ഇറാനുമായി സമഗ്ര കരാറിന് തയ്യാറെടുത്ത് അമേരിക്ക; രണ്ടാം ഘട്ട ചർച്ചകൾക്ക് ജെ.ഡി വാൻസ് നേതൃത്വം നൽകിയേക്കും

പ്രദീപ് പുറവങ്കര I അന്തർദേശീയം

അറ്റ്‌ലാന്റ: ഇറാനുമായുള്ള വെടിനിർത്തൽ കരാർ നിലനിൽക്കുന്ന പശ്ചാത്തലത്തിൽ, കൂടുതൽ സുപ്രധാനമായ നയതന്ത്ര ചർച്ചകളുമായി മുന്നോട്ട് പോകാൻ അമേരിക്കൻ ഭരണകൂടം തയ്യാറെടുക്കുന്നു. ജോർജിയ സർവകലാശാലയിൽ നടത്തിയ പ്രസംഗത്തിൽ വൈസ് പ്രസിഡന്റ് ജെ.ഡി വാൻസാണ് ഇക്കാര്യം വ്യക്തമാക്കിയത്. ഇറാനുമായി ഒരു ചെറിയ കരാറിലൊതുങ്ങാൻ പ്രസിഡന്റ് ഡൊണാൾഡ് ട്രംപ് ആഗ്രഹിക്കുന്നില്ലെന്നും, ഇറാൻ നടത്തുന്ന പ്രോക്സി ഗ്രൂപ്പുകളുടെ സാമ്പത്തിക സഹായം തടയുന്നതടക്കമുള്ള എല്ലാ വിഷയങ്ങളും ഉൾക്കൊള്ളുന്ന സമഗ്രമായ ഉടമ്പടിയാണ് ലക്ഷ്യമെന്നും വാൻസ് പറഞ്ഞു.

ഇറാനും അമേരിക്കയും തമ്മിൽ നിലനിൽക്കുന്ന വലിയ വിശ്വാസക്കുറവ് മൂലം പ്രശ്നങ്ങൾ വേഗത്തിൽ പരിഹരിക്കുക എളുപ്പമല്ലെന്ന് വാൻസ് ചൂണ്ടിക്കാട്ടി. ഇറാൻ ആണവായുധങ്ങൾ കൈവശം വെക്കുന്നില്ലെന്ന് ഉറപ്പാക്കാനാണ് നിലവിൽ ചർച്ചകൾ നടക്കുന്നത്. ഇറാൻ പാർലമെന്റ് സ്പീക്കർ മുഹമ്മദ് ബഖീർ ഖാലിബാഫ്, വിദേശകാര്യമന്ത്രി അബ്ബാസ് അരാഖ്ചി എന്നിവരുൾപ്പെട്ട ഇറാനിയൻ പ്രതിനിധി സംഘം കരാറിലെത്താൻ വലിയ താല്പര്യം കാണിക്കുന്നുണ്ടെന്നും അദ്ദേഹം കൂട്ടിച്ചേർത്തു. ഇറാൻ ഒരു സാധാരണ രാജ്യത്തെപ്പോലെ പെരുമാറാൻ തയ്യാറായാൽ, അമേരിക്ക അവരെ സാമ്പത്തികമായി സാധാരണ രാജ്യമായി പരിഗണിക്കുമെന്നും വാൻസ് വ്യക്തമാക്കി.

നിലവിലെ വെടിനിർത്തൽ കാലാവധി അടുത്ത ആഴ്ച അവസാനിക്കാനിരിക്കെ, ഇരു രാജ്യങ്ങളും തമ്മിൽ നേരിട്ടുള്ള രണ്ടാം ഘട്ട ചർച്ചകൾ നടന്നേക്കുമെന്ന് സി.എൻ.എൻ റിപ്പോർട്ട് ചെയ്യുന്നു. വൈസ് പ്രസിഡന്റ് ജെ.ഡി വാൻസ് തന്നെയായിരിക്കും ഈ ചർച്ചകൾക്ക് നേതൃത്വം നൽകുക. പ്രസിഡന്റ് ട്രംപിന്റെ പ്രത്യേക പ്രതിനിധി സ്റ്റീവ് വിറ്റ്‌കോഫ്, ജാറെഡ് കുഷ്നർ എന്നിവരും ഈ കൂടിക്കാഴ്ചയിൽ പങ്കെടുത്തേക്കും. കഴിഞ്ഞ ശനിയാഴ്ച നടന്ന 21 മണിക്കൂർ നീണ്ട മാരത്തൺ ചർച്ചകൾക്ക് ശേഷം ഇവർ ഇറാനിയൻ അധികൃതരുമായും മധ്യസ്ഥരുമായും നിരന്തരം സമ്പർക്കം പുലർത്തി വരികയാണ്.

രണ്ടാം ഘട്ട ചർച്ചകൾക്ക് തങ്ങൾ തയ്യാറാണെന്ന് ഇറാനിയൻ അധികൃതരും അറിയിച്ചിട്ടുണ്ട്. പുതിയ ഘട്ട ചർച്ചകൾ നടക്കുകയാണെങ്കിൽ അതിന് പാകിസ്ഥാൻ വേദിയായേക്കുമെന്നാണ് സൂചന. ചർച്ചകൾക്ക് ആതിഥേയത്വം വഹിക്കുന്ന കാര്യത്തിൽ പാകിസ്ഥാനായിരിക്കും മുൻഗണനയെന്ന് ഔദ്യോഗിക വൃത്തങ്ങളെ ഉദ്ധരിച്ച് പാകിസ്ഥാൻ മാധ്യമങ്ങൾ റിപ്പോർട്ട് ചെയ്തു.