കെടുക്കാൻ കെഎസ്ആർടിസി നീക്കം
ഷീബ വിജയൻ
കണ്ണൂർ: ഓണക്കാലത്തെ യാത്രാതിരക്ക് പരിഹരിക്കാൻ സ്വകാര്യ ബസുകൾ വാടകയ്ക്കെടുക്കാൻ കെഎസ്ആർടിസി ആലോചിക്കുന്നതായി ഗതാഗത മന്ത്രി സിപി ജോൺ. കെഎസ്ആർടിസിക്ക് സ്വന്തമായുള്ള ബസുകളുടെ കുറവ് മൂലമാണ് ഇത്തരമൊരു തീരുമാനത്തിലേക്ക് നീങ്ങുന്നതെന്ന് കണ്ണൂരിൽ മാധ്യമങ്ങളോട് സംസാരിക്കവെ അദ്ദേഹം പറഞ്ഞു.
കഴിഞ്ഞ ഒരു പതിറ്റാണ്ടായി കെഎസ്ആർടിസി പുതിയ ബസുകൾ വാങ്ങിയിട്ടില്ലെന്നും നിലവിൽ സർവീസ് നടത്തുന്ന പല ബസുകളും പഴക്കമേറിയെന്നും മന്ത്രി ചൂണ്ടിക്കാട്ടി. അതിനാൽ ഉത്സവകാലത്ത് ആവശ്യത്തിന് സർവീസുകൾ നടത്താൻ പ്രയാസമാണ്. കേരളത്തിന് പുറത്ത് പഠിക്കുകയും ജോലി ചെയ്യുകയും ചെയ്യുന്ന പതിനായിരക്കണക്കിന് ആളുകളാണ് ഓണത്തിന് നാട്ടിലേക്ക് മടങ്ങുന്നത്. ഈ സമയം സ്വകാര്യ മേഖലയിൽ ടിക്കറ്റ് നിരക്ക് രണ്ട് മുതൽ മൂന്ന് ഇരട്ടി വരെ ഉയർത്താറുണ്ട്. 1,500 രൂപയുള്ള ടിക്കറ്റുകൾക്ക് 3,000 മുതൽ 4,000 രൂപ വരെ ഈടാക്കുന്നതിനാൽ സാധാരണക്കാർക്ക് എസി ബസുകളിലെ യാത്ര ബുദ്ധിമുട്ടാകുന്നു.
മികച്ച നിലയിലുള്ള ബസുകൾ വാടകയ്ക്ക് ലഭ്യമാക്കാൻ സ്വകാര്യ ബസ് ഉടമകളോട് മന്ത്രി അഭ്യർഥിച്ചു. നല്ല രീതിയിൽ പരിപാലിക്കപ്പെടുന്ന ബസുകൾ നൽകുന്ന ഉടമകൾക്ക് അന്നന്നത്തെ വരുമാനം പങ്കുവെക്കാൻ കെഎസ്ആർടിസി തയ്യാറാണ്. കെഎസ്ആർടിസി നിലവിൽ സാമ്പത്തിക സ്ഥിരത കൈവരിച്ചിട്ടുണ്ടെന്നും നിലവിലെ ബാധ്യതകൾ കൃത്യമായി നിറവേറ്റുന്നുണ്ടെന്നും അതിനാൽ ബസ് ഉടമകൾ സഹകരിക്കാൻ മടിക്കരുതെന്നും മന്ത്രി വ്യക്തമാക്കി.
dfsdsfds
