കളിയിക്കാവിള കൊലപാതകം: രണ്ടാം പ്രതി സുനില്കുമാര് പിടിയില്
കളിയിക്കാവിള കൊലപാതക കേസിലെ രണ്ടാം പ്രതിയും സര്ജിക്കല് ഷോപ്പ് ഉടമയുമായ സുനില്കുമാര് പൊലീസിന്റെ പിടിയിൽ. തിരുവനന്തപുരം പാറശ്ശാലയില് നിന്നാണ് ഇയാളെ പൊലീസ് കസ്റ്റഡിയില് എടുത്തത്. മുംബൈയിലേക്ക് ഒളിവില് പോകാന് ശ്രമിക്കുന്നതിനിടെയാണ് സുനില്കുമാര് തമിഴ്നാട് പ്രത്യേക സംഘത്തിന്റെ പിടിയിലായത്. പ്രതി അമ്പിളിയുടെ സുഹൃത്താണ് സുനില്കുമാര്.
ആശുപത്രി ഉപകരണങ്ങളുടെ വിതരണക്കാരനായ സുനിലാണ് മുഖ്യപ്രതി ചൂഴാറ്റുകോട്ട അമ്പിളിക്ക് കൊല നടത്താനുള്ള സര്ജിക്കല് ബ്ലേഡ്, ക്ലോറോഫോം, കൈയുറകള്, കൊലക്കുശേഷം മാറ്റാനുള്ള വസ്ത്രങ്ങള് എന്നിവ എത്തിച്ചു നല്കിയിരുന്നത്. ജെസിബി വാങ്ങാന് കാറില് കരുതിയിരുന്ന പണം മാത്രം തട്ടി എടുക്കുകയാണോ പിന്നില് മറ്റെന്തെങ്കിലും ഉദ്ദേശം ഇവര്ക്ക് ഉണ്ടോ എന്നതാണ് അന്വേഷണം സംഘം പരിശോധിക്കുന്നത്. കൊലപാതകം സുനില്കുമാറും പ്രദീപ് ചന്ദ്രനും അമ്പിളിയും ചേര്ന്ന് ആസൂത്രണം ചെയ്ത് നടപ്പിലാക്കിയതാണെന്നാണ് പൊലീസ് പറയുന്നത്. കൊലപാതകത്തിനായി അമ്പിളിയെ കൊണ്ടുവിട്ടത് സുനില്കുമാറും പ്രദീപ് ചന്ദ്രനും കൂടിയാണ് എന്നും പൊലീസ് പറയുന്നു. ഇരുവരുടെയും നിര്ദേശപ്രകാരമാണോ അമ്പിളി കൊല നടത്തിയതെന്നാണ് പൊലീസ് പരിശോധിക്കുന്നത്.
ജൂണ് 24ന് രാത്രി 11 ഓട് കൂടി അമിത ശബ്ദത്തില് ഇരമ്പിച്ച് കൊണ്ട് റോഡരികില് നില്ക്കുന്നത് കണ്ട് കാര് നാട്ടുകാര് പരിശോധിച്ചപ്പോഴാണ് ഡ്രൈവിങ് സീറ്റില് കഴുത്ത് മുറിഞ്ഞ നിലയില് ദീപുവിന്റെ മൃതദേഹം കണ്ടത്. പുറകിലത്തെ സീറ്റില്നിന്ന് ഒരാള് ബാഗുമായി ഇറങ്ങിപ്പോകുന്ന സിസിടിവി ദൃശ്യങ്ങളും പൊലീസിനു ലഭിച്ചിരുന്നു.
dfsgdgdgdfdf
