നിമിഷ ചാക്കോച്ചന്റെ നായിക
ദിലീഷ് പോത്തന്റെ തൊണ്ടിമുതലും ദൃക്സാക്ഷിയും എന്ന ചിത്രത്തിലെ നായിക നിമിഷ സജയൻ ഇനി കുഞ്ചാക്കോ ബോബനൊപ്പം. ടെലിവിഷൻ രംഗത്ത് സജീവമായ സൗമ്യ സദാനന്ദന്റെ ആദ്യ സംവിധാന സംരഭത്തിലാണ് ഇരുവരും ജോഡിയായെത്തുന്നത്. 'ഡേവിഡ് ആൻഡ് ഗോലിയാത്ത്' എന്ന ചിത്രത്തിലെ നായികയും സഹസംവിധായികയുമായിരുന്ന സൗമ്യ സദാനന്ദൻ 'ഓർമ്മയുണ്ടോ ഈ മുഖ'മുൾപ്പെടെ ഒട്ടേറെ ചിത്രങ്ങളിലഭിനയിച്ചിട്ടുമുണ്ട്. ചെന്പൈ വൈദ്യനാഥ ഭാഗവതരെക്കുറിച്ച് ചെന്പൈ മൈ ഡിസ്ക്കവറി ഓഫ് എ ലെജന്റ് എന്ന ഡോക്യുമെന്ററിയും സൗമ്യ സംവിധാനം ചെയ്തിട്ടുണ്ട്.
ഏറെ നാളത്തെ ഇടവേളയ്ക്ക് ശേഷം നടി മല്ലിക സുകുമാരൻ അഭിനയരംഗത്തേയ്ക്ക് തിരിച്ചെത്തുന്നു എന്ന പ്രത്യേകതയും ചിത്രത്തിനുണ്ട്. നവാഗതനായ സോണി മഠത്തിൽ തിരക്കഥ രചിക്കുന്ന ചിത്രത്തിന്റെ മറ്റ് അണിയറ പ്രവർത്തകരെയും നടീ നടന്മാരേയും ഉടൻ പ്രഖ്യാപിക്കും.


