ബഹ്‌റൈനിൽ ചെമ്മീൻ പിടുത്തത്തിന് ഞായറാഴ്ച മുതൽ നിരോധനം; ആറുമാസത്തേക്ക് കർശന നിയന്ത്രണം

പ്രദീപ് പുറവങ്കര I ബഹ്റൈൻ:

ബഹ്‌റൈനിൽ വർഷംതോറും ഏർപ്പെടുത്താറുള്ള ആറ് മാസത്തെ ചെമ്മീൻ പിടുത്ത നിരോധനം ഈ ഞായറാഴ്ച മുതൽ നിലവിൽ വരും. കടൽ വിഭവങ്ങളുടെ സംരക്ഷണം, പരിസ്ഥിതി സന്തുലിതാവസ്ഥ ഉറപ്പാക്കൽ, സുസ്ഥിര വികസനം എന്നിവ ലക്ഷ്യമിട്ടാണ് സുപ്രീം കൗൺസിൽ ഫോർ എൻവയോൺമെന്റിലെ മറൈൻ റിസോഴ്‌സ് ഡയറക്ടറേറ്റ് ഈ നിർണ്ണായക നടപടി സ്വീകരിച്ചിരിക്കുന്നത്. വരാനിരിക്കുന്ന ജൂലൈ 31 വരെ നീണ്ടുനിൽക്കുന്ന ഈ കാലയളവിൽ ചെമ്മീൻ പിടിക്കുന്നതിനും വിപണികളിൽ വിൽക്കുന്നതിനും കർശനമായ വിലക്കുണ്ടായിരിക്കും.

നിരോധനം കാര്യക്ഷമമായി നടപ്പിലാക്കുന്നതിനായി കോസ്റ്റ് ഗാർഡുമായി സഹകരിച്ച് വിപണികളിലും കടലിലും വ്യാപകമായ പരിശോധനകൾ നടത്താനാണ് അധികൃതരുടെ തീരുമാനം. മറ്റ് മത്സ്യങ്ങൾ പിടിക്കുന്നതിനിടയിൽ അബദ്ധവശാൽ വലയിൽ ചെമ്മീൻ കുടുങ്ങുകയാണെങ്കിൽ, അവയെ ഒട്ടും പരിക്കേൽക്കാതെ ഉടൻ തന്നെ കടലിലേക്ക് തിരിച്ചുവിടണമെന്ന് മത്സ്യത്തൊഴിലാളികൾക്ക് കർശന നിർദ്ദേശം നൽകിയിട്ടുണ്ട്. നിയമം ലംഘിക്കുന്നവർക്കെതിരെ കടുത്ത ശിക്ഷാനടപടികളാണ് കാത്തിരിക്കുന്നത്. കുറ്റക്കാർക്ക് ഒരു മാസം വരെ തടവോ, 300 മുതൽ 1,000 ബഹ്‌റൈൻ ദിനാർ വരെ പിഴയോ, അല്ലെങ്കിൽ രണ്ടും കൂടിയോ ശിക്ഷയായി ലഭിക്കാം. ഇതിന് പുറമെ, നിയമലംഘനത്തിന് ഉപയോഗിച്ച ഉപകരണങ്ങളും പിടിച്ചെടുത്ത ചെമ്മീനും അധികൃതർ കണ്ടുകെട്ടുന്നതാണ്.

മുൻകാലങ്ങളിൽ നിരോധനം ലംഘിച്ച് ചെമ്മീൻ പിടിക്കാൻ ശ്രമിച്ച പല സംഭവങ്ങളും വലിയ അപകടങ്ങൾക്കും മരണങ്ങൾക്കും കാരണമായിട്ടുണ്ട്. കഴിഞ്ഞ വർഷം ഒക്ടോബർ 20-ന് 'ഫഷ്ത് അൽ അദം' മേഖലയിൽ രാത്രികാലത്ത് നിയമവിരുദ്ധമായി ചെമ്മീൻ പിടിക്കുകയായിരുന്ന ബോട്ട് തടയാനുള്ള ശ്രമത്തിനിടയിൽ വലിയൊരു ദുരന്തം സംഭവിച്ചിരുന്നു. അന്ന് കടലിൽ വീണ ഒരു ബഹ്‌റൈൻ സ്വദേശിയെ കാണാതാവുകയും, രണ്ടാഴ്ചത്തെ വിപുലമായ തിരച്ചിലിന് ശേഷം ഖത്തർ തീരസംരക്ഷണ സേന അദ്ദേഹത്തിന്റെ മൃതദേഹം കണ്ടെത്തുകയും ചെയ്തിരുന്നു. ഇത്തരത്തിലുള്ള ജീവഹാനികളും നിയമനടപടികളും ഒഴിവാക്കുന്നതിനായി എല്ലാവരും സഹകരിക്കണമെന്ന് അധികൃതർ അഭ്യർത്ഥിച്ചു.