മലയാളത്തിൽ തനിക്ക് വംശീയ വിവേചനം നേരിടേണ്ടി വന്നു: സാമുവൽ
സുഡാനി ഫ്രം നൈജീരിയയുടെ നിർമ്മാതാക്കൾക്കെതിരെ ഗുരുതര ആരോപണങ്ങളുമായി ചിത്രത്തിൽ സുഡുവിനെ അവതരിപ്പിച്ച ആഫ്രിക്കൻ താരം സാമുവൽ റോബിൻസൻ. പ്രേക്ഷകർ നിറഞ്ഞ മനസ്സോടെ സ്വീകരിച്ച ചിത്രത്തിലെ റോബിൻസന്റെ അഭിനയം മികച്ച നിലവാരം പുലർത്തിയിരുന്നു. കഴിഞ്ഞ ദിവസം കൊച്ചിയിൽ അണിയറ പ്രവർത്തകർക്കൊപ്പം ചിത്രത്തിന്റെ പ്രചരാണാർത്ഥം സംഘടിപ്പിച്ച വാർത്താസമ്മേളനത്തിൽ പങ്കെടുത്തശേഷം നാട്ടിലേയ്ക്ക് തിരിച്ചുപോയ സാമുവൽ ഫേസ്ബുക്ക് പോസ്റ്റിലൂടെയാണ് നിർമ്മാതാക്കൾക്കെതിരെ ഗുരതരമായ ആരോപണങ്ങൾ ഉന്നയിച്ചത്. സാമുവലിന്റെ പോസ്റ്റ് ഇങ്ങനെ.
“എല്ലാവർക്കും ഹായ്..... പ്രധാനപ്പെട്ടൊരു വിഷയം നിങ്ങളുടെ ശ്രദ്ധയിൽപ്പെടുത്താൻ ഞാൻ ആഗ്രഹിക്കുന്നു. സുഡാനി ഫ്രം നൈജീരിയയുടെ നിർമ്മാതാക്കളിൽനിന്നും എനിക്ക് വംശീയമായ വിവേചനം നേരിടേണ്ടി വന്നു എന്നതാണ് യാഥാർത്ഥ്യം. ഞാൻ ക്ഷമ കാട്ടിയതുകൊണ്ടാണ് ഇക്കാര്യങ്ങളൊന്നും നേരത്തെ പറയാതിരുന്നത്. ഇപ്പോൾഎല്ലാം തുറന്നു പറയുകയാണ്. നാളെ കറുത്ത വർഗ്ഗക്കാരനായ മറ്റൊരു യുവനടനും ഇതു സംഭവിക്കരുത് എന്നു കരുതിയാണ് ഞാൻ ഇക്കാര്യം ഇപ്പോൾപറയുന്നത്. ഞാൻ കേരളത്തിൽ വംശീയ വിവേചനത്തിന്റെ ഇരയായിരുന്നു. അത് നേരിട്ടൊരു ആക്രമണമോ അധിക്ഷേപമോ ആയിരുന്നില്ല. സുഡാനി ഫ്രം നൈജീരിയ എന്ന ചിത്രത്തിൽ അഭിനയിച്ചതിന്, എന്റെയത്ര പ്രശസ്തിയോ എന്റെ പകുതി കഴിവോ ഇല്ലാത്ത മറ്റ് ഇന്ത്യൻ താരങ്ങളേക്കാൾ എത്രയോ കുറഞ്ഞ പ്രതിഫലമാണ് എനിക്ക് നൽകിയത്. എന്റെ കഴിവും പ്രതിഭയും വെച്ചു നോക്കുകയാണെങ്കിൽ പകുതി പ്രതിഫലമാണ് എനിക്ക് നൽകിയത്. മറ്റ് യുവതാരങ്ങളുമായി പ്രതിഫലകാര്യം ചർച്ച ചെയ്തപ്പോൾ മാത്രമാണ് ഇക്കാര്യം എനിക്ക് മനസ്സിലായത്. ഞാൻ കറുത്തനിറക്കാരനായതുകൊണ്ടും ദരിദ്രരായ ആഫ്രിക്കകാർക്ക് പണത്തിന്റെ വിലയറിയില്ല എന്ന പൊതുധാരണയുള്ളതു കൊണ്ടുമാണ് ഇത്തരത്തിൽ സംഭവിച്ചതെന്ന് ഞാൻ കരുതുന്നു. ഇക്കാര്യത്തിൽചിത്രത്തിന്റെ രചനയും സംവിധാനവും നിർവ്വഹിച്ച സക്കറിയ എന്നെ പരമാവധി സഹായിക്കാൻ ശ്രമിച്ചിരുന്നു. സക്കറിയ സ്നേഹമുള്ളയാളും കഴിവുള്ള സംവിധായകനുമാണ്. എന്നാൽ, ചിത്രത്തിന് പണം ചിലവാക്കുന്നത് അദ്ദേഹമല്ലല്ലോ. അതുകൊണ്ട് തന്നെ അദ്ദേഹത്തിന് പരിമിതികളുണ്ടായിരുന്നു. ചിത്രം ഹിറ്റായാൽ മെച്ചപ്പെട്ട പ്രതിഫലം നൽകാമെന്നാണ് ഷൂട്ടിംഗ്് സമയത്ത് നിർമ്മാതാക്കൾ വാഗ്ദാനം ചെയ്തിരുന്നത്. പക്ഷേ ഒന്നും പാലിക്കപ്പെട്ടില്ല, ഞാനിപ്പോൾ നൈജീരിയയിൽ തിരിച്ചെത്തുകയും ചെയ്തു. ചിത്രത്തിന്റെ ഷൂട്ടിംഗും പ്രമോഷൻ പരിപാടികളുമായി കഴിഞ്ഞ ഒക്ടോബർ മുതൽ മാർച്ച് വരെയുള്ള അഞ്ചു മാസം എന്നെ കേരളത്തിൽതന്നെ പിടിച്ചു നിർത്താനുള്ള ലക്ഷ്യമായിരുന്നു ആ വാഗ്ദാനത്തിന് പിറകിലെന്നാണ് ഞാൻ ഇപ്പോൾ വിശ്വസിക്കുന്നത്.
പടം വൻവാണിജ്യ വിജയം നേടിക്കൊണ്ടിരിക്കുകയാണ്. ആരാധകർ നൽകിയ സ്നേഹത്തിന് അങ്ങേയറ്റത്തെ നന്ദിയുണ്ട്. ഇവിടുത്തെ ഊഷ്മളമായ സംസ്കാരം അനുഭവിക്കാനുള്ള സൗഭാഗ്യവും എനിക്കു ലഭിച്ചു. എന്നാൽ അടുത്ത തലമുറയിലെ കറുത്ത വർഗ്ഗക്കാരായ നടന്മാർക്കെങ്കിലും ഇത്തരത്തിലുള്ള അനുഭവങ്ങൾ ഉണ്ടാവാതിരിക്കാൻ, ഒരു കറുത്തവർഗ്ഗക്കാരൻ എന്ന നിലയിൽ എനിക്ക് പ്രതികരിച്ചേ പറ്റൂ. വംശീയവും ജാതീയവുമായ വിവേചനങ്ങൾക്കുമെതിരേ നമുക്ക് അരുതെന്ന് പറയാം. ഇത് പൂർണമായി പ്രസിദ്ധീകരിക്കാനുള്ള അവകാശം ഞാൻ മാധ്യമങ്ങൾക്ക് നൽകുന്നു.”
