മൈലാഞ്ചിമണമുള്ളൊരു പെരുന്നാൾ രാവ്; നാട്ടോർമ്മകൾക്ക് പൊലിമയേകി ഇടപ്പാളയം മെഹന്തി നൈറ്റ്
പ്രദീപ് പുറവങ്കര
മനാമ: പ്രവാസത്തിന്റെ തിരക്കുകൾക്കിടയിലും നാട്ടോർമ്മകൾക്ക് പൊലിമയേകി ഒരുമയുടെ സംഗമം. നാടിന്റെ സ്നേഹവും പെരുന്നാളിന്റെ ആഹ്ലാദവും കൈവിടാതെ ഇടപ്പാളയം കുടുംബാംഗങ്ങൾ ബലിപെരുന്നാളിന് മുന്നോടിയായി സംഘടിപ്പിച്ച 'മെഹന്തി നൈറ്റ്' ആഘോഷരാവ് വൻ വിജയമായി സമാപിച്ചു. 2025 ജൂൺ 05 വ്യാഴാഴ്ച സെഗയയിലെ ഫിനിക്സ് ആർട്സ് & സ്പോർട്സ് ക്ലബ്ബിൽ വെച്ച് നടന്ന പരിപാടിയിൽ കുടുംബാംഗങ്ങളുടെ സജീവ സാന്നിധ്യം ശ്രദ്ധേയമായി.
ഹൃദയങ്ങളെ കീഴടക്കിയ താളവിസ്മയം തീർത്തുകൊണ്ട്, ഇടപ്പാളയം ടീമിന്റെ പരമ്പരാഗത മുട്ടിപ്പാട്ട് ഈ ആഘോഷരാവിനെ കൂടുതൽ വർണ്ണാഭമാക്കി, ഒപ്പന, കോൽക്കളി എന്നിവ പരിപാടിയുടെ പ്രധാന ആകർഷണങ്ങളായി. ഓരോ പ്രകടനവും കാണികളിൽ ആവേശം നിറയ്ക്കുകയും മനസ്സിൽ മായാതെ നിൽക്കുന്ന നാട്ടിലെ പെരുന്നാൾ കാലം ഓർമ്മിപ്പിക്കുകയും ചെയ്തു. വിവിധ പ്രായത്തിലുള്ള കുട്ടികൾ അവതരിപ്പിച്ച കലാപരിപാടികൾ സദസ്സിന്റെ കയ്യടി നേടി. മൈലാഞ്ചി അണിയുന്നതിനുള്ള സൗകര്യവും പരിപാടിയുടെ ഭാഗമായി ഒരുക്കിയിരുന്നു, ഇത് പെരുന്നാൾ രാവിന്റെ തനിമ വർദ്ധിപ്പിച്ചു.
മൈലാഞ്ചിമണമുള്ള ഓരോ നിമിഷവും, പ്രിയപ്പെട്ട നാട്ടുകാരോടൊത്തുള്ള പെരുന്നാൾ രാവും ഗൃഹാതുരത്വമുണർത്തുന്ന മധുര സ്മരണകൾ സമ്മാനിച്ചു. ഇടപ്പാളയം ലേഡീസ് & കൾച്ചറൽ വിംഗിന്റെയും, പ്രോഗ്രാം കോർഡിനേറ്റർമാരായ ശ്രീമതി ഷിറിൻ, ഐശ്വര്യ എന്നിവരുടെ നേതൃത്വത്തിൽ നടത്തിയ ചിട്ടയായ പ്രവർത്തനങ്ങളാണ് ഈ പരിപാടിയെ ഇത്രയും ഹൃദ്യമാക്കിയത്. മനോഹരമായ ഈ മെഹന്തി നൈറ്റ് ഒരു അവിസ്മരണീയ സായാഹ്നമായി എല്ലാവരുടെയും ഓർമ്മകളിൽ എന്നും തങ്ങിനിൽക്കുമെന്ന് പങ്കെടുത്തവർ ഒരേ മനസ്സോടെ അഭിപ്രായപ്പെട്ടു.
gdsfgd
