ഇറാൻ യുദ്ധത്തിൽ സഹകരിക്കാത്ത നാറ്റോ രാജ്യങ്ങളിൽ നിന്ന് സൈന്യത്തെ പിൻവലിക്കാൻ ട്രംപ് ഒരുങ്ങുന്നു
പ്രദീപ് പുറവങ്കര I അന്തർദേശീയം
ഇറാനുമായുള്ള യുദ്ധത്തിൽ അമേരിക്കയെയും ഇസ്രായേലിനെയും വേണ്ടത്ര പിന്തുണയ്ക്കാത്ത നാറ്റോ (NATO) അംഗരാജ്യങ്ങളെ ശിക്ഷിക്കാൻ പ്രസിഡന്റ് ഡൊണാൾഡ് ട്രംപ് പദ്ധതിയിടുന്നതായി റിപ്പോർട്ട്. യുഎസ് ഭരണകൂടത്തിലെ ഉദ്യോഗസ്ഥരെ ഉദ്ധരിച്ച് 'വാൾസ്ട്രീറ്റ് ജേർണൽ' ആണ് ഈ വാർത്ത പുറത്തുവിട്ടത്.
അമേരിക്കയുമായി സഹകരിക്കാത്ത സഖ്യകക്ഷികളിൽ നിന്ന് യുഎസ് സൈന്യത്തെ പിൻവലിക്കാനും, പകരം യുദ്ധത്തിൽ കൂടുതൽ പിന്തുണ നൽകിയ രാജ്യങ്ങളിൽ ഇവരെ വിന്യസിക്കാനുമാണ് ട്രംപിന്റെ ആലോചന. ഇറാൻ അടച്ചുപൂട്ടിയ ഹോർമുസ് കടലിടുക്ക് വീണ്ടും തുറക്കുന്നതിനായി ട്രംപ് സഹായം അഭ്യർത്ഥിച്ചെങ്കിലും പല നാറ്റോ രാജ്യങ്ങളും ഇത് അവഗണിച്ചിരുന്നു. ഇതിൽ പ്രതിഷേധിച്ച് നാറ്റോ സഖ്യത്തിൽ നിന്ന് തന്നെ പിന്മാറുന്നതിനെക്കുറിച്ച് ട്രംപ് നേരത്തെ സൂചന നൽകിയിരുന്നു.
ബുധനാഴ്ച വൈകിട്ട് നാറ്റോ സെക്രട്ടറി ജനറൽ മാർക്ക് റൂട്ടെയുമായി ട്രംപ് കൂടിക്കാഴ്ച നടത്താനിരിക്കെ, സഖ്യത്തിൽ നിന്നുള്ള പിന്മാറ്റം ചർച്ചാവിഷയമാകുമെന്ന് വൈറ്റ് ഹൗസ് വക്താവ് കരോലിൻ ലീവിറ്റ് സ്ഥിരീകരിച്ചു. ഇതിന് മുന്നോടിയായി യുഎസ് സ്റ്റേറ്റ് സെക്രട്ടറി മാർക്കോ റൂബിയോ റൂട്ടെയുമായി കൂടിക്കാഴ്ച നടത്തി. ഇറാൻ യുദ്ധം, റഷ്യ-ഉക്രെയ്ൻ യുദ്ധം അവസാനിപ്പിക്കാനുള്ള നീക്കങ്ങൾ, നാറ്റോ സഖ്യകക്ഷികൾക്കിടയിലെ ഉത്തരവാദിത്തങ്ങൾ പങ്കിടൽ എന്നിവ ഇരുവരും ചർച്ച ചെയ്തതായി സ്റ്റേറ്റ് ഡിപ്പാർട്ട്മെന്റ് അറിയിച്ചു.
dfdsf
