ചുമുട് താങ്ങേണ്ട കാലം...
പ്രദീപ് പുറവങ്കര
“ചുമടുതാങ്ങി” എന്ന വാക്ക് ചിലപ്പോൾ പുതിയ തലമുറയ്ക്ക് അപരിചിതമായിരിക്കും. വലിയ ചുമടുകൾ തലയിലേറ്റിയുള്ള ദീർഘ യാത്രയ്ക്കിടയിൽ ക്ഷീണിതരാകുന്പോൾ ചുമട് ഇറക്കി വെയ്ക്കാനുള്ള ഇടമാണിത്. തലയിലും ചുമലുകളിലും ചുമടുമായി പോകുന്നവർ തങ്ങളുടെ ചുമടുകൾ ഇറക്കിവെച്ച് വിശ്രമിച്ചിരുന്നത് പാതയോരത്ത് തീർത്ത ഇത്തരം ചുമടുതാങ്ങികളിലായിരുന്നു. ഇന്നത്തെ പോലെ വാഹനങ്ങൾ ഇല്ലാതിരുന്ന ഒരു കാലത്ത് കാളവണ്ടിയിലും കാൽ‍നടയായും ചുമടുമായി പോകുന്നവർക്ക് പാതയോരങ്ങളിൽ നിശ്ചിത അകലങ്ങളിലായി സ്ഥാപിച്ച ചുമടുതാങ്ങികൾ ഏറെ പ്രയോജനപ്പെട്ടിരുന്നു. നമ്മുടെ നാട്ടിൽ പലയിടത്തും കരിങ്കല്ലുകൾ ഇളകിയ നിലയിലുള്ള ചുമടുതാങ്ങികൾ പഴയ തലമുറയ്ക്ക് ഒളിമങ്ങാത്ത ഓർ‍മ്മകളും പുതുതലമുറക്ക് കൗതുകവും സമ്മാനിച്ച് ഇന്നും അവിടെ തന്നെ നിൽ‍ക്കുന്നുണ്ട്.
മുന്പ് നടന്നും കാളവണ്ടിയിലും ഒക്കെ യാത്ര ചെയ്ത നമ്മൾ ഇന്ന് ഹൈ സ്പീഡ് കാറുകളിലും, വിമാനങ്ങളിലും പറക്കുകയാണ്. അത്തരം യാത്രകൾക്കിടയിൽ പലപ്പോഴും ഉണ്ടാകാറുള്ള കാത്തിരിപ്പ് മുന്പ് സൂചിപ്പിച്ച ചുമുടുതാങ്ങികളിൽ ഇരിക്കുന്നത് പോലെയാണ്. ഇവിടെ ഇറക്കിവെയ്ക്കുന്നത് തലചുമട് അല്ല മറിച്ച് മനസിന്റെ ഭാരങ്ങളാണെന്ന് മാത്രം. ഒരിടത്ത് നിന്ന് മറ്റേയിടത്തേയ്ക്ക് പോകുന്പോൾ ഇത്തരം ചില ഭാരങ്ങൾ നമ്മൾ കൊണ്ടു പോകും. കണ്ണുകൊണ്ട് കാണാൻ സാധിക്കാത്ത, തൂക്കി നോക്കാൻ പറ്റാത്ത ഇത്തരം ഭാരങ്ങൾക്കാണ് ഏതൊരു വലിയ ലഗേജിനെക്കാളും കനമുള്ളത്. വേവലാതികൾ, സ്വപ്നങ്ങൾ, ചിന്തകൾ ഒക്കെ തിരക്കിട്ട് മുന്പിലൂടെ കടന്നു പോകുന്ന മുഖങ്ങളിൽ കാണാം. നമ്മുടെ ഇടയിലെ ചില മനുഷ്യർ ചുമടുതാങ്ങികളെ പോലെയാണ്. എത്ര തന്നെ ഭാരം തലയിലേറ്റിയാലും ആരോടും പരിഭവമില്ലാതെ തല ഉയർത്തി തന്നെ അവർ നിൽക്കും. അപരന്റെ വേദനകളെയും, സങ്കടങ്ങളെയുമാണ് അവർ എന്നും പുഞ്ചിരിയോടെ ഏറ്റെടുക്കുന്നത്. ചിലർക്ക് അവർ ഉപദേശികളാണ്, ചിലർക്ക് സഹായികളും. ചിലർക്ക് അവർ ഉടമകളാണ്, ചിലർക്ക് അവർ അടിമകളും. ഒന്ന് മനസ്സറിഞ്ഞ് ചിന്തിച്ചാൽ അത്തരം ചില നല്ല മുഖങ്ങൾ നിങ്ങളുടെ മുന്പിലും തെളിഞ്ഞുവരും. അമ്മയുടെ, അച്ഛന്റെ, മക്കളുടെ, സഹോദരങ്ങളുടെ, സുഹൃത്തുക്കളുടെ ഒക്കെ മുഖമാകാം അത്. ചിലപ്പോൾ നിങ്ങളുടെ തന്നെ നിഴലുമാകാം. ഏത് ഭരവും ഇറക്കി വെയ്ക്കാൻ പറ്റുന്ന അത്താണികളാണിവർ.
കടന്നുപോയികൊണ്ടിരിക്കുന്ന ദിവസങ്ങൾ എത്രയോ കോടി ആളുകൾക്ക് അത്താണിയാകുന്ന ഒരു വിപ്ലവകാരിയുടെ ഓർമ്മകൾ പുതുക്കുന്ന ദിനങ്ങളാണ്്. പെസഹയായും, ദുഃഖവെള്ളിയായും, ഉയർത്തെഴുന്നേൽപ്പിന്റെ ഈസ്റ്റർ ദിനമായും ഒക്കെ ആ ദിനങ്ങൾ ലോകവിശ്വാസി സമൂഹം ആദരവോടെ ആചരിച്ചുവരുന്നു. സ്‌നേഹം, ത്യാഗം, ആർ‍ദ്രത, കരുണ, കരുതൽ എന്നിവയാണ് ഈ ദിനം നമ്മെ ഓർമ്മിപ്പിക്കുന്നത്. ഇന്ന് ലോകത്തിന് നഷ്ടമായി കൊണ്ടിരിക്കുന്നതും ഇവയെല്ലാമാണ്. അശാന്തി നടമാടുന്ന ഒരു കാലത്ത് ജീവിതത്തിൽ സ്വായത്തമാക്കേണ്ടത് പരസ്പരം സ്‌നേഹിക്കാനും ത്യാഗം ചെയ്യാനുമുള്ള മനസ് തന്നെയാണ് എന്ന് ഓർമ്മിപ്പിക്കുന്നു ഈ ദിവസങ്ങൾ. പരസ്പരം ചുമടുതാങ്ങികളാകേണ്ടതിന്റെ പ്രധാന്യം ഈ ദിനങ്ങളിൽ തിരിച്ചറിയണമെന്നാഗ്രഹത്തോടെ...!!
