പശ്ചിമേഷ്യയിൽ യുദ്ധം കനക്കുന്നു: ലബനനിൽ കൂട്ടപ്പലായനം, ഇസ്രായേലിൽ ഒൻപത് മരണം

പ്രദീപ് പുറവങ്കര I ബഹ്റൈൻ

ഇസ്രായേൽ-ഇറാൻ സംഘർഷം മൂന്നാം ദിവസത്തിലേക്ക് കടക്കുമ്പോൾ പശ്ചിമേഷ്യയിൽ സ്ഥിതിഗതികൾ അതീവ ഗുരുതരമായി തുടരുന്നു. യുഎസ്-ഇസ്രായേൽ സഖ്യം ഇറാനിൽ നടത്തുന്ന ആക്രമണങ്ങൾ ശക്തമായതോടെ മേഖലയാകെ യുദ്ധഭീതിയിലാണ്. കഴിഞ്ഞ ഏതാനും മണിക്കൂറുകൾക്കിടെ റിപ്പോർട്ട് ചെയ്ത പ്രധാന വിവരങ്ങൾ താഴെ നൽകുന്നു.

തെക്കൻ ലബനനിൽ ഇസ്രായേലും ഹിസ്ബുള്ളയും തമ്മിലുള്ള ഏറ്റുമുട്ടൽ രൂക്ഷമായ സാഹചര്യത്തിൽ 50-ലധികം ഗ്രാമങ്ങളിലെ താമസക്കാരോട് ഒഴിഞ്ഞുപോകാാൻ ഇസ്രായേൽ പ്രതിരോധ സേന (IDF) ഉത്തരവിട്ടു. ഇതേത്തുടർന്ന് ലബനനിൽ വലിയ രീതിയിലുള്ള ഗതാഗതക്കുരുക്കും കൂട്ടപ്പലായനവുമാണ് അനുഭവപ്പെടുന്നത്. ജനങ്ങൾ വീടുകളിൽ നിന്ന് കൂട്ടത്തോടെ പലായനം ചെയ്യുന്നത് സ്ഥിതിഗതികൾ അതീവ ദുസ്സഹമാക്കിയിട്ടുണ്ടെന്ന് പ്രദേശവാസികൾ പ്രതികരിച്ചു.

അതേസമയം, ഇറാൻ തൊടുത്തുവിട്ട മിസൈലുകൾ ഇസ്രായേലി നഗരമായ ബെയ്റ്റ് ഷെമേഷിൽ പതിച്ചു. ആക്രമണത്തിൽ ഒൻപത് പേർ കൊല്ലപ്പെട്ടതായി ഇസ്രായേൽ ആംബുലൻസ് സർവീസ് സ്ഥിരീകരിച്ചു. നിലവിലെ യുദ്ധം ആരംഭിച്ചതിനുശേഷം ഇസ്രായേലിന് നേരിടേണ്ടി വന്ന ഏറ്റവും വലിയ ആൾനാശമാണിത്.

സാമ്പത്തിക മേഖലയിലും ഈ സംഘർഷം കനത്ത ആഘാതമാണ് സൃഷ്ടിക്കുന്നത്. ഗൾഫ് രാജ്യങ്ങളിലെ വിമാനത്താവളങ്ങൾക്ക് നേരെ ഇറാൻ ആക്രമണം നടത്തിയതോടെ ഏഷ്യ-പസഫിക് മേഖലയിലെ എയർലൈൻ ഓഹരികൾ വൻതോതിൽ ഇടിഞ്ഞു. ഹോർമുസ് കടലിടുക്കിന് സമീപം കപ്പലുകൾക്ക് നേരെ ആക്രമണം ഉണ്ടായതിനെത്തുടർന്ന് ആഗോള വിപണിയിൽ എണ്ണവില കുത്തനെ വർധിച്ചു. ഇറാൻ തങ്ങളുടെ പരമാധികാരം ലംഘിച്ചതായി ഗൾഫ് സഹകരണ കൗൺസിൽ (GCC) അംഗങ്ങൾ ആരോപിച്ചിട്ടുണ്ട്.

അമേരിക്കൻ ഭരണകൂടത്തിനുള്ളിലും ഈ വിഷയത്തിൽ വിവിധ അഭിപ്രായങ്ങൾ ഉയരുന്നുണ്ട്. വൈറ്റ് ഹൗസിലെത്തിയ യുഎസ് പ്രസിഡന്റ് ഡൊണാൾഡ് ട്രംപ് ഇറാൻ വിഷയത്തിലുള്ള മാധ്യമപ്രവർത്തകരുടെ ചോദ്യങ്ങളോട് പ്രതികരിക്കാൻ തയ്യാറായില്ല. വൈസ് പ്രസിഡന്റ് ജെ.ഡി. വാൻസ് ഇതുവരെ യുഎസ് നടപടികളെ പരസ്യമായി പിന്തുണച്ചിട്ടില്ല എന്നതും ശ്രദ്ധേയമാണ്. അതേസമയം, യുഎസ് സ്റ്റേറ്റ് സെക്രട്ടറി മാർക്കോ റൂബിയോ ചൊവ്വാഴ്ച വൈകുന്നേരം സെനറ്റ് നേതാക്കളെ കണ്ട് സ്ഥിതിഗതികൾ വിശദീകരിക്കും.