ആഭാസത്തിന് ഒടുവിൽ യു.എ സർട്ടിഫിക്കറ്റ്
നീണ്ട അവകാശപോരാട്ടങ്ങൾക്ക് ഒടുവിൽ സുരാജ് വെഞ്ഞാറമൂട്, റിമ കല്ലിങ്കൽ, ശീതൾ ശ്യാം എന്നിവരെ പ്രധാന കഥാപാത്രങ്ങളാക്കി നവാഗതനായ ജുബിത് നമ്രാഡത്ത് തിരക്കഥയെഴുതി സംവിധാനം ചെയ്യുന്ന ആഭാസം സിനിമയ്ക്ക് യു.എ സർട്ടിഫിക്കറ്റ്. ആദ്യ സെൻസർ സർട്ടിഫിക്കേഷൻ തിരുവനന്തപുരത്ത് നടന്നപ്പോൾ സിനിമയ്ക്ക് എ സർട്ടിഫിക്കറ്റ് ആയിരുന്നു. ഡയലോഗുകൾ മ്യൂട്ട് ചെയ്താൽ എ സർട്ടിഫിക്കറ്റ് തരാമെന്നാണ് ബോർഡ് അറിയിച്ചത്. എന്നാൽ അങ്ങനെയൊരു തീരുമാനത്തിന് ആഭാസം ടീം തയ്യാറല്ലായിരുന്നു. തുടർന്ന് ഡൽഹി ട്രൈബ്യൂണലിലാണ് സിനിമയ്ക്ക് യു.എ സർട്ടിഫിക്കറ്റ് നൽകാമെന്ന് ഉത്തരവായത്. സ്വാർത്ഥ താൽപ്പര്യങ്ങൾക്കായി സിനിമയെന്ന സൃഷ്ടിയെ കളങ്കപ്പെടുത്താൻ ശ്രമിക്കുന്നവർക്കെതിരെ ഇന്ന് ഞങ്ങൾ പട ജയിച്ചിരിക്കുകയാണെന്ന് ചിത്രത്തിന്റെ അണിയറപ്രവർത്തകർ പറയുന്നു.
