പൊതുസ്ഥലങ്ങൾ കൈയേറുന്നതിനെതിരെ കർശന മുന്നറിയിപ്പുമായി മുഹറഖ് മുനിസിപ്പാലിറ്റി

പ്രദീപ് പുറവങ്കര

മനാമ: പാർപ്പിട മേഖലകളിലോ അതിന് സമീപത്തോ ഉള്ള പൊതുസ്ഥലങ്ങളും തുറസ്സായ ഇടങ്ങളും പൊതുജനങ്ങൾക്ക് അവകാശപ്പെട്ടതാണെന്നും കൃത്യമായ അനുമതിയില്ലാതെ ഇവ കൈയേറുകയോ ഉപയോഗിക്കുകയോ നിർമ്മാണ പ്രവർത്തനങ്ങൾ നടത്തുകയോ ചെയ്യരുതെന്ന് മുഹറഖ് മുനിസിപ്പാലിറ്റി നിവാസികൾക്ക് കർശന മുന്നറിയിപ്പ് നൽകി. പൊതുജനങ്ങളുടെ ബോധവൽക്കരണത്തിനായി പുറത്തിറക്കിയ പ്രത്യേക അറിയിപ്പിലാണ് മുനിസിപ്പാലിറ്റി ഇക്കാര്യം വ്യക്തമാക്കിയത്. പൊതു റോഡുകൾ കൈയേറുന്നത് തടയുന്നതുമായി ബന്ധപ്പെട്ട 1996-ലെ രണ്ടാം നമ്പർ നിയമപ്രകാരമാണ് ഈ പൊതുസ്ഥലങ്ങളുടെ ഉപയോഗം നിയന്ത്രിക്കുന്നത്. എല്ലാ പൗരന്മാർക്കും ഇത്തരം സ്ഥലങ്ങളുടെ പ്രയോജനം ഒരുപോലെ ഉറപ്പാക്കുന്നതിനും പാർപ്പിട മേഖലകളുടെ ഭംഗിയും ക്രമവും നിലനിർത്തുന്നതിനുമാണ് ഈ നിയമം കർശനമായി നടപ്പിലാക്കുന്നത്.

പാർപ്പിട മേഖലകളിലെ പൊതുസ്ഥലങ്ങളിൽ സാധാരണയായി കണ്ടുവരുന്ന പ്രധാന നിയമലംഘനങ്ങളും മുനിസിപ്പാലിറ്റി അധികൃതർ ചൂണ്ടിക്കാണിച്ചു. പൊതുസ്ഥലങ്ങൾ സ്വകാര്യ വസ്തുക്കളുടെ അതിർത്തിക്കുള്ളിലാക്കി മാറ്റുക, വീടുകളോട് ചേർത്ത് താൽക്കാലിക സ്റ്റോറേജ് മുറികളോ മറ്റ് നിർമ്മിതികളോ സ്ഥാപിക്കുക, മെറ്റൽ ഷീറ്റുകൾ കൊണ്ടുള്ള മുറികളും താൽക്കാലിക ഷെഡ്ഡുകളും നിർമ്മിക്കുക എന്നിവ നിയമവിരുദ്ധമാണ്. കൂടാതെ ഇത്തരം സ്ഥലങ്ങളിൽ നിർമ്മാണ സാമഗ്രികൾ, യന്ത്രങ്ങൾ അല്ലെങ്കിൽ വ്യക്തിഗത സാധനങ്ങൾ എന്നിവ സൂക്ഷിക്കുന്നതും വിലക്കിയിട്ടുണ്ട്. നിയമവിരുദ്ധമായി വേലികളോ ഗേറ്റുകളോ മറ്റ് തടസ്സങ്ങളോ സ്ഥാപിച്ച് മറ്റുള്ളവർക്ക് ഈ പൊതുസ്ഥലങ്ങൾ ഉപയോഗിക്കാനുള്ള അവകാശം നിഷേധിക്കുന്നതും കടുത്ത നിയമലംഘനമായി കണക്കാക്കും.

പൊതുസ്ഥലങ്ങൾ അതിന്റെ യഥാർത്ഥ ലക്ഷ്യത്തോടെ കാത്തുസൂക്ഷിക്കേണ്ടത് സമൂഹത്തിന്റെ കൂട്ടായ ഉത്തരവാദിത്തമാണെന്ന് മുനിസിപ്പാലിറ്റി ഓർമ്മിപ്പിച്ചു. നിയമങ്ങൾ പാലിക്കുന്നതിലൂടെ നഗരത്തിന്റെ ഭംഗി നിലനിർത്താനും ജനങ്ങളുടെ ജീവിതനിലവാരം ഉയർത്താനും സാധിക്കും. പൊതുമുതലുകൾ അതിന്റെ ശരിയായ ആവശ്യങ്ങൾക്ക് മാത്രം ഉപയോഗിക്കുന്നുവെന്ന് ഉറപ്പുവരുത്താൻ എല്ലാവരും സഹകരിക്കണമെന്നും അധികൃതർ അഭ്യർത്ഥിച്ചു.