ഹജ്ജ് മിഷന്റെ സേവനങ്ങളെ പ്രശംസിച്ച് വിവരസാങ്കേതിക മന്ത്രി ഡോ. റംസാൻ ബിൻ അബ്ദുള്ള അൽ നുഐമി

പ്രദീപ് പുറവങ്കര

മനാമ: ബഹ്‌റൈനിൽ നിന്നുള്ള തീർത്ഥാടകർക്ക് മികച്ച സൗകര്യങ്ങളും മികച്ച സേവനങ്ങളും ഉറപ്പാക്കിയ ബഹ്‌റൈൻ ഹജ്ജ് മിഷന്റെ പ്രവർത്തനങ്ങളെ വിവരസാങ്കേതിക കാര്യ മന്ത്രി ഡോ. റംസാൻ ബിൻ അബ്ദുള്ള അൽ നുഐമി പ്രശംസിച്ചു. തീർത്ഥാടകർക്ക് ഹജ്ജ് കർമ്മങ്ങൾ സുഗമമായും സമാധാനപരമായും പൂർത്തിയാക്കാൻ ആവശ്യമായ എല്ലാ ക്രമീകരണങ്ങളും മിഷൻ ഒരുക്കിയതായി അദ്ദേഹം വ്യക്തമാക്കി.

ഹിസ് മജസ്റ്റി ഹമദ് ബിൻ ഈസ അൽ ഖലീഫ രാജാവിന്റെ സവിശേഷമായ കരുതലും, കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫയുടെ കൃത്യമായ മാർഗ്ഗനിർദ്ദേശങ്ങളുമാണ് തീർത്ഥാടകർക്ക് മികച്ച സേവനങ്ങൾ നൽകാൻ സഹായകരമായതെന്ന് മന്ത്രി ചൂണ്ടിക്കാട്ടി.

ബഹ്‌റൈൻ ഹജ്ജ് മിഷൻ തലവൻ ശൈഖ് അദ്നാൻ ബിൻ അബ്ദുള്ള അൽ ഖത്താൻ, മീഡിയ കമ്മിറ്റി അംഗങ്ങൾ എന്നിവരെ സ്വീകരിച്ച് സംസാരിക്കുകയായിരുന്നു അദ്ദേഹം. 1447 ഹജ്ജ് സീസണിലെ മാധ്യമ പ്രവർത്തനങ്ങൾ സംബന്ധിച്ച റിപ്പോർട്ട് പ്രതിനിധി സംഘം മന്ത്രിക്ക് കൈമാറി.

ഹജ്ജ് സീസണിലുടനീളം തീർത്ഥാടകരുടെ ആവശ്യങ്ങൾ കണ്ടറിഞ്ഞ് പ്രവർത്തിച്ച മിഷന്റെ സംഘാടന മികവിനെയും സമഗ്രമായ പ്രവർത്തനങ്ങളെയും മന്ത്രി അഭിനന്ദിച്ചു. മിഷന്റെ മാധ്യമ കമ്മിറ്റിക്ക് ആവശ്യമായ എല്ലാ സാങ്കേതിക സൗകര്യങ്ങളും പിന്തുണയും നൽകാൻ വിവരസാങ്കേതിക മന്ത്രാലയം എന്നും പ്രതിജ്ഞാബദ്ധമാണെന്നും അദ്ദേഹം ഉറപ്പുനൽകി. ഹജ്ജ് മിഷന്റെ പ്രവർത്തനങ്ങൾ ലോകമെമ്പാടും എത്തിക്കുന്നതിൽ മാധ്യമ കമ്മിറ്റി വഹിച്ച പങ്ക് വളരെ വലുതാണെന്നും അദ്ദേഹം കൂട്ടിച്ചേർത്തു.

ഹജ്ജ് സീസണിൽ മന്ത്രാലയത്തിൽ നിന്ന് ലഭിച്ച നിരന്തരമായ പിന്തുണയ്ക്കും സഹകരണത്തിനും ശൈഖ് അൽ ഖത്താനും മീഡിയ കമ്മിറ്റി അംഗങ്ങളും മന്ത്രി ഡോ. റംസാൻ അൽ നുഐമിക്ക് നന്ദി രേഖപ്പെടുത്തി. മന്ത്രാലയം നൽകിയ മികച്ച സൗകര്യങ്ങളാണ് ദൗത്യം വിജയകരമായി പൂർത്തിയാക്കാൻ സഹായിച്ചതെന്ന് അവർ വ്യക്തമാക്കി.