ഗൾഫ് എയർ വ്യൂഹത്തിലേക്ക് പുതിയ എയർബസ് എ320 നിയോ; വിമാനങ്ങളുടെ എണ്ണം 45 ആയി ഉയർന്നു
പ്രദീപ് പുറവങ്കര
മനാമ: പൊതു പ്രവർത്തന വിപുലീകരണ പദ്ധതികളുടെ ഭാഗമായി ദേശീയ വിമാനക്കമ്പനിയായ ഗൾഫ് എയർ തങ്ങളുടെ പുതിയ എയർബസ് എ320നിയോ (Airbus A320neo) വിമാനത്തെ ബഹ്റൈൻ അന്താരാഷ്ട്ര വിമാനത്താവളത്തിലേക്ക് സ്വാഗതം ചെയ്തു. പുതിയ വിമാനം കൂടി എത്തിയതോടെ ഗൾഫ് എയറിന്റെ ആകെ വിമാനങ്ങളുടെ എണ്ണം 45 ആയി ഉയർന്നു. പ്രവർത്തനക്ഷമത വർദ്ധിപ്പിക്കുന്നതിനും ഇന്ധനക്ഷമതയുള്ള അത്യാധുനിക വിമാനങ്ങൾ സ്വന്തമാക്കുന്നതിനുമുള്ള കമ്പനിയുടെ തുടർച്ചയായ ശ്രമങ്ങളുടെ ഭാഗമായാണ് പുതിയ നടപടി.
വിപണിയിലെ ഏറ്റവും വീതിയേറിയ സിംഗിൾ-ഐൽ കാബിനുകളിലൊന്നായ ഈ വിമാനത്തിൽ മികച്ച എയറോഡൈനാമിക് പ്രകടനത്തിനും ഇന്ധന ഉപഭോഗം കുറയ്ക്കുന്നതിനുമായി പ്രത്യേകം രൂപകൽപ്പന ചെയ്ത 'ഷാർക്ക്ലെറ്റുകൾ' (Sharklets) ഘടിപ്പിച്ചിട്ടുണ്ട്. മുൻതലമുറ മോഡലുകളെ അപേക്ഷിച്ച് ഒരു സീറ്റിന് ഏകദേശം 15 ശതമാനം വരെ കുറഞ്ഞ ഇന്ധന ഉപഭോഗം മാത്രമാണ് ഈ വിമാനത്തിനുള്ളത്. കാർബൺ പുറന്തള്ളൽ ഗണ്യമായി കുറയ്ക്കുന്നതിനും ശബ്ദമലിനീകരണം ഏകദേശം 50 ശതമാനത്തോളം ഇല്ലാതാക്കാനും സഹായിക്കുന്ന പുതിയ വിമാനം കമ്പനിയുടെ സുസ്ഥിരതാ ലക്ഷ്യങ്ങളെ ശക്തമായി പിന്തുണയ്ക്കുന്നതാണെന്ന് അധികൃതർ വ്യക്തമാക്കി. വ്യൂഹം വിപുലീകരിക്കുന്നതിന്റെ ഭാഗമായി ഈ വർഷം അവസാനത്തോടെ കൂടുതൽ എ320നിയോ വിമാനങ്ങൾ എത്തിക്കാനാണ് ഗൾഫ് എയർ ലക്ഷ്യമിടുന്നത്.
dsfgdg
