നിത്യോപയോഗ സാധനങ്ങളുടെ വില താരതമ്യം ചെയ്യാൻ പുതിയ പോർട്ടലുമായി വ്യവസായ വാണിജ്യ മന്ത്രാലയം
പ്രദീപ് പുറവങ്കര
മനാമ: രാജ്യത്തെ സൂപ്പർമാർക്കറ്റുകളിലെയും ഹൈപ്പർമാർക്കറ്റുകളിലെയും ഭക്ഷ്യവസ്തുക്കളുടെ പ്രതിദിന വിലവിവരങ്ങൾ പൊതുജനങ്ങൾക്ക് നേരിട്ട് താരതമ്യം ചെയ്യാനായി പുതിയ വെബ്സൈറ്റ് ആരംഭിക്കാൻ വ്യവസായ വാണിജ്യ മന്ത്രാലയം ഒരുങ്ങുന്നു. കുടുംബങ്ങൾക്ക് ഏറ്റവും കുറഞ്ഞ വിലയിൽ സാധനങ്ങൾ ലഭ്യമാകുന്ന കേന്ദ്രങ്ങൾ എളുപ്പത്തിൽ കണ്ടെത്താൻ ഈ സംവിധാനം സഹായിക്കും.
ആദ്യ ഘട്ടത്തിൽ മൂല്യവർധിത നികുതി ഒട്ടുമില്ലാത്ത 30 അടിസ്ഥാന ഭക്ഷ്യവസ്തുക്കളുടെ വിലവിവരങ്ങളാണ് വെബ്സൈറ്റിലൂടെ ലഭ്യമാക്കുക. പദ്ധതിയുടെ ഭാഗമാകുന്ന വ്യാപാര സ്ഥാപനങ്ങൾ പോർട്ടലിൽ രജിസ്റ്റർ ചെയ്യുകയും ദിവസവും രാവിലെയോടെ തങ്ങളുടെ പുതിയ വിലവിവരങ്ങൾ അപ്ഡേറ്റ് ചെയ്യുകയും വേണം. ഇതിലൂടെ ഉപഭോക്താക്കൾക്ക് തങ്ങൾക്ക് ആവശ്യമുള്ള സാധനങ്ങളുടെ വില വിവിധ സ്റ്റോറുകളിൽ എത്രയാണെന്ന് നിമിഷങ്ങൾക്കകം പരിശോധിക്കാനാകും.
വ്യത്യസ്ത കടകൾ നേരിട്ട് സന്ദർശിച്ചും പരസ്യങ്ങൾ പരിശോധിച്ചും സമയം കളയാതെ തന്നെ ഏറ്റവും ലാഭകരമായ രീതിയിൽ സാധനങ്ങൾ വാങ്ങാൻ ഉപഭോക്താക്കളെ സഹായിക്കുകയാണ് ഇതിന്റെ ലക്ഷ്യം. ഒപ്പം, വ്യാപാരികൾ തമ്മിലുള്ള അനാവശ്യ വിലവർധനവും ക്രമക്കേടുകളും തടയാനും വിപണിയിൽ ന്യായമായ വിലനിലവാരം ഉറപ്പാക്കാനും ഇത് വഴിയൊരുക്കും. മന്ത്രാലയം ഉദ്യോഗസ്ഥർ ഈ ഡാറ്റ ഉപയോഗിച്ച് വിപണിയിലെ വിലവ്യതിയാനങ്ങൾ നിരന്തരം നിരീക്ഷിക്കും.
ബഹ്റൈന്റെ വെർച്വൽ വാണിജ്യ രജിസ്ട്രേഷൻ സംവിധാനമായ 'സിജിലി' കൂടുതൽ മേഖലകളിലേക്ക് വ്യാപിപ്പിച്ചിട്ടുണ്ട്. ഇതോടെ വെർച്വൽ ലൈസൻസ് വഴി ചെയ്യാവുന്ന വാണിജ്യ പ്രവർത്തനങ്ങളുടെ എണ്ണം 73 ആയി ഉയർന്നിട്ടുണ്ട്. കെട്ടിട വാടകയില്ലാതെ തന്നെ ബഹ്റൈനി ഭക്ഷണവിഭവങ്ങളും തദ്ദേശീയ കലാപരിപാടികളും ലൈസൻസോടെ അവതരിപ്പിക്കാൻ ചെറുകിട സംരംഭകർക്ക് ഇത് പുതിയ അവസരം നൽകും.
xcgdfg
