ഹന്റാ വൈറസിൽ ആശങ്ക വേണ്ടെന്ന് ഷൂറ കൗൺസിൽ അംഗം ഡോ. ജമീല അൽ സൽമാൻ

പ്രദീപ് പുറവങ്കര

മനാമ: ഹന്റാ വൈറസ് വ്യാപനവുമായി ബന്ധപ്പെട്ട് ബഹ്റൈനിൽ തൽക്കാലം ആശങ്കപ്പെടേണ്ട സാഹചര്യമില്ലെന്ന് ശൂറ കൗൺസിൽ സർവീസസ് കമ്മിറ്റി മേധാവി ഡോ. ജമീല അൽ സൽമാൻ വ്യക്തമാക്കി. കോവിഡ് പാൻഡെമിക്കിൽ നിന്നുള്ള പാഠങ്ങൾ ഉൾക്കൊണ്ട്, ലോകാരോഗ്യ സംഘടനയുമായും പ്രാദേശിക ആരോഗ്യ സ്ഥാപനങ്ങളുമായും ചേർന്ന് പുതിയ പകര്‍ച്ചവ്യാധികളെ രാജ്യം കൃത്യമായി നിരീക്ഷിച്ചു വരികയാണെന്നും രാജ്യത്തിന് നേരിട്ട് ഭീഷണിയാകുന്ന ലക്ഷണങ്ങളൊന്നും നിലവിലില്ലെന്നും അവർ പറഞ്ഞു. കോവിഡിന് ശേഷം നിരീക്ഷണ സംവിധാനങ്ങളും ലബോറട്ടറി സൗകര്യങ്ങളും അടിയന്തര പ്രതിരോധ പദ്ധതികളും ബഹ്റൈൻ കൂടുതൽ ശക്തമാക്കിയിട്ടുണ്ട്. പുതിയ ആരോഗ്യ വെല്ലുവിളികളെ നേരിടാൻ തക്കവണ്ണം നിയമനിർമ്മാണങ്ങൾ കാലാനുസൃതമായി പരിഷ്കരിക്കേണ്ടതുണ്ടെന്നും അവർ കൂട്ടിച്ചേർത്തു.

ലൈസൻസില്ലാത്ത മെഡിക്കൽ പരിശീലനങ്ങൾക്കെതിരെ കർശന ശിക്ഷ ഉറപ്പാക്കണമെന്നും യോഗ്യതയുള്ള വിദഗ്ധർ മാത്രമേ രോഗികളെ ചികിത്സിക്കുന്നുള്ളൂ എന്ന് ഉറപ്പാക്കണമെന്നും ഡോ. ജമീല ആവശ്യപ്പെട്ടു. കൂടാതെ, 2030-ഓടെ ബഹ്റൈനിലെ ജനസംഖ്യയിൽ 20 ശതമാനത്തോളം മുതിർന്ന പൗരന്മാരായിരിക്കുമെന്നതിനാൽ രാജ്യത്തിന്റെ ആരോഗ്യ മേഖല ഇതിനായി സജ്ജമാകേണ്ടതുണ്ട്. കൃത്രിമബുദ്ധി സാങ്കേതികവിദ്യ, മരുന്നുകളെ പ്രതിരോധിക്കുന്ന രോഗാണുക്കൾ, ദീർഘകാല രോഗങ്ങൾ, മാനസികാരോഗ്യം, കാലാവസ്ഥാ വ്യതിയാനം മൂലമുണ്ടാകുന്ന ആരോഗ്യ പ്രശ്നങ്ങൾ എന്നിവയായിരിക്കും വരും ദശകങ്ങളിൽ ആരോഗ്യ മേഖല നേരിടാൻ പോകുന്ന പ്രധാന വെല്ലുവിളികൾ.

ഓർത്തോപീഡിക്‌സ്, ഹൃദയചികിത്സ, വന്ധ്യതാ ചികിത്സ, നേത്രചികിത്സ, ഡെന്റൽ എന്നീ മേഖലകളിൽ ബഹ്റൈന് മെഡിക്കൽ ടൂറിസം സാധ്യതകൾ വർദ്ധിപ്പിക്കാനാകുമെന്നും അവർ ചൂണ്ടിക്കാട്ടി. സിക്കിൾ സെൽ രോഗചികിത്സയ്ക്കായി ബഹ്റൈൻ ക്രിസ്പർ ജീൻ എഡിറ്റിംഗ് സാങ്കേതികവിദ്യ ഉപയോഗിക്കുന്നത് രോഗ പ്രതിരോധ രംഗത്തെ വലിയൊരു വഴിത്തിരിവാണ്. ലക്ഷണങ്ങളെ മാത്രം ചികിത്സിക്കുന്നതിന് പകരം രോഗത്തെ ജനിതക തലത്തിൽ തന്നെ ഭേദമാക്കാൻ ഇത് സഹായിക്കും. എന്നാൽ ഇത്തരം ജീൻ തെറാപ്പികൾ കൂടുതൽ ജനങ്ങളിലേക്ക് എത്തിക്കാൻ ഗവേഷണത്തിലും വിദഗ്ധ പരിശീലനത്തിലും കൂടുതൽ നിക്ഷേപം ആവശ്യമാണെന്നും ഡോ. ജമീല അഭിപ്രായപ്പെട്ടു.