ഇത്തിഹാദ് റെയിലും ദുബായ് മെട്രോയും തമ്മിൽ ബന്ധിപ്പിക്കുന്നു: യാത്രാസൗകര്യത്തിൽ പുതിയ ചരിത്രം കുറിക്കാൻ യു.എ.ഇ
ശാരിക
ദുബായ്: യു.എ.ഇയുടെ ദേശീയ റെയിൽ ശൃംഖലയായ ഇത്തിഹാദ് റെയിലും ദുബായ് മെട്രോയും തമ്മിൽ ബന്ധിപ്പിക്കുന്നതിനുള്ള നിർണ്ണായക നീക്കവുമായി അധികൃതർ. സെപ്റ്റംബർ 30 മുതൽ ഇത്തിഹാദ് റെയിൽ ദുബായിൽ നിന്ന് സർവീസ് ആരംഭിക്കുന്നതോടെയാണ് യാത്രക്കാർക്ക് തടസ്സമില്ലാത്ത യാത്രാസൗകര്യം ഒരുങ്ങുന്നത്.
ദുബായ് അൽ യലായിസ് ഇത്തിഹാദ് റെയിൽ സ്റ്റേഷനിൽ ഇറങ്ങുന്ന യാത്രക്കാർക്ക് ജുമൈറ ഗോൾഫ് എസ്റ്റേറ്റ്സ് സ്റ്റേഷൻ വഴി ദുബായ് മെട്രോയുടെ റെഡ് ലൈനിലേക്ക് എളുപ്പത്തിൽ മാറാൻ സാധിക്കും. ഇരു സ്റ്റേഷനുകളെയും തമ്മിൽ നേരിട്ട് ബന്ധിപ്പിക്കുന്നതിനായി പ്രത്യേക കാൽനടപ്പാലം നിർമ്മിച്ചുവരികയാണെന്ന് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) സ്ഥിരീകരിച്ചു.
ഈ കണക്റ്റിവിറ്റി നിലവിൽ വരുന്നതോടെ സ്വകാര്യ വാഹനങ്ങളുടെ സഹായമില്ലാതെ തന്നെ അബുദാബി, ഫുജൈറ തുടങ്ങിയ എമിറേറ്റുകളിൽ നിന്ന് ട്രെയിനിൽ എത്തുന്നവർക്ക് ബിസിനസ് ബേ, ബുർജ് ഖലീഫ/ദുബായ് മോൾ, മാൾ ഓഫ് ദി എമിറേറ്റ്സ്, ദുബായ് എയർപോർട്ട് തുടങ്ങിയ നഗരത്തിന്റെ വിവിധ ഭാഗങ്ങളിലേക്ക് എളുപ്പത്തിൽ എത്തിച്ചേരാനാകും.
ദുബായ് മെട്രോയിലെ ഏറ്റവും വലിയ ഭൂഗർഭ സ്റ്റേഷനായ ജുമൈറ ഗോൾഫ് എസ്റ്റേറ്റ്സ് വഴിയാണ് ഈ സേവനം സാധ്യമാകുന്നത്. പ്രതിദിനം രണ്ടര ലക്ഷത്തോളം യാത്രക്കാരെ ഉൾക്കൊള്ളാൻ ശേഷിയുള്ള ഈ സ്റ്റേഷൻ വഴി ഗ്രീൻ ലൈനിലേക്കും ദുബായ് ട്രാം ശൃംഖലയിലേക്കും മാറി സഞ്ചരിക്കാം. അതുപോലെ തന്നെ ദുബായിൽ നിന്നുള്ള യാത്രക്കാർക്ക് മെട്രോയിൽ ജുമൈറ ഗോൾഫ് എസ്റ്റേറ്റ്സിലെത്തി അൽ യലായിസ് സ്റ്റേഷൻ വഴി അബുദാബിയിലേക്കോ ഫുജൈറയിലേക്കോ ഉള്ള ഇത്തിഹാദ് റെയിൽ ട്രെയിനുകളിൽ കയറാനും സൗകര്യമുണ്ടാകും.
sdfsdf
