ഒഴിവുകൾ റിപ്പോർട്ട് ചെയ്യാത്ത തൊഴിലുടമകൾക്ക് പിഴ ചുമത്തുന്ന ബിൽ പാർലമെന്റ് തള്ളണമെന്ന് സർവീസസ് കമ്മിറ്റി

പ്രദീപ് പുറവങ്കര

മനാമ: സ്ഥാപനങ്ങളിലെ തൊഴിലൊഴിവുകൾ മന്ത്രാലയത്തെ അറിയിക്കാത്ത തൊഴിലുടമകൾക്ക് 500 ദിനാർ വരെ പിഴ ചുമത്താൻ വ്യവസ്ഥ ചെയ്യുന്ന ബിൽ പാർലമെന്റ് തള്ളണമെന്ന് പാർലമെന്ററി സർവീസസ് കമ്മിറ്റി ഐകകണ്ഠേന ആവശ്യപ്പെട്ടു. അടുത്ത പാർലമെന്റ് സമ്മേളനത്തിൽ ബിൽ ചർച്ചയ്ക്കെടുക്കാനിരിക്കെയാണ് കമ്മിറ്റിയുടെ ഈ നിർദ്ദേശം.

കമ്പനികളിലെ എല്ലാ തൊഴിലൊഴിവുകളും നിർബന്ധമായും റിപ്പോർട്ട് ചെയ്യിക്കുന്നത് തൊഴിലുടമകളുടെ റിക്രൂട്ട്‌മെന്റ് സ്വാതന്ത്ര്യത്തെ തടസ്സപ്പെടുത്തുമെന്നും, എന്നാൽ ഇത് ബഹ്‌റൈനികൾക്ക് ജോലി ലഭിക്കുന്നതിന് കാര്യമായ സഹായകരമാകില്ലെന്നും കമ്മിറ്റി ചൂണ്ടിക്കാട്ടി.

എം.പി ജലാൽ കാസിം സമർപ്പിച്ച ബിൽ പ്രകാരം, സർക്കാറിന്റെ ഉടമസ്ഥതയിലുള്ളതും സ്വകാര്യ മേഖലയിലുള്ളതുമായ എല്ലാ കമ്പനികളും തങ്ങളുടെ സ്ഥാപനങ്ങളിലെ തൊഴിലൊഴിവുകൾ ലേബർ മന്ത്രാലയത്തെ അറിയിക്കുകയും മന്ത്രാലയത്തിന്റെ ഓൺലൈൻ ജോബ് പോർട്ടൽ വഴി പ്രസിദ്ധീകരിക്കുകയും വേണം. ഇത് പാലിക്കാത്ത തൊഴിലുടമകളിൽ നിന്ന് 200 മുതൽ 500 ദിനാർ വരെ പിഴ ഈടാക്കാനായിരുന്നു ബില്ലിലെ ശുപാർശ.

രാജ്യത്തുടനീളമുള്ള ഉദ്യോഗാർത്ഥികൾക്ക് തൊഴിലവസരങ്ങൾ കൃത്യമായി അറിയാനും ബഹ്‌റൈൻ പൗരന്മാർക്ക് ജോലി ലഭ്യതയിൽ മുൻഗണന ഉറപ്പാക്കാനുമാണ് 2012-ലെ പ്രൈവറ്റ് സെക്ടർ ലേബർ ലോയിൽ ഈ ഭേദഗതി നിർദ്ദേശിച്ചത്. എന്നാൽ, എല്ലാ ഒഴിവുകളും നിർബന്ധമായി റിപ്പോർട്ട് ചെയ്യിക്കാതെ സ്വതന്ത്രമായി ജീവനക്കാരെ തിരഞ്ഞെടുക്കാൻ തൊഴിലുടമകൾക്ക് അനുവാദം നൽകണമെന്നാണ് സർവീസസ് കമ്മിറ്റിയുടെ നിലപാട്.

തൊഴിൽ മന്ത്രാലയവും ഈ നിർദ്ദേശത്തിനെതിരെ രംഗത്തെത്തിയിട്ടുണ്ട്. ഇത്തരം പിഴകളും നിർബന്ധിത റിപ്പോർട്ടിംഗും റിക്രൂട്ട്‌മെന്റ് പ്രക്രിയയെ സങ്കീർണ്ണമാക്കുമെന്നും വ്യവസായ സ്ഥാപനങ്ങൾക്ക് അനാവശ്യ ഭാരമുണ്ടാക്കുമെന്നും മന്ത്രാലയം മുന്നറിയിപ്പ് നൽകി. തദ്ദേശീയർക്ക് മികച്ച വേതനമുള്ള ജോലികൾ സൃഷ്ടിക്കുന്നതിനും നിക്ഷേപങ്ങൾ ആകർഷിക്കുന്നതിനും അനുയോജ്യമായ തൊഴിൽ അന്തരീക്ഷമാണ് രാജ്യത്തിന് ആവശ്യമെന്ന് മന്ത്രാലയം വ്യക്തമാക്കി.

സ്വദേശി ജീവനക്കാരുടെ വേതന പിന്തുണ പദ്ധതികളെക്കുറിച്ചും മന്ത്രാലയം എടുത്തുപറഞ്ഞു. ആദ്യ വർഷത്തിൽ വേതനത്തിന്റെ 70 ശതമാനം വരെയും, രണ്ടാം വർഷത്തിൽ 50 ശതമാനവും, മൂന്നാം വർഷത്തിൽ 30 ശതമാനവും വേതന സഹായം സർക്കാർ നൽകുന്നുണ്ട്. തംകീനുമായി (Tamkeen) ചേർന്ന് നൽകുന്ന സൗജന്യ പരിശീലനങ്ങൾ, സർക്കാർ കരാറുകളുമായി ബന്ധപ്പെടുത്തിയ ബഹ്‌റൈനൈസേഷൻ (Bahrainisation) നിയമങ്ങൾ എന്നിവയും സ്വദേശികൾക്ക് ജോലി കണ്ടെത്താൻ സഹായിക്കുന്നുണ്ടെന്ന് മന്ത്രാലയം കൂട്ടിച്ചേർത്തു.

ബില്ലിനെ ബഹ്‌റൈൻ ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രിയും (BCCI) എതിർത്തു. സ്വകാര്യ കമ്പനികൾക്ക് മേൽ അനാവശ്യമായ സമ്മർദ്ദം ചെലുത്തുന്നതാണ് ഈ ബില്ലെന്നും ജീവനക്കാരെ തിരഞ്ഞെടുക്കാനുള്ള തൊഴിലുടമകളുടെ ഭരണഘടനാപരമായ അവകാശത്തിന്മേലുള്ള കടന്നുകയറ്റമാണെന്നും ചേംബർ വ്യക്തമാക്കി.