ഖരീഫ് സീസൺ : മുവാസലാത്തിൽ അധിക സർവ്വീസ്
മസ്കത്ത് : ഒമാനിലെ ഖരീഫ് ഫെസ്റ്റിവൽ ആരംഭിച്ചതോടെ ദിനംപ്രതി നിരവധി സന്ദർശകരാണ് എത്തിക്കൊണ്ടിരിക്കുന്നത്. ഇതിന്റെ ഭാഗമായി മസ്കത്ത് - സലാല റൂട്ടിൽ കൂടുതൽ സർവ്വീസുകളാണ് മുവാസലാത്ത് ഒരുക്കുന്നത്. കൂടാതെ ഓഗസ്റ്റ് 31 വരെയുള്ള ദിവസങ്ങളിൽ ടിക്കറ്റ് ബുക്ക് ചെയ്യുന്നവർക്ക് നിരക്കിൽ ഇളവും ലഭിക്കും. ദിനം പ്രതിയുള്ള സർവ്വീസുകളുടെ എണ്ണം മൂന്നിൽ നിന്ന് ആറായി ഉയർത്തിയിട്ടുണ്ട്. 600 സീറ്റുകളാണ് ഒരു ദിവസം അനുവദിച്ചിരിക്കുന്നത്.
രണ്ട് കുട്ടികൾ അടങ്ങുന്ന കുടുംബത്തിന് ഒരു ട്രിപ്പിന് 15 റിയാലാണ് ടിക്കറ്റ് നിരക്ക്. മടക്ക യാത്ര ഉൾപ്പടെയാണെങ്കിൽ 25 റിയാലും ഈടാക്കും. മൂന്ന് മുതൽ 11 വയസ് വരെയുള്ള കുട്ടികൾക്ക് ഇളവ് അനുവദിക്കുക. പത്ത് പേരടങ്ങുന്ന സംഘങ്ങൾക്ക് ഒരു ടിക്കറ്റ് സൗജന്യമായി ലഭിക്കും.
