നിർമാണമേഖലയിൽ ചരിത്രവിപ്ലവം; റോബോട്ടുകൾ നിർമിക്കുന്ന ലോകത്തിലെ ആദ്യ വില്ല ദുബൈയിൽ ഒരുങ്ങുന്നു
ഷീബ വിജയൻ
ദുബൈ: മനുഷ്യകരങ്ങൾക്ക് പകരം റോബോട്ടുകൾ മാത്രം ചേർന്ന് ഒരു കൂറ്റൻ വില്ല പണിയുന്നതിനെക്കുറിച്ച് ചിന്തിച്ചിട്ടുണ്ടോ? എങ്കിൽ ആ അത്ഭുതം യാഥാർത്ഥ്യമാക്കുകയാണ് ദുബൈ. നിർമാണ രംഗത്ത് വൻ സാങ്കേതിക വിപ്ലവം ലക്ഷ്യമിട്ട് റോബോട്ടിക് സാങ്കേതികവിദ്യ മാത്രം ഉപയോഗിച്ച് ലോകത്തിലെ ആദ്യത്തെ വില്ല നിർമിക്കുന്ന പദ്ധതിക്ക് ദുബൈ മുനിസിപ്പാലിറ്റി തുടക്കം കുറിച്ചു.
ലോകമെമ്പാടുമുള്ള 25-ലധികം പ്രമുഖ കമ്പനികളും പ്രാദേശിക-അന്തർദേശീയ സർവകലാശാലകളും ഗവേഷണ കേന്ദ്രങ്ങളും കൈകോർത്താണ് ഈ ആഗോള പ്രോജക്ട് നടപ്പിലാക്കുന്നത്. അത്യാധുനിക നിർമാണ രീതികളും സാങ്കേതികവിദ്യകളും ഈ കൂട്ടായ്മയിലൂടെ വികസിപ്പിച്ചെടുക്കും. ചുമരുകൾ കെട്ടുക, കോൺക്രീറ്റ് പ്രിന്റിങ്, വെൽഡിങ്, ഡ്രില്ലിംഗ്, നിർമാണ സാമഗ്രികൾ മാറ്റുക തുടങ്ങിയ സങ്കീർണമായ എല്ലാ ജോലികളും ഇനി റോബോട്ടുകൾ നിർവഹിക്കും. ഇതിലൂടെ നിർമാണ സമയം വൻതോതിൽ കുറയ്ക്കാനും ചെലവുകളും വസ്തുക്കളുടെ അപചയവും പരമാവധി ഒഴിവാക്കാനും സാധിക്കുമെന്ന് അധികൃതർ വ്യക്തമാക്കി.
വെറുമൊരു വില്ല നിർമാണത്തിനപ്പുറം, ഭാവിയിലെ റോബോട്ടിക് നിർമാണ സാങ്കേതികവിദ്യകൾ പരീക്ഷിക്കാനുള്ള ഒരു തത്സമയ ലാബായാണ് ദുബൈ മുനിസിപ്പാലിറ്റി ഇതിനെ വിഭാവനം ചെയ്യുന്നത്. മനോഹരമായ ലെയേർഡ് കോൺക്രീറ്റ് ഘടനകളും വലിയ ഗ്ലാസ് ജനലുകളും പൂന്തോട്ടവും അടങ്ങുന്ന അത്യാകർഷകമായ 3D-പ്രിന്റഡ് വില്ലയുടെ രൂപരേഖ അധികൃതർ പുറത്തുവിട്ടിട്ടുണ്ട്.
erweerewewr
