ട്രംപിന് വീണ്ടും തലവേദനയായി ഇറാൻ; യു.എസ് തെരഞ്ഞെടുപ്പ് ഫലത്തിന് പിന്നാലെ നിലപാട് കടുപ്പിച്ച് തെഹ്റാൻ
ഷീബ വിജയൻ
അമേരിക്കൻ ഇടക്കാല തെരഞ്ഞെടുപ്പിൽ റിപ്പബ്ലിക്കൻ പാർട്ടിക്കുണ്ടായ തിരിച്ചടി പ്രസിഡന്റ് ഡോണാൾഡ് ട്രംപിന്റെ ഭരണരീതിക്കെതിരെയുള്ള ജനവിധിയാണെന്ന് വിലയിരുത്തി ഇറാൻ നിലപാട് കടുപ്പിക്കുന്നു. അമേരിക്കയെ ചർച്ചാമേശയിലേക്ക് കൊണ്ടുവരാനായി യുദ്ധം വ്യാപിപ്പിക്കാനും ഹുർമുസ് കടലിടുക്കിൽ ടാങ്കറുകൾക്ക് നേരെ ആക്രമണം ശക്തമാക്കാനും ഇറാൻ പദ്ധതിയിടുന്നതായി ‘ന്യൂയോർക്ക് ടൈംസ്’ റിപ്പോർട്ട് ചെയ്യുന്നു. ട്രാൻസിറ്റ് ഫീസ് നൽകാത്ത കപ്പലുകളെ ലക്ഷ്യമിട്ട് കടലിടുക്ക് അടച്ചുപൂട്ടുന്നതിലൂടെ അമേരിക്കൻ വോട്ടർമാരെ സാമ്പത്തിക സമ്മർദ്ദത്തിലാക്കാൻ കഴിഞ്ഞെന്നാണ് ഇറാന്റെ കണക്കുകൂട്ടൽ.
ഇറാനുമായുള്ള യുദ്ധം അവസാനിപ്പിക്കാൻ സ്വന്തം പാർട്ടിയിൽ നിന്നും വോട്ടർമാരിൽ നിന്നും ട്രംപ് കടുത്ത സമ്മർദ്ദം നേരിടുന്നുണ്ടെന്ന് തെഹ്റാൻ കരുതുന്നു. എങ്കിലും മരവിപ്പിച്ച ബില്യൺ കണക്കിന് ഡോളറിന്റെ ആസ്തികൾ വിട്ടുനൽകിയാൽ കരാറിന് ഇറാൻ ഇപ്പോഴും തയ്യാറാണ്. എന്നാൽ ഉപരോധങ്ങളിൽ ഇളവും അറബ് രാജ്യങ്ങളിൽ നിന്ന് പണവും ലഭിച്ചാൽ മാത്രമേ കപ്പലുകൾ കടത്തിവിടൂ എന്ന് ഇറാനും, ആക്രമണം നിർത്തിയാലേ ഉപരോധം നീക്കൂ എന്ന് അമേരിക്കയും നിലപാടെടുത്തതോടെ ചർച്ചകൾ വഴിമുട്ടിയിരിക്കുകയാണ്. ഉപരോധങ്ങൾ ഇറാനെ കടുത്ത സാമ്പത്തിക പ്രതിസന്ധിയിലാക്കിയിട്ടുണ്ടെങ്കിലും ട്രംപ് ഭരണകൂടത്തിന് മേൽ തങ്ങൾക്ക് സ്വാധീനമുണ്ടെന്ന് ഇറാൻ വിശ്വസിക്കുന്നു.
യുദ്ധമാണ് തെരഞ്ഞെടുപ്പ് തോൽവിക്ക് കാരണമെന്ന് വൈസ് പ്രസിഡന്റ് ജെ.ഡി. വാൻസ് പറഞ്ഞതിനെത്തുടർന്ന് ട്രംപ് അദ്ദേഹത്തെ നയതന്ത്ര സംഘത്തിൽ നിന്ന് ഒഴിവാക്കിയത് വൈറ്റ് ഹൗസിലെ ഭിന്നതയായാണ് ഇറാൻ കാണുന്നത്. കരാറിന് ശ്രമിക്കുക, ആക്രമണം പുനരാരംഭിക്കുക, അല്ലെങ്കിൽ സൈന്യത്തെ പിൻവലിക്കുക എന്നീ വഴികളാണ് നിലവിൽ ട്രംപിന് മുന്നിലുള്ളത്. പ്രാദേശിക രാജ്യങ്ങളുടെ മധ്യസ്ഥതയിൽ അനൗദ്യോഗിക ചർച്ചകൾ ഇപ്പോഴും തുടരുന്നുണ്ട്.
adsdsaadsasd


