ഏഷ്യൻ ഗെയിംസ് അത്‌ലറ്റിക്സിൽ ബഹ്‌റൈന് മിന്നുന്ന പ്രകടനം: ബിർഹാനു ബലേവിന് സ്വർണ്ണം, ആകെ മെഡലുകൾ എട്ടായി

പ്രദീപ് പുറവങ്കര

മനാമ: ജപ്പാനിലെ ഐച്ചി-നാഗോയയിൽ നടക്കുന്ന 20-ാമത് ഏഷ്യൻ ഗെയിംസ് അത്‌ലറ്റിക്സിൽ ബഹ്‌റൈൻ മുന്നേറ്റം തുടരുന്നു. പുരുഷന്മാരുടെ 10,000 മീറ്ററിൽ സ്വർണ്ണം നേടിയ ബിർഹാനു ബലേവിന്റെ പ്രകടനത്തിന്റെ കരുത്തിൽ ബഹ്‌റൈൻ ഇന്നലെ മൂന്ന് മെഡലുകൾ കൂടി സ്വന്തമാക്കി. ഇതോടെ ടൂർണമെന്റിൽ ബഹ്‌റൈന്റെ ആകെ മെഡൽ നേട്ടം നാല് സ്വർണ്ണവും രണ്ട് വെള്ളിയും രണ്ട് വെങ്കലവും ഉൾപ്പെടെ എട്ടായി ഉയർന്നു.

നാഗോയ സിറ്റി മിസൂഹോ പാർക്ക് അത്‌ലറ്റിക് സ്റ്റേഡിയത്തിൽ നടന്ന ആവേശകരമായ മത്സരത്തിൽ, പ്രബലരായ എതിരാളികളെ പിന്നിലാക്കിയാണ് 30-കാരനായ ബലേവ് തന്റെ ഏഷ്യൻ ഗെയിംസ് കിരീടം നിലനിർത്തിയത്. റേസിന്റെ അവസാന അര ലാപ്പിൽ നടത്തിയ മിന്നൽ മുന്നേറ്റത്തിലൂടെ 28 മിനിറ്റ് 27.51 സെക്കൻഡിൽ ബലേവ് ഒന്നാമതായി ഫിനിഷ് ചെയ്തു. ഇന്ത്യയുടെ ഗുൽവീർ സിങ് (28:29.38) വെള്ളിയും ബഹ്‌റൈന്റെ അൽബെർട്ട് കിപ്റ്റൂ (28:34.38) വെങ്കലവും നേടി. ബലേവിന്റെ കരിയറിലെ നാലാമത്തെ ഏഷ്യൻ ഗെയിംസ് സ്വർണ്ണനേട്ടമാണിത്. ചൊവ്വാഴ്ച നടക്കുന്ന 5,000 മീറ്റർ ഫൈനലിലും ബലേവ് മത്സരിക്കുന്നുണ്ട്.

വനിതകളുടെ 100 മീറ്റർ ഫൈനലിൽ 11.33 സെക്കൻഡിൽ ഫിനിഷ് ചെയ്ത ബഹ്‌റൈന്റെ എഡിഡിയോങ് ഒഡിയോങ് വെങ്കല മെഡൽ സ്വന്തമാക്കി. ചൈനയുടെ യുജീ ചെൻ (11.06 സെക്കൻഡ്) ഈ ഇനത്തിൽ സ്വർണ്ണവും സിംഗപ്പൂരിന്റെ ശാന്തി പെരേര (11.21 സെക്കൻഡ്) വെള്ളിയും നേടി. മത്സരത്തിൽ പങ്കെടുത്ത ബഹ്‌റൈന്റെ റൈഹാന ഗരൂബ ഏഴാമതായാണ് ഫിനിഷ് ചെയ്തത്.

അതേസമയം, വനിതകളുടെ 400 മീറ്ററിൽ ബഹ്‌റൈന്റെ ലോക മുൻ ചാമ്പ്യനും പാരീസ് ഒളിമ്പിക്സ് വെള്ളി മെഡൽ ജേതാവുമായ സൽവ ഈദ് നാസർ ഫൈനലിലേക്ക് യോഗ്യത നേടി. ഹീറ്റ്സിൽ 53.02 സെക്കൻഡിൽ ഒന്നാമതെത്തിയാണ് സൽവ ഫൈനൽ ബർത്ത് ഉറപ്പിച്ചത്. വിജയികളായ കായികതാരങ്ങളെ ബഹ്‌റൈൻ ഒളിമ്പിക് കമ്മിറ്റി വൈസ് പ്രസിഡന്റും ഡെലിഗേഷൻ തലവനുമായ ശൈഖ് ഈസ ബിൻ അലി ബിൻ ഖലീഫ അൽ ഖലീഫയും ജനറൽ സെക്രട്ടറി ഫാരീസ് അൽ കൂഹെജിയും നേരിട്ടെത്തി അഭിനന്ദിച്ചു.