ബഹ്റൈനിൽ മയക്കുമരുന്ന് വിറ്റതിന് വിദേശിക്ക് അഞ്ച് വർഷം തടവ്
മനാമ: രാജ്യത്ത് മയക്കുമരുന്ന് വിറ്റഴിച്ചതിന് ഇന്നലെ ഹൈ ക്രിമിനൽ കോടതി ഒരു വിദേശിക്ക് അഞ്ച് വർഷം തടവും, ഇയാളുടെ ബഹ്റൈനിലെ ഡീലർക്ക് മൂന്ന് വർഷം തടവും ശിക്ഷ വിധിച്ചു. തടവ് കൂടാതെ നൈജീരിയൻ പൗരനായ പ്രതിക്ക് 3000 ബഹ്റൈൻ ദിനാർ പിഴയും, ബഹ്റൈനി സ്വദേശിക്ക് 500 ദിനാർ പിഴയും കോടതി വിധിച്ചു. വിധി പൂർത്തിയാക്കിയതിനുശേഷം ആദ്യപ്രതിയെ നാടുകടത്തുകയും ചെയ്യും. ഷാബു എന്നറിയപ്പെടുന്ന മീതാംഫീറ്റമീൻ, 25000 ബഹ്റൈൻ ദിനാറിനാണ് ബഹ്റൈനിലെ ഡീലർക്ക് വിദേശി നൽകിയിരുന്നത്.
തലസ്ഥാന നഗരിയിലെ ഒരു ഹോട്ടലിൽ സെക്യൂരിറ്റി ഗാർഡായി ജോലി ചെയ്യുകയായിരുന്ന ബഹ്റൈൻ സ്വദേശിയുടെ ആർഭാട ജീവിത ശൈലി ശ്രദ്ധയിൽ പെട്ടതോടെയാണ് ഇയാൾ പോലീസിന്റെ നിരീക്ഷണത്തിലായത്. ആന്റി നർക്കോട്ടിക്സ് പോലീസുകാർ 1,600 ദിനാറിന്റെ ഷാബു ആവശ്യപ്പെട്ടുകൊണ്ടാണ് ഇയാളെ കുടുക്കിയത്. ഷാബു നൽകാമെന്ന് സമ്മതിക്കുകയും പോലീസുകാരോട് ഇയാളുടെ താമസ സ്ഥലത്ത് എത്താൻ പറയുകയുമായിരുന്നു. 450 ഗ്രാമിലധികം മയക്കുമരുന്ന് ഇയാളുടെ കൈവശമുണ്ടായിരുന്നു. ഇതോടെ പോലീസ് ബഹ്റൈൻ സ്വദേശിയെ അറസ്റ്റ് ചെയ്യുകയായിരുന്നു. നൈജീരിയൻ വിതരണക്കാരനിൽ നിന്നും മയക്കുമരുന്നുകൾ വാങ്ങിയതായി ഇയാൾ പറഞ്ഞു. വിവിധ മാർഗങ്ങളിലൂടെ രാജ്യത്ത് ഷാബു വലിയ തോതിൽ വിറ്റഴിക്കുന്നുണ്ടെന്നും, 25000 ദിനാറിന് 40 കാപ്സ്യൂളുകളാണ് തനിക്ക് ഇയാൾ നൽകിയതെന്നും ബഹ്റൈൻ സ്വദേശി പറഞ്ഞു. തുടർന്ന് നൈജീരിയൻ സ്വദേശിയേയും പോലീസ് അറസ്റ്റ് ചെയ്യുകയായിരുന്നു.
